ກອງປະຊຸມໃຫຍ່ອົງຄະນະພັກເມືອງສອງຄອນຄັ້ງທີ 7 ໄດ້ເປີດຂຶ້ນຢ່າງເປັນທາງການແລ້ວ

0
124

ກອງປະຊຸມໃຫຍ່ອົງຄະນະພັກເມືອງສອງຄອນຄັ້ງທີ 7 ໄດ້ໄຂຂຶ້ນຢ່າງເປັນທາງການ ໃນວັນທີ 30 ມັງກອນ 2020 ນີ້ ຢູ່ທີ່ສະໂມສອນຂອງເມືອງ. ໂດຍການເຂົ້າຂອງສະຫາຍ ປອ ໂພໄຊ ໄຊຍະສອນ ກໍາມະການສຳຮອງສູນກາງພັກ ຮອງເລຂາພັກແຂວງ ຮອງເຈົ້າແຂວງສະຫວັນນະເຂດ,ສະຫາຍ ພັອ ລຳຄູນ ວໍລະວົງ ວ່າການເລຂາພັກເມືອງ ເຈົ້າເມືອງສອງຄອນ ພ້ອມດ້ວຍບັນດາສະຫາຍຜູ້ແທນສົມບູນ ຈຳນວນ 171 ສະຫາຍ,ຍິງ 12 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກໃນທົ່ວເມືອງສອງຄອນທັງໝົດ 1.929 ສະຫາຍເຂົ້າຮ່ວມ.

ສະຫາຍ ພັອ ລຳຄູນ ວໍລະວົງ ວ່າການເລຂາພັກເມືອງ ເຈົ້າເມືອງສອງຄອນ ໄດ້ກ່າວໄຂກອງປະຊຸມໃຫຍ່ອົງຄະນະພັກເມືອງສອງຄອນຄັ້ງທີ 7 ຢ່າງເປັນທາງການວ່າ: ກອງປະຊຸມໃຫຍ່ຄັ້ງນີ້ໄດ້ໄຂຂຶ້ນໃນທ່າມກາງ ທີ່ທົ່ວອົງຄະນະພັກເມືອງ ແລະ ປະຊາຊົນບັນດາເຜົ່າຊາວເມືອງສອງຄອນ ກຳລັງເບີກບານມ່ວນຊື່ນຕໍ່ຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 6 ຂອງອົງຄະນະພັກເມືອງສອງຄອນ ກໍ່ຄືພາລະກິດປົກປັກຮັກສາ ແລະ ສ້າງສາພັດທະນາເສດຖະກິດ – ສັງຄົມຂອງເມືອງຕະຫຼອດໄລຍະ 5 ປີຜ່ານມາ. ທົ່ວເມືອງມີສະຖຽນລະພາບທາງດ້ານການເມືອງໜັກແໜ້ນ,ສັງຄົມມີຄວາມສະຫງົບປອດໄພໂດຍພື້ນຖານ,ປະຊາຊົນບັນດາເຜົ່າມີຄວາມສາມັກຄີເປັນປຶກແຜ່ນ ແລະ ເຊື່ອໝັ້ນຕໍ່ການນຳພາຂອງພັກ ເສດຖະກິດ – ສັງຄົມມີການຂະຫຍາຍຕົວຢ່າງຕໍ່ເນື່ອງ,ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ. ໂອກາດກ່າວໄຂກອງປະຊຸມຄັ້ງນີ້ ສະຫາຍ ພັອ ລຳຄູນ ວໍລະວົງ ວ່າການເລຂາພັກເມືອງ ຍັງໄດ້ຮຽກຮ້ອງມາຍັງຜູ້ແທນສົມບູນຈົ່ງພ້ອມກັນສຸມທຸກສະຕິປັນຍາຂອງຕົນເຂົ້າໃນການຄົ້ນຄວ້າເນື້ອໃນບົດລາຍງານການເມືອງກໍ່ຄືທິດທາງແຜນການພັດທະນາເສດທະກິດ – ສັງຄົມຂອງເມືອງ 5 ປີຕໍ່ໜ້າຕະຫຼອດຮອດວຽກງານຕ່າງໆ ທັງນີ້ກໍ່ເພື່ອເຮັດໃຫ້ກອງປະຊຸມໃຫຍ່ອົງຄະນະພັກເມືອງສອງຄອນຄັ້ງທີ 7 ໄດ້ດຳເນີນໄປດ້ວຍບັນຍາກາດອັນຟົດຟື້ນ ແລະ ໄດ້ຮັບຜົນສຳເລັດຢ່າງສະຫງ່າງາມ.

