ພິທີ ປະກາດຮັບຮອງບ້ານນໍ້າຍິ້ງ ເປັນບ້ານວັດທະນະທຳ ແຫ່ງທີ 17 ຂອງເມືອງລ້ອງຊານ ແຂວງໄຊສົມບູນ ໄດ້ຈັດຂຶ້ນໃນວັນທີ 28 ມັງກອນ 2020 ນີ້ ທີ່ເດີ່ນໂຮງຮຽນປະຖົມສົມບູນ ຂອງບ້ານ ໂດຍການເຂົ້າຮ່ວມຂອງທ່ານ ແດງ ປະທຸມທອງ, ຮອງເຈົ້າແຂວງໄຊສົມບູນ, ມີທ່ານ ຕົ່ງມົວ ຊົວໂກ້, ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງ, ທ່ານ ບຸນກອງ ຊົ່ງປ່າຢິ້ງ, ເຈົ້າເມືອງ-ເມືອງລ້ອງຊານ, ມີຫ້ອງການຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເມືອງ ພ້ອມດ້ວຍນາຍບ້ານ-ບ້ານນໍ້າຍິ້ງ, ນ້ອງນ້ອຍນັກຮຽນ, ໄວໜຸ່ມເຍົາວະຊົນ ແລະ ພໍ່ແມ່ປະຊາຊົນ ພາຍໃນບ້ານບ້ານ ເຂົ້າຮ່ວມ.

ໂອກາດນີ້ ທ່ານ ໂກຊົ່ງ ຕົ່ງນາມະວົງ, ເລຂາພັກບ້ານ, ນາຍບ້ານ-ບ້ານນໍ້າຍິ້ງ ໄດ້ຂຶ້ນຜ່ານບົດສະຫຼຸບວຽກງານຮອບດ້ານ ປະຈຳປີ 2019 ແລະ ທິດທາງແຜນການ ປີ 2020. ບ້ານນໍ້າຍິ້ງ ແມ່ນບ້ານໜຶ່ງໃນຈຳນວນ 25 ບ້ານຂອງເມືອງລ້ອງຊານ ຊຶ່ງຫ່າງຈາກສຳນັກງານປົກຄອງເມືອງປະມານ 25 ກິໂລແມັດ, ມີ 119 ຫຼັງຄາເຮືອນ, 119 ຄອບຄົວ, ມີປະຊາກອນ ທັງໝົດ 780 ຄົນ, ຍິງ 405 ຄົນ ໂດຍແມ່ນເຜົ່າມົ້ງ, ຖືສາສະໜາບັນພະບູລຸດ 111 ຄອບຄົວ ແລະ ສາສະໜາຄຣິດ 8 ຄອບຄົວ. ຊຶ່ງປະຊາຊົນາຍໃນບ້ານໄດ້ຢຶດຖືການເຮັດນາ, ປູກຢາງພາລາ ເປັນອາຊີບຕົ້ນຕໍ ແລະ ລ້ຽງສັດ ເປັນອາຊີບສຳຮອງ. ນໍ້າຍິ້ງມີເນື້ອທີ່ທັງໝົດ 401,37 ເຮັກຕາ, ໃນນີ້ ເນື້ອທີ່ດິນທຳການຜະລິດ 381,82 ເຮັກຕາ, ດິນປ່າສັກສິດ 1 ເຮັກຕາ, ດິນປຸກສ້າງ 8,55 ເຮັກຕາ ແລະ ເນື້ອທີ່ປ່າຊົມໃຊ້ 10 ເຮັກຕາ. ພ້ອມນີ້ ປະຊາຊົນບ້ານນໍ້າຍິ່ງໄດ້ມີມູນເຊື້ອສາມັກຄີ, ຮັກແພງຊ່ວຍເຫຼືອເຊິ່ງກັນ ແລະ ກັນ ທັງມີຄວາມດຸໝັ່ນ, ມີຫົວຄິດປະດິດສ້າງ ໃນການປະກອບອາຊີບທີ່ໝັ້ນທ່ຽງ. ຄຽງຄູ່ກັນນັ້ນ ບ້ານນໍ້າຍິ້ງໄດ້ມີການຈັດຕັ້ງຄົບຊຸດ, ມີພະນັກງານກໍ່ສ້າງຮາກຖານກຸ່ມ ບ້ານນາໂພຊຽງມີ ທີ່ ໃກ້ຊິດຕິດແທດ ໃນການຊີ້ນຳ-ນຳພາ ການຈັດຕັ້ງປະຕິບັດວຽກງານຂອງບ້ານ ພ້ອມທັງມີໜ່ວຍພັກ ແລະ ເຖົ້າແກ່ອາວຸໂສ ເປັນທີ່ປຶກສາໃຫ້ແກ່ການເຄື່ອນໄຫວວຽກງານ ຂອງອຳນາດການປົກຄອງບ້ານ ແລະ ປະຊາຊົນ ກໍມີຄວາມເປັນເຈົ້າການສູງ ຕໍ່ການປະກອບສ່ວນ ໃນວຽກງານຕ່າງໆຂອງບ້ານ ຢ່າງຫ້າວຫັນ ແລະ ແຂງແຮງ. ຈາກນັ້ນ ທ່ານ ແດງ ປະທຸມທອງ, ຮອງເຈົ້າແຂວງໄຊສົມບູນ ໄດ້ມອບໃບຢັ້ງຢືນບ້ານວັດທະນະທຳ ໃຫ້ແກ່ບ້ານດັ່ງກ່າວ ຢ່າງເປັນທາງການ.

