ກອງປະຊຸມໃຫຍ່ ອົງຄະນະພັກ ເມືອງ ພູວົງ ຄັ້ງທີ V ແຂວງ ອັດຕະປື ດຳເນີນມາຮອດ ວັນທີ 30 ມັງກອນ 2020 ຖືເປັນກອງປະຊຸມທີ່ມີຄວາມໝາຍຄວາມສຳຄັນຍິ່ງ ພາຍຫລັງຄະນະບໍລິຫານງານພັກເມືອງຊຸດເກົ່າ ລາໜ້າທີ່ແລ້ວ ຈຳເປັນຕ້ອງໄດ້ກ້າວສູ່ການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເຊິ່ງຄະນະບໍລິຫານງານພັກເມືອງ ຊຸດເກົ່າທັງໝົດມີ ຈຳນວນ 23 ສະຫາຍ, ຍິງ 8 ສະຫາຍ ໃນນີ້ ບໍມີຊື່ລົງສະໝັກ 5 ສະຫາຍ ຄື: ສະຫາຍ ບຸນນາວ ຈັນດອນ ເຈົ້າເມືອງ ພູວົງ, ສະຫາຍ ພັນໂທ ບຸນຊັດ ວົງພູທອນ, ສະຫາຍ ສີພອນ ຊາວພູວົງ, ສະຫາຍ ກ້ອນສະຫວັນ ອຳມະຈັກ ແລະ ສະຫາຍ ພູທອນ ວິໄລວັນ ຍ້ອນບາງສະຫາຍຍັງຄອຍຖ້າກ້າວເຂົ້າສູ່ການພັກຜ່ອນເຂົ້າຮັບບຳນານ, ບັນຫາສຸຂະພາບ, ຖືກເສຍຊີວິດ ແລະ ບັນຫາອື່ນໆ.

ປະຕິບັດຕາມວາລະກອງປະຊຸມ ກ່ອນໄດ້ກ້າວສູ່ການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ຢ່າງເປັນທາງການ ເພື່ອເປັນບ່ອນອີງໃຫ້ຜູ້ແທນສົມບູນໄດ້ໃຊ້ສິດປະຊາທິປະໄຕຂອງຕົນຢ່າງຖືກຕ້ອງຕາມລະບຽບຂອງພັກນັ້ນ ສະຫາຍ ນາງ ມີນາພອນ ໄຊສົມພູ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ກໍ່ໄດ້ຂຶ້ນຜ່ານມາດຖານເງື່ອນໄຂຜູ້ທີ່ລົງສະໝັກເຂົ້າເປັນຄະນະບໍລິຫານງານພັກເມືອງຊຸດໃໝ່ ແລະ ມາດຖານເງື່ອນໄຂຜູ້ແທນສົມບູນລົງສະໝັກເພື່ອໄປເຂົ້າຮ່ວມກອງປະຊຸມໃຫຍ່ຂອງອົງຄະນະພັກແຂວງ ຕາມມະຕິຕົກລົງຂອງສູນກາງ ແລະ ມະຕິຕົກລົງຂອງອົງຄະນະບໍລິຫານງານພັກແຂວງ, ຄະນະບໍລິຫານງານພັກເມືອງ ພູວົງ ໃນຊຸດໃໝ່ ເທື່ອທີ V ປີ 2020-2025 ລົງສະໝັກທັງໝົດ 29 ສະຫາຍ, ຍິງ 8 ສະຫາຍ ໃນນີ້ ຈະໄດ້ປ່ອນບັດຄັດເລືອກເອົາ 25 ສະຫາຍ, ປ່ອນບັດເອົາຜູ້ແທນສົມບູນໄປຮ່ວມກອງປະຊຸມໃຫຍ່ ມີຈຳນວນ 17 ຂັດເລືອກເອົາ 14 ສະຫາຍ

ໃນໂອກາດດັ່້ງກ່າວ ສະຫາຍ ເລັດ ໄຊຍະພອນ ເລຂາພັກແຂວງ ເຈົ້າແຂວງ ອັດຕະປື ໄດ້ມີຄຳເຫັນຊີ້ນຳເປັນພື້ນຖານໃນການຄົ້ນຄວ້າພິຈາລະນາ ເພື່ອຄັດເລືອກເອົາການນຳຂອງເມືອງ ຊຸດໃໝ່ ໄດ້ຕາມລະດັບຄາດໝາຍວ່າ: ບັນດາຄະນະບໍລິຫານງານພັກເມືອງທີ່ໄດ້ຮັບການປ່ອນບັດຄັດເລືອກຕາມມາດຖານໃນເທື່ອນີ້ ແມ່ນເປັນການຕັດສິນບັນຫາການພັດທະນາເສດຖະກິດ-ສັງຄົມຂອງເມືອງຫຼາຍຢ່າງ ໂດຍສະເພາະໃນ 5 ປີ ຄັ້ງໜ້າ ສືບຕໍ່ເຮັດໃຫ້ເມືອງພູວົງໄດ້ມີຄວາມເຂັ້ມແຂງທາງດ້ານອົງການຈັດຕັ້ງພັກ ແລະ ສືບຕໍ່ນຳພາອົງການຈັດຕັ້ງຂອງລັດໃນການພັດທະນາເມືອງພູວົງ ແຂວງ ອັດຕະປື ມີຄວາມເຂັ້ມແຂງນັ້ນ ບັນດາຜູ້ແທນສົມບູນຕ້ອງມີຄວາມເປັນເຈົ້າການໃນການຕັດສິນໃຈຢ່າງຮອບດ້ານ ຫຼີກລຽງຫາງສຽງທີ່ມີການປືກສາຫາລືຊວນເຊື່ອທາງດ້ານກົນອຸບາຍຂອງສັດຕູໃຫ້ຈະແຈ້ງ ຈົງມີຫຼັກໝັ້ນໃນຄວາມເປັນເຈົ້າການສ້າງໃຫ້ກຳລັງແຮງຂອງເມືອງມີຄວາມເຂັມແຂວງດ້ວຍຫຼາຍຮູບຫຼາຍສີ ແລະ ສ້າງໃຫ້ພັກໄດ້ມີຄວາມແຂງແກ່ນ ພ້ອມກັນຜ່ານຜ່າບັນຫາຄວາມຫຍຸ້ງຍາກຕ່າງໆ ນັບແຕ່ປີ 2020-2025 ໄດ້ຕາມຄາດໝາຍຈຸດປະສົງຂອງພັກວາງໄວ້.

ໂດຍ: ສາຍນ້ຳ