ໂອກາດດຽວກັນນີ້ ສະຫາຍ ພັອ ລຳຄູນ ວໍລະວົງ ວ່າການເລຂາພັກເມືອງ ກໍ່ໄດ້ຜ່ານບົດລາຍງານການເມືອງພາກ 1 ແລະ ພາກ 2 ໃຫ້ຮູ້ວ່າ: ຕະຫຼອດໄລຍະ 5 ປີຜ່ານມາ ຄະນະພັກທຸກຂັ້ນໄດ້ຖືເອົາວຽກງານສຶກສາອົບຮົມການເມືອງແນວຄິດເປັນບັນຫາກົກ,ຫັນເອົາລະບົບການຈັດຕັ້ງພັກແຕ່ຂັ້ນເມືອງລົງຮອດຮາກຖານກຸ່ມບ້ານ. ທົ່ວເມືອງມີ 14 ຄະນະພັກຮາກຖານ ເພີ່ມຂຶ້ນ 1 ຮາກຖານ,ມີໜ່ວຍພັກທັງໝົດ 125 ໜ່ວຍ ເພີ່ມຂຶ້ນ 11 ໜ່ວຍ,ມີສະມາຊິກພັກທັງໝົດ 1.929 ສະຫາຍ,ຍິງ 506 ສະຫາຍ ເພີ່ມຂຶ້ນ 729 ສະຫາຍ,ສະມາຊິກພັກສົມບູນໄດ້ຮັບບັດແດງແລ້ວ 1.122 ສະຫາຍ,ຍິງ 318 ສະຫາຍ ເທົ່າກັບ 57,5% ຂອງສະມາຊິກພັກສົມບູນທັງໝົດ. ດ້ານວຽກງານເສດຖະກິດ – ສັງຄົມໄດ້ມີການຂະຫຍາຍຕົວຢ່າງຕໍ່ເນື່ງ,ໝັ້ນທ່ຽງ ແລະ ຖືກທິດ ອັດຕາການຂະຫຍາຍຕົວສະເລ່ຍ 6% ລວມຍອດຜະລິດຕະພັນພາຍໃນ GDP ໄດ້ 1.498 ຕື້ກວ່າກີບ,ທຽບໃສ່ປີ 2014 ເພີ່ມຂຶ້ນ 466 ຕື້ກວ່າກີບ ສະເລ່ຍໃສ່ຫົວຄົນບັນລຸໄດ້ 14.390.000 ກີບ ຫຼື ເທົ່າກັບ 1.766 ໂດລາຕໍ່ຄົນຕໍ່ປີ.

ສຳລັບທິດທາງແຜນການໃນ 5 ປີຕໍ່ໜ້າອົງຄະນະພັກເມືອງສອງຄອນແມ່ນຈະໄດ້ສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະແມ່ນຄວາມຫຍຸ້ງຍາກທາງດ້ານເສດຖະກິດ ສຳລັບເມືອງສອງຄອນແມ່ນຍັງມີຫຼາຍບັນຫາທີ່ຈະຕ້ອງໄດ້ປະເຊີນໜ້າ ເປັນຕົ້ນ ບັນຫາປະກົດການຫຍໍ້ທໍ້ໃນສັງຄົມ,ເຄື່ອງມືທຳການຜະລິດຍັງບໍ່ທັນສະໄໝ,ການຜະລິດອີງໃສ່ແຕ່ທຳມະຊາດ,ພື້ນຖານໂຄງລ່າງທີ່ຈຳເປັນບໍ່ທັນຕອບສະໜອງໄດ້,ຖານລາຍຮັບງົບປະມານມີໜ້ອຍ ແຕ່ຄວາມຕ້ອງການຈ່າຍພັດສູງ ແຕ່ພາຍໃຕ້ການນຳພາຂອງອົງຄະນະພັກແຂວງ ແລະ ຄວາມຮັບຜິດຊອບສູງຂອງອົງຄະນະພັກເມືອງ ເຊື່ອໝັ້ນວ່າບັນຫາຄວາມຫຍຸ້ງຍາກເຫຼົ່ານີ້ຕ້ອງໄດ້ຮັບການແກ້ໄຂໃຫ້ດີຂຶ້ນ.
ຈາກນັ້ນໃນກອງປະຊຸມສະຫາຍ ສົມພານ ສີທອງຄຳ ກຳມະການພັກເມືອງ ຮອງເຈົ້າເມືອງກໍ່ໄດ້ຜ່ານແຜນພັດທະນາເສດທະກິດ – ສັງຄົມ ຄັ້ງທີ 7 ປີ 2020-2024 ຂອງເມືອງສອງຄອນຕື່ມອີກ.

savannakhet medialaos