ກອງປະຊຸມໃຫ່ຍຜູ້ແທນອົງຄະນະພັກເມືອງເລົ່າງາມຄັ້ງທີ XII ໄດ້ໄຂຂື້ນຢ່າງເປັນທາງການ ໃນວັນທີ 29 ມັງກອນ 2020 ນີ້, ທີ່ສະໂມສອນຂອງເມືອງ ໂດຍການເປັນປະທານຂອງ ສະຫາຍ ສົມສັກ ທົງຄຳຫານ ຮັກສາການເລຂາພັກເມືອງ ຮັກສາການເຈົ້າເມືອງໆເລົ່າງາມ, ເປັນກຽດເຂົ້າຮ່ວມຂອງ ສະຫາຍ ສີສຸວັນ ວົງຈອມສີ ກຳມະການສູນກາງພັກ ເລຂາພັກແຂວງ ເຈົ້າແຂວງສາລະວັນ ແລະສະຫາຍ ບຸນທຽມ ແກ້ວໄຊຍະວົງ ​ຮອງ​ເລ​ຂາ​ພັກ​ແຂວງ ຫົວໜ້າຄະນະຈັດຕັ້ງແຂວງ, ມີບັນດາທ່ານຄະນະປະຈຳພັກເມືອງ, ກຳມະການພັກເມືອງ, ຜູ້ແທນສົມບູນ, ແຂກຖືກເຊີນຈາກເມືອງອ້ອມເຂົ້າຮ່ວມ.

ສະຫາຍ ສົມສັກ ທົງຄຳຫານ ຮັກສາການເລຂາພັກເມືອງ, ຮັກສາການເຈົ້າເມືອງໆເລົ່າງາມກໍ່ໄດ້ກ່າວວ່າ: ກອງປະຊຸມໃຫ່ຍຄັ້ງນີ້ແມ່ນໄດ້ໄຂຂື້ນທາມກາງບັນຍາກາດທີ່ທົ່ວພັກ, ທົ່ວລັດ, ທົ່ວປວງຊົນຊາວລາວ ຢູ່ໃນຄວາມເບີນບານມ່ວນຊື່ນ ຕໍ່ຜົນສຳເລັດອັນສຳຄັນ ໃນພາລະກິດປົກປັກຮັກສາ ແລະພັດທະນາເສດຖະກິດ-ສັງຄົມ,ໃນໄລຍະ 5 ປີຜ່ານມາ, ທົ່ວເມືອງແມ່ນມີສະຖຽນລະພາບ, ທາງດ້ານການເມືອງມີຄວາມໜັກແໜ້ນ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ປະຊາຊົນບັນດາເຜົ່າມີຄວາມສາມັກຄີປອງດອງເປັນປືກແຜນແໜ້ນໜາ ແລະເຊື່ອໜັ້ນຕໍ່ການນຳພາຂອງພັກ, ເສດຖະກິດ-ສັງຄົມມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ທາງດ້ານວັດຖຸ-ຈິດໃຈຂອງປະຊາຊົນໄດ້ຮັບການຍົກລະດັບດີຂື້ນເປັນກ້າວໆ, ພະນັກງານ-ສະມາຊິກພັກຈຳນວນຫຼວງຫຼາຍ ໄດ້ຮັບການບໍາລຸງກໍ່ສ້າງໃນຂະບວນການວຽກງານຕົວຈິງ ເຮັດໃຫ້ບົດບາດການນຳພາຂອງພັກໃນທົ່ວສັງຄົມໄດ້ຮັບການເຊີດຊູສູງຂື້ນ, ຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ຮັບຟັງການຜ່ານບົດລາຍງານການເມືອງ, ບົດລາຍງານການຍຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະຜ່ານມາ ແລະທິດທາງ 5 ປີຕໍ່ໜ້າ, ພ້ອມດ້ວຍບົດສຳຫຼວດການນຳພານລວມຂອງຄະນະບໍລິຫານງານພັກເມືອງ, ໃນໄລຍະຜ່ານມາເມືອງເລົ່າງາມກໍ່ໄດ້ເອົາໃຈໃສ່ໃນການຄົ້ນຄວ້າເຊື່ອມຊືມ ແລະຜັນຂະຫຍາຍມະຕິ X ຂອງສູນກາງພັກ, ມະຕິ VIII ຂອງອົງຄະນະພັກແຂວງ ແລະມະຕິ XI ຂອງອົງຄະນະພັກເມືອງ.

ພາບ-​ຂ່າວ: ສິດ​ຕາ ເພັດ​ວົງ​ສາ
medialaos salavan