ກອງປະຊຸມໃຫຍ່ຜູ້ແທນອົງຄະນະພັກເມືອງບາຈຽງຈະເລີນສຸກຄັ້ງທີ VIII ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 30 ມັງກອນ​ 2020ນີ້ ຢູ່ທີ່ສະໂມສອນຂອງເມືອງ. ໂດຍການໃຫ້ກຽດເຂົ້າຮ່ວມຂອງ ສະຫາຍ ປອ. ບຸນຖອງ ດີວິໄຊ ກຳມະການສູນກາງພັກ ເລຂາຄະນະບໍລິຫານງານພັກແຂວງ #ເຈົ້າແຂວງໆຈຳປາສັກ, ມີ ສະຫາຍ ເມກສະຫວັນ ພົມພິທັກ ຮອງເລຂາພັກແຂວງ ປະທານສະພາປະຊາຊົນແຂວງຈຳປາສັກ,ສະຫາຍ ນິພອນ ວຽງປະເສີດ ຮອງເລຂາຄະນະບໍລິຫານງານພັກແຂວງ ຫົວໜ້າຄະນະຈັດຕັ້ງແຂວງ,​ມີບັນດາຄະນະບໍລິຫານງານພັກແຂວງ, ຄະນະບໍລິຫານງານພັກເມືອງ, 8 ເມືອງ, 1 ນະຄອນ, ພະແນກການກົມກອງອ້ອມຂ້າງແຂວງ,ພະນັກງານປະຕິວັດອາວຸໂສບໍານານ,ຜູ້ຊົງຄຸນວຸດທິ ແລະຜູ້ແທນສົມບູນທີ່ຕາງໜ້າຈາກຮາກຖານພັກທົ່ວເມືອງ 1.800 ກ່ວາສະຫາຍ ເຂົ້າຮ່ວມ 165 ສະຫາຍ,​ຍິງ​ 11 ສະຫາຍ.​

ໃນກອງປະຊຸມໃຫຍ່ຄັ້ງນີ້ ສະຫາຍ​ ໂສມ ບຸດຕະກຸນ ກໍາມະການພັກແຂວງ ເລຂາພັກເມືອງ​ເຈົ້າເມືອງໆບາຈຽງຈະເລີນສຸກ ໄດ້ກ່າວໄຂກອງປະຊຸມຢ່າງເປັນທາງການໂດຍກ່າວວ່າ: ການດຳເນີນກອງປະຊຸມໃຫຍ່ ຄັ້ງທີ VIII ຂອງຜູ້ແທນອົງຄະນະພັກເມືອງບາຈຽງຈະເລີນສຸກແມ່ນມີຄວາມໝາຍ,ຄວາມສຳຄັນຫຼາຍເພາະໄດ້ຈັດຕັ້ງປະຕິບັດຕາມກົດລະບຽບຂອງພັກກໍຄືຫຼັກການ ແລະ ທິດນຳໃນການກໍ່ສ້າງພັກໃຫ້ມີຄວາມເຕີບໃຫຍ່ພ້ອມທັງມີຄວາມປອດໄສ,ເຂັ້ມແຂງ,ໜັກແໜນ. ຜູ້ແທນກອງປະຊຸມໃຫຍ່ຈະໄດ້ພ້ອມກັນຄົ້ນຄວ້າຮັບຮອງເອົາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກເມືອງສະໄໝທີ VIII, ເລືອກເອົາຄະນະບໍລິຫານງານພັກເມືອງຊຸດໃໝ່ ເພື່ອເປັນແກນນຳຂອງອົງຄະນະພັກທີ່ຈະນຳພາຜັນຂະຫຍາຍມະຕິຂອງພັກ ແລະ ປະຕິບັດແຜນພັດທະນາເສດຖະກິດ-ສັງຄົມຕະຫຼອດສະໄໝທີ VIII (ແຕ່ປີ 2020-2024) ໃຫ້ປະກົດຜົນເປັນຈິງ.

