ໃນຕອນເຊົ້າຂອງວັນທີ 23 ສິງຫາ 2019ນີ້ຢູ່ທີ່ຫ້ອງປະຊຸມຂອງຫ້ອງວ່າການປົກຄອງເມືອງນອງ ແຂວງສະຫວັນນະເຂດ ໄດ້ຈັດພິທີປະກາດການຈັດຕັ້ງ ການນຳຂອງເມືອງນອງ ໂດຍການເຂົ້າຮ່ວມເປັນປະທານ ຂອງທ່ານ ວົງເພັດ ໄຊສະຫງວນ ຮອງເລຂາຄະນະບໍລິຫານງານພັກແຂວງ ຫົວໜ້າຄະນະໂຄສະນາອົບຮົມແຂວງສະຫວັນນະເຂດ, ທ່ານ ທອງໃສ ໄຊຍະວົງຄຳດີ ຫົວໜ້າ ເຂດເສດຖະກິດພິເສດ ສະຫວັນ-ເຊໂນ ພ້ອມທິມງານທີ່ມາຈາກແຂວງ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ກຳລັງ ປກສ-ປກຊ ແລະຈຸດສຸມກຸ່ມບ້ານໃນທົ່ວເມືອງເຂົ້າຮ່ວມ.

ໃນພິທີ ທ່ານ ສຸດໃຈ ໄຊຍະວົງ ຮອງຄະນະຈັດຕັ້ງແຂວງກໍ່ໄດ້ຂຶ້ນຜ່ານ ຂໍ້ຕົກລົງ ຂອງທ່ານເຈົ້າແຂວງສະບັບເລກທີ 1293/ຈຂ.ສຂ ລົງວັນທີ 5 ສິງຫາ 2019 ວ່າດ້ວຍການແຕ່ງຕັ້ງພະນັກງານ, ຜ່ານຂໍ້ຕົກລົງ ຂອງທ່ານເຈົ້າແຂວງເລກທີ 1298/ຈຂ.ສຂ, ລົງວັນທີ 5 ສິງຫາ 2019 ວ່າດ້ວຍການຍົກຍ້າຍພະນັກງານ ແລະ ຜ່ານມະຕິຕົກລົງ ຂອງທ່ານເຈົ້າແຂວງ ເລກທີ 1163/ຄປພ.ສຂ ລົງວັນທີ 7 ສິງຫາ 2019 ຂອງຄະນະປະຈຳພັກແຂວງສະຫວັນນະເຂດ ວ່າດ້ວຍການແຕ່ງຕັ້ງຜູ້ວ່າການເລຂາພັກເມືອງໆນອງ. ຈາກນັ້ນ ທ່ານ ລຳແກ້ວ ແສງໜູທອງ ຜູ້ວ່າການເລຂາພັກເມືອງໆນອງ ກໍ່ຂຶ້ນຮັບຄຳໂອວາດໂດຍທ່ານກໍ່ໄດ້ກ່າວຄຳປະຕິຍານຕົນໃນຊ່ວງວ່າການພ້ອມທັງໃຫ້ ພະນັກງານການນຳ ຫຼັກແຫຼ່ງພາຍໃນເມືອງຕະຫຼອດຮອດພໍ່ແມ່ປະຊາຊົນລາວບັນດາເຜົ່າພາຍໃນເມືອ ງຈົ່ງພ້ອມພາກັນຜ່າພັນອຸປະສັກໄປພ້ອມໆກັນຈາກນັ້ນກໍ່ໄດ້ເຊັນບົດບັນທຶກມອບວຽກເຊິ່ງກັນແລະກັນ ແລະທ່ານ ທອງໃສ ໄຊຍະວົງຄຳດີ ກໍ່ຍັງໄດ້ມອບເຄື່ອງ ຄອມພີວເຕີ້ໃຫ້ທາງການນຳເມືອງນອງຈຳນວນ 1ຊຸດ ເພື່ອນຳໃຊ້ເຂົ້າໃນວຽກງານ. ໂອກາດດັ່ງກ່າວກໍ່ໄດ້ຮັບຟັງຄໍາໂອ້ລົມ ຂອງທ່ານ ວົງເພັດ ໄຊສະຫງວນ ຮອງເລຂາພັກແຂວງ ຫົວໜ້າຄະນະໂຄສະນາອົບຮົມແຂວງ ໂດຍທ່ານໄດ້ເນັ້ນໜັກຈຸດປະສົງອັນຫຼັກໆ ກໍ່ຄືໃຫ້ເຕົ້າໂຮມຄວາມສາມັກຄີເປັນກົກ ສືບຕໍ່ມູນເຊື້ອອັນດີງາມຂອງເມືອງໄວ້, ພ້ອມພາກັນສ້າງສາພັດທະນາເມືອງນອງໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ ແລະປະຕິບັດລະບຽບກົດໝາຍທາງຂັ້ນເທິງວາງອອກ ເພື່ອເຮັດໃຫ້ສັງຄົມບ້ານເມືອງມີຄວາມສະຫງົບສຸກ.