ວັນທີ 29 ມັງກອນ 2020 ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ) ແຂວງເຊກອງ ໄດ້ຈັດກອງປະຊຸມ ປາຖະກະຖາເຊື່ອມຊຶມມູນເຊື້ອວັນສ້າງຕັ້ງສະຫະພັນກໍາມະບານລາວຄົບຮອບ64ປີ (1 ກຸມພາ 1956-1 ກຸມພາ 2020) ໂດຍການເປັນປະທານຂອງທ່ານ ສົມພອນ ສີລາສັກ ຄະນະພັກຮາກຖານ, ປະທານກໍາມະບານຮາກຖານພະແນກ ຖວທ ແຂວງ ແລະເຂົ້າຮ່ວມຮັບຟັງມີທ່ານ ບຸນທົງ ຖິ່ນດອນໂຂງ ຮອງເລຂາຄະນະພັກຮາກຖານ, ຮອງຫົວໜ້າພະແນກ ຖວທ; ພ້ອມນີ້ ກໍມີຄະນະພັກຮາກຖານ, ຄະນະໜ່ວຍພັກ, ຮອງຫົວໜ້າພະແນກ, ສະມາຊິກກໍາມະບານ ແລະ ພະນັກງານ-ລັດຖະກອນທົ່ວຂະແໜງ ຖວທ ເຂົ້າຮ່ວມ.

ທ່ານ ສົມພອນ ສີລາສັກ ປະທານກໍາມະບານຮາກຖານພະແນກ ຖວທ ແຂວງ ໄດ້ຍົກໃຫ້ເຫັນເຖິງສະພາບແວດລ້ອມທີ່ພາໃຫ້ມີອົງການຈັດຕັ້ງກຳມະບານລາວ, ການເຕີບໃຫຍ່ຂະຫຍາຍຕົວ ແລະການຕໍ່ສູ້ທີ່ຍືດເຍື້ອຍາວນານຂອງພັກຕ້ານກັບຈັກກະພັດຜູ້ຮຸກຮານ, ຍ້ອນທົນຕໍ່ການກົດຂີ່ຂູດຮີດຂອງພວກລ່າເມືອງຂຶ້ນ ແລະພວກສັກດິນາປະຕິການບໍ່ໄດ້, ກຳມະກອນຊາວຜູ້ອອກແຮງງານ ແລະປະຊາຊົນລາວບັນດາເຜົ່າ ຈຶ່ງໄດ້ພ້ອມກັນລຸກຂຶ້ນຕໍ່ສູ້ຢ່າງອົງອາດກ້າຫານໃນຫຼາຍໆຄັ້ງ, ເພື່ອເຕົ້າໂຮມຄວາມສາມັກຄີໃນໝູ່ຊົນຊັ້ນກຳມະກອນ ແລະຊາວຜູ້ອອກແຮງງານລາວບັນດາເຜົ່າຕໍ່ສູ້ ເພື່ອທວງເອົາສິດຜົນປະ ໂຫຍດອັນຊອບທຳທາງດ້ານເສດຖະກິດ-ສັງຄົມ ແລະຂະບວນການຕໍ່ສູ້ກໍ່ເຫັນວ່າມີຖ່ວງທ່າໄດ້ຮັບໄຊຊະນະຂຶ້ນໄປເລື້ອຍໆສາມາດຍາດເອົາເອກະລາດແຫ່ງຊາດ ແລະອິດສາລະພາບອັນແທ້ຈິງມາສູ່ປະຊາຊົນລາວບັນດາເຜົ່າໃນປັດຈຸບັນ.

ໂອກາດດຽວກັນ, ທ່ານ ສົມບູນ ສີສົມພອນ ຮອງປະທານກໍາມະບານຮາກຖານພະແນກ ຖວທ ແຂວງ ກໍໄດ້ຂຶ້ນຜ່ານບົດສະຫຼຸບການເຄື່ອນໄຫວຊີ້ນໍາໆພາຂອງກໍາມະບານຮາກຖານພະແນກ ຖວທ ແຂວງໃນປີ 2019 ຜ່ານມາ ແລະທິດທາງແຜນການໃນຕໍ່ໜ້າວ່າ: ກໍາມະບານຮາກຖານພະແນກ ຖວທ ແຂວງມີ 3 ໜ່ວຍຂຶ້ນກັບ, ມີສະມາຊິກທັງໝົດ 71 ສະຫາຍ, ຍິງ 30 ສະຫາຍ, ການເຄື່ອນໄຫວວຽກງານຜ່ານມາ ແມ່ນສາມາດຍາດໄດ້ຜົນສໍາເລັດຫຼາຍໆດ້ານ ໂດຍສະເພາະແມ່ນການປະຕິບັດຂໍ້ແຂ່ງຂັນ 5 ເປັນເຈົ້າມີສະມາຊິກດີເດັ່ນປະເພດ I ຈໍານວນ 57 ສະຫາຍກວມເອົາ 80,28%; ດີເດັ່ນປະເພດ II ມີ 9 ສະຫາຍກວມເອົາ 12,67% ແລະປະເພດ III ມີ 2 ສະຫາຍກວມເອົາ 2,81% ຂອງສະມາຊິກທັງໝົດ.

ຂ່າວ : ສັນຍາ