ໂອກາດນີ້ ທ່ານຮອງເຈົ້າແຂວງໄດ້ໂອ້ລົມຕໍ່ພິທີ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະພັກ-ຄະນະນຳ ຂອງບ້ານ ກໍຄືທຸກພາກສ່ວນທີ່ກ່ຽວຂ້ອງ ທີ່ໄດ້ສຸມທຸກສະຕິປັນຍາ ເຂົ້າໃນການເຄື່ອນໄຫວວຽກງານຮອບດ້ານ ໂດຍສະເພາະ ແມ່ນປະຕິບັດແຜນການສ້າງຄອບຄົວວັດທະນະທຳ ແລະ ບ້ານວັດທະນະທຳ ຊຶ່ງເຮັດເຮັດບ້ານມີຄວາມສະຫງົບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ ຢ່າງໜັກແໜ້ນ. ພ້ອມນີ້ ທ່ານໄດ້ຮຽກຮ້ອງມາຍັງອຳນາດການປົກຄອງບ້ານ ແລະ ພໍ່ແມ່ປະຊາຊົນທຸກທົ່ວໜ້າ ຈົ່ງພ້ອມກັນພັດທະນາເສດຖະກິດສັງຄົມຂອງບ້ານ ໃຫ້ມີບາດກ້າວຂະຫຍາຍຕົວ ຢ່າງຕໍ່ເນື່ອງ ໂດຍຕິດພັນກັບການປັງປຸງຄວາມສາມັກຄີເປັນເອກະພາບ ພາຍໃນບ້ານ ກໍຄືບັນດາໜ່ວຍສາມັກມັກຄີ ໃຫ້ໜັກແໜ້ນ, ສ້າງໃຫ້ໄດ້ບຸກຄົນ, ຄອບຄົວ ທີ່ດີເດັ່ນ ໄປຄຽງຄູ່ກັບການແກ້ໄຂຊີວິດການເປັນຢູ່ຂອງຕົນໃຫ້ດີຂຶ້ນ ຕາມແນວທາງນະໂຍບາຍຂອງພັກ ແລະ ລັດຖະບານ ໂດຍສຸມໃສ່ການປູກຝັງ-ລ້ຽງສັດ ໃຫ້ເປັນຂະບວນການກວ້າງຂວາງ.

ຂະນະດຽວກັນ ກໍຕ້ອງໄດ້ສຸມໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອຕ້ານ ແລະ ສະກັດກັ້ນ ທຸກໜໍ່ແໜງທີ່ກໍ່ໃຫ້ເກີດປະກົດການຫຍໍ້ທໍ້ ພາຍໃນບ້ານ ໃຫ້ທັນເວລາ ພ້ອມກັນສືບທອດວັດທະນະທຳ ທີ່ເປັນເອກະລັກ ແລະ ຮີດຄອງ ອັນດີງາມຂອງບ້ານ ໃຫ້ມີຄວາມຍືນຍົງ ທັງປົກປັກຮັກສານາມມະຍົດບ້ານວັດທະນະທຳ ໃຫ້ຄຽງຄູ່ກັບບ້ານນໍ້ຍິ້ງຕະຫຼອດໄປ. ໂອກາດດັ່ງກ່າວ ຄະນະປະທາ ແລະ ແຂກທັງໝົດ ໄດ້ເຂົ້າຮ່ວມລັ່ນຄ້ອງ 9 ບາດ ແລະ ເປີດປ້າຍບ້ານວັດທະນະທຳ ຢ່າງເປັນທັງການ. ຈາກນັ້ນ ໄດ້ມີພິທີບາສີສູ່ຂວັນ ເພື່ອເປັນສິລິມຸງຄຸນ ແລະ ຊົມການສະແດງສິລະປະ-ວັນນະຄະດີ ຈາກໜ່ວຍສິລະປະ ຂອງນ້ອງນ້ອຍນັກຮຽນ ຊຶ່ງເຕັມໄປດ້ວຍບັນຍາກາດເບີກບານມ່ວນຊື່ນ ແລະ ມີຄວາມໝາຍ-ຄວາມສຳຄັນ.

MediaLaos xaysomboun
ຂ່າວ-ພາບ: ຈິນລະວອນ ວໍລະສົມບູນ