ກອງປະຊຸມໃຫຍ່ຄັ້ງທີ II ຂອງອົງຄະນະພັກເມືອງໂພນທອງ ແຂວງຫຼວງພະບາງ ໄດ້ໄຂຂຶ້ນຢ່າງເປັນທາງການ ໃນວັນທີ 29 ມັງກອນ 2020 ທີ່ສະໂມສອນໃຫຍ່ຂອງເມືອງ ໂດຍການເປັນປະທານຂອງສະຫາຍ ຄຳຂັນ ຈັນທະວີສຸກ ກຳມະການສູນກາງພັກ,ເລຂາພັກແຂວງ ເຈົ້າແຂວງຫລວງພະບາງ ມີຄະນະປະຈຳພັກແຂວງ,ບັນດາເຈົ້າເມືອງອ້ອມຂ້າງ ແລະ ແຂກຖືກເຊິນ ພ້ອມດ້ວຍບັນດາຜູ້ແທນສະມາຊິກພັກທົ່ວເມືອງເຂົ້າຮ່ວມ 77 ສະຫາຍ,ຍິງ 2 ສະຫາຍ.

ເວລາ 6.00 ໂມງ ການນຳຂອງເມືອງ ໄດ້ເຂົ້າວາງກະຕ່າດອກໄມ້ ຢູ່ອານຸສາວະລີປະທານໄກສອນ ພົມວິຫານ ຜູ້ນຳທີ່ເຄົາລົບຮັກຂອງປະຊາຊົນລາວ,ຈາກນັ້ນສະຫາຍ ສົມມາລີ ຄຳເກັ່ງ ເລຂາພັກເມືອງ ໄດ້ກ່າວໄຂກອງປະຊຸມຂື້ນຢ່າງເປັນທາງການ.ພ້ອມທັງຜ່ານບົດລາຍງານການເມືອງ ຈາກນັ້ນໃນວະລະກອງປະຊຸມ ຈະໄດ້ຜ່ານບົດລາຍງານການເມືອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໄລຍະຜ່ານມາ.

ຕີລາຄາຜົນສາເລັດຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ,ມະຕິ VII ຂອງອົງຄະນະພັກແຂວງ ແລະ ມະຕິ I ຂອງອົງຄະນະພັກເມືອງ,ນອກນີ້ຜູ້ແທນກອງປະຊຸມຍັງຈະໄດ້ສຸມໃສ່ຄົ້ນຄ້ວາ,ພິຈາລະນາ ແລະ ປະກອບຄວາມຄິດເຫັນໃສ່ບັນດາຂົງເຂດວຽກງານພາຍໃນເມືອງໄລຍະຜ່ານມາ,ພິຈາລະນາຮັບຮອງເອົາແຜນພັດທະນາເສດຖະກິດ-ສັງຄົມໄລຍະ 5 ປີ,ຕາງໜ້າຄອບຄົວຕົວແບບດ້ານການປູກຝັງ ແລະ ຕົວແບບດ້ານການລ້ຽງສັດ ຂື້ນປະກອບຄໍາເຫັນ ແລະ ກອງປະຊຸມຄັ້ງນີ້ຍັງຈະໄດ້ປ່ອນບັດຄັດເລືອກເອົາຄະນະບລິຫານງານພັກເມືອງຊຸດໃໝ່ ພ້ອມທັງຮັບຟັງການຊີ້ນຳຈາກສະຫາຍ ຄຳຂັນ ຈັນທະວີສຸກ ເລຂາພັກແຂວງ ແລະ ເພື່ອໃຫ້ກອງປະຊຸມມີຄວາມຟົດຟື້ນນັ້ນ ບັນດາກ້ອນກໍາລັງຕ່າງໆກໍ່ໄດ້ເຂົ້າອວຍພອນ ເປັນຕົ້ນແມ່ນກ້ອນກຳລັງປະກອບອາວຸດ,ຊາວຫນຸ່ມເຍົາວະຊົນ ແລະ ກ້ອນກຳລັງກຸ່ມພັກພະນັກງານຕື່ມອີກ.

ຂ່າວ: ເພັດສາຄອນ ສິມມະວົງ
LuangprabangNews