ຈາກນີ້ ສະຫາຍ​ ໂສມ ບຸດຕະກຸນ ເລຂາພັກເມືອງ ເຈົ້າເມືອງໆ​ບາຈຽງຈະເລີນສຸກ ຍັງໄດ້ຜ່ານບົດລາຍງານການເມືອງທັງສອງພາກຍົກໃຫ້ເຫັນຜົນງານອັນພົ້ນເດັ່ນໃນການນໍາພາໄລຍະ 5 ປີຜ່ານມາແຕ່ປີ 2015-2019 ໂດຍຍົກໃຫ້ເຫັນທົ່ວເມືອງມີຄວາມເປັນລະບຽບຮຽບຮອຍ,ມີສະຖຽນລະພາບທາງດ້ານການເມືອງທີ່ໜັກແໜ້ນຮັບປະກັນຄວາມສະຫງົບໂດຍພື້ນຖານ,ດ້ານເສດຖະກິດ-ສັງຄົມ ສືບຕໍ່ຂະຫຍາຍຕົວຢ່າງຕໍ່ເນື່ອງສາມາດບັນລຸຄາດໜາຍທີ່ວາງໄວ້ ລວມຍອດຜະລິດຕະພັນພາຍໃນ 5 ປີບັນລຸໄດ້ 4.301 ຕື້ກ່ວາກີບ,ລື່ນແຜນມະຕິ VII ຂອງເມືອງ 53% ອັດຕາການຂະຫຍາຍເສດຖະກິດສະເລ່ຍ 8, 58 % ຕໍ່ປີ.ສະເລ່ຍລາຍຮັບຕໍ່ຫົວຄົນໄດ້ 15.155.500 ກີບ ຫຼື ເທົ່າກັບ 1.783 ໂດລາສະຫະລັດ ຕໍ່ຄົນຕໍ່ປີ,ທຽບໃສປີ 2014 ເພີ່ມຂື້ນ 555 ໂດລາສະຫະລັດ ຕໍ່ຄົນຕໍ່ປີ ສະເພາະໃນປີ 2019 ບັນລຸໄດ້ 1.103,62 ຕື້ກີບ, ໂດຍສະເລ່ຍລາຍຮັບຕໍ່ຄົນຕໍ່ປີບັນລຸໄດ້ 18.105.000 ກີບຕໍ່ຄົນຕໍ່ປີ ຫຼື ເທົ່າກັບ 2.130 ໂດລາສະຫະລັດ,ທຽບໃສ່ປີ 2014 ເພີ່ມຂື້ນ 902 ໂດລາສະຫະລັດ ຕໍ່ຄົນຕໍ່ປີ,ເຊີ່ງໂຄງປະກອບເສດຖະກິດ:ໃນນີ້ກະສີກຳກວມເອົາ 65,19 % ອຸດສະຫະກຳກວມ 18,04 % ແລະ ການບໍລິການກວມ 16,77 % ຂອງລວມຍອດລາຍຮັບພາຍໃນເມືອງ.

ນອກຈາກນັ້ນໃນກອງປະຊຸມຄັ້ງນີ້ ສະຫາຍ ສົມລິດ ປັນທະບົວສີ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງບາຈຽງຈະເລີນສຸກ ຍັງໄດ້ຜ່ານບົດສະຫຼຸບແຜນພັດທະນະເສດຖະກິດ-ສັງຄົມ 5 ປີຜ່ານມາ ແລະ ທິດທາງແຜນການ ພັດທະນາເສດຖະກິດ-ສັງຄົມ 5 ປີຕໍ່ໜ້າ 2020-2024 ແລະ ການປະກອບຄໍາຄິດຄໍາເຫັນຂອງພາກສ່ວນຕ່າງໆເຊັ່ນ: ຫ້ອງການໆເງີນເມືອງໃນຫົວຂໍ້: ການຈັດເກັບລາຍຮັບເຂົ້າງົບປະມານ ແລະ ການຄຸ້ມຄອງລາຍຈ່າຍງົບປະມານ, ການປະກອບຄຳເຫັນ ຄອບຄົວຕົວແບບຫົວຂໍ້ ສິນຄ້າ( ODOP ) ຫັດຖະກຳຕຳຜ້າໄໜ. ການປະກອບຄໍາເຫັນຂອງຄອບຄົວຕົວແບບການປູກຢາງພາລາເປັນສິນຄ້າ, ປະກອບຄຳເຫັນໜ່ວຍພັກບ້ານປາຫຼາຍໃນຫົວຂໍ້ການນຳພາສ້າງບ້ານກາຍເປັນບ້ານພົ້ນທຸກ,ການປະກອບຄຳເຫັນຄອບຄົວຕົວແບບໃນການສ້າງເສດຖະກິດຄອບຄົວໃນການປູກພຶດແບບປະສົມປະສານເປັນສິນຄ້າ,ປະກອບຄຳເຫັນຄອບຄົວຕົວແບບໃນການປູກຖົ່ວລຽນເປັນສິນຄ້າແລະ ການປະກອບຄຳເຫັນຂອງຫ້ອງການພາຍໃນ ໃນຫົວຂໍ້ການຄຸ້ມຄອງວຽກງານບໍລິຫານລັດຕິດພັນກັບການບໍລິການປະຊາຊົນ. ເພື່ອແນໄສ່ເຮັດໃຫ້ການດໍາເນີນກອງປະຊຸມໃຫຍ່ຜູ້ແທນອົງຄະນະພັກເມືອງບາຈຽງຈະເລີນສຸກ ຄັ້ງທີ VIII ນີ້ ມີເນື້ອໃນອຸດົມສົມບູນ,ກ້ວາງຂວາງເລິກເຊິ່ງ. ກອງປະຊຸມໃຫ່ຍຜູ້ແທນອົງຄະນະພັກເມືອງບາຈຽງຈະເລີນສຸກຈະໄດ້ດຳເນີນໄປເປັນເວລາ 2 ວັນຈິ່ງຈະສຳເລັດ.

ສື່ມວນຊົນແຂວງຈຳປາສັກ
medialaos
ນ ຍໍພະກິ່ນ ແກ້ວຫາວົງ
ພາບ:ເກດສະໜາ ແກ້ວສຸວັນນະແສງ