ປະຕິບັດຕາມລັດຖະດຳລັດຂອງປະທານປະເທດ ສ ປ ປ ລາວ ວ່າດ້ວຍການໃຫ້ອະໄພຍະໂທດແກ່ນັກໂທດທີ່ມີຄວາມກ້າວໜ້າໃນຂອບເຂດທົ່ວປະເທດ ເນື່ອງໃນໂອກາດວັນຊາດທີ 2 ທັນວາ 2019 ຄົບຮອບ 44 ປີ.ອີງຕາມລັດຖະທຳມະນູນແຫ່ງ ສ ປ ປ ລາວ ໝວດVIມາດຕາ67,ຂໍ້12ກ່ຽວກັບການຕົກລົງໃຫ້ອະໄພຍະໂທດ.ໃນວັນທີ 28ມັງກອນ 2020 ນີ້ແຂວງສ.ຂໄດ້ຈັດພິທີປະກາດອະໄພຍະໂທດແກ່ນັກໂທດທີ່ມີຄວາມກ້າວໜ້າທີ່ຄ້າຍຄຸມຂັງແກ້ງຄັນເມືອງເຊໂປນ.ໂດຍມີທ່ານ ປອ ໂພໄຊ ໄຊຍະສອນ ກຳມະການສຳຮອງສູນກາງພັກ ຮອງເລຂາພັກແຂວງ ຮອງເຈົ້າແຂວງສ.ຂ,ບັນດາທ່ານເຈົ້າເມືອງ, ຮອງເຈົ້າເມືອງຕ່າງໆ,ຫົວໜ້າກອງບັນຊາການປກສເມືອງໃນທົ່ວແຂວງ,ພິເສດຍັງມີທ່ານກົງສູນໃຫຍ່ ສສ ຫວຽດນາມ ປະຈຳແຂວງເຂົ້າຮ່ວມ.

ເຊິ່ງໃນລັດຖະດຳລັດຂອງທ່ານປະທານປະເທດ ສ ປ ປ ລາວ ໄດ້ຕົກລົງໃຫ້ອະໄພຍະໂທດຫຼຸດຜ່ອນໂທດແລະປ່ອຍຕົວນັກໂທດໃນທົ່ວປະເທດຈຳນວນ 2.146ຄົນ.ຍິງ347ຄົນ,ມີຄົນຕ່າງປະເທດ39ຄົນ,ຍິງ2ຄົນ;ໃນນີ້ອະໄພຍະໂທດຫຼຸດຜ່ອນໂທດ 1.824ຄົນ,ນັກໂທດຕະຫຼອດຊີວິດໄດ້ຮັບການອະໄພຍະໂທດຫຼຸດຜ່ອນໂທດມາເປັນໂທດກຳນົດ 20ປີ ມີ45ຄົນ,ຍິງ3ຄົນ..ນັກໂທດອະໄພຍະໂທດປ່ອຍຕົວມີ 322 ຄົນ,ສຳລັບແຂວງສະຫວັນນະເຂດ ຈຳນວນນັກໂທດທີ່ສະເໜີອະໄພຍະໂທດຜ່ອນໂທດແລະປ່ອຍຕົວໃນປີ2019 ມີ462ຄົນ,ຍິງ 71ຄົນ ໃນນີ້ນັກໂທດໄດ້ຮັບການອະໄພຍະໂທດປ່ອຍຕົວມີຈໍານວນ 92ຄົນ ຄົນ,ໄດ້ຮັບການອະໄພຍະໂທດຫຼຸດຜ່ອນໂທດ 370ຄົນ ຍິງ 54ຄົນ,ໃນນີ້ໄດ້ຮັບການອະໄພຍະໂທດຫຼຸດຜ່ອນໂທດຈາກຕະຫຼອດຊີວິດ ມາເປັນໂທດມີກຳນົດ20ປີ ມີ13ຄົນ.ເຊິ່ງຂໍ້ກ່າວຫາໃນການກະທຳຜິດສ່ວນໃຫຍ່ກໍ່ຍັງແມ່ນເລື່ອງຢາເສບຕິດ.
ໃນໂອກາດເຂົ້າຮ່ວມພິທີ ທ່ານ ປອ ໂພໄຊ ໄຊຍະສອນມີຄຳເຫັນວ່າ ການລົງໂທດຕໍ່ນັກໂທດ ບໍ່ແມ່ນເປັນການທໍລະມານຄົນ ຫຼືກັກຂັງໜ່ວງໜ່ຽວແບບໄຮ້ມະນຸດສະທຳ ແຕ່ເປັນການປາບພະຍາດແນວຄິດທີ່ບໍ່ດີ ເພື່ອກອບກູ້ເອົາຊີວິດຂອງຜູ້ຫຼົງຜິດ ໃຫ້ກາຍມາເປັນພົລະເມືອງດີ,ກັບຄືນເມືອຢູ່ກັບຄອບຄົວຢ່າງອົບອຸ່ນແລະສ້າງສາພັດທະນາຄອບຄົວ,ດຳລົງຊີວິດຢູ່ໃນສັງຄົມຢ່າງປອດໃສ. ,ຮຽກຮ້ອງໃຫ້ຜູ້ທີ່ໄດ້ຮັບການປ່ອຍຕົວ ໄດ້ຫັນປ່ຽນແນວຄິດຈິດໃຈ ປະຖິ້ມໃນການກະທຳທີ່ບໍ່ດີ,ຕ້ອງທຳມາຫາກິນດ້ວຍຄວາມບໍລິສຸດສັດຊື່,ສິ່ງໃດທີ່ບໍ່ດີ ການກະທຳທີ່ເປັນການລະເມີດກົດໝາຍ,ຮີດຄອງປະເພນີອັນດີງາມຂອງຊາດ ແມ່ນຫ້າມເດັດຂາດ,ສ່ວນຜູ້ທີ່ໄດ້ຮັບການຜ່ອນໂທດ ກໍ່ໃຫ້ເອົາໃຈໃສ່ສ້າງຜົນງານ,ປະຕິບັດລະບຽບກົດໝາຍ,ເປັນແບບຢ່າງໃນການອອກແຮງງານ,ເຄົາລົບເຈົ້າໜ້າທີ່ ບໍ່ໃຫ້ມີແນວຄິດເຕັ້ນໂຕນໂຍນໜີ ເພື່ອໃຫ້ມີໂອກາດໄດ້ຮັບການຜ່ອນໂທດໃນປີຕໍ່ໄປ.ຮຽກຮ້ອງໃຫ້ພໍ່ແມ່ ພີ່ນ້ອງ,ອຳນາດການປົກຄອງເມືອງ,ບ້ານ,ເຈົ້າໜ້າທີ່ ປກສກຸ່ມ,ປກສເມືອງ ບ່ອນນັກໂທດອາໃສຢູ່ ຕ້ອງມີການຕິດຕາມ ກວດກາ ພຶດຕິກຳ ການປະພຶດການກະທຳຂອງນັກໂທດທີ່ໄດ້ຮັບການປ່ອຍຕົວ,ເອົາໃຈໃສ່ສຶກສາອົບຮົມ ເພື່ອໃຫ້ເຂົາເຈົ້າມີຄວາມເຂົ້າໃຈກ່ຽວກັບແນວທາງນະໂຍບາຍຂອງພັກ ແລະກົດໝາຍຂອງບ້ານເມືອງ ເປັນດີຂອງຄອບຄົວແລະຂອງສັງຄົມຕໍ່ໄປ.

savannakhet medialaos