ໃນຕອນບ່າຍຂອງວັນທີ 23 ສິງຫາ 2019 ຜ່ານມານີ້ຢູ່ທີ່ສະໂມສອນຂອງເມືອງພີນໄດ້ມີພິທີມອບ – ຮັບໜ້າທີ່ເຈົ້າເມືອງໆພີນລະຫວ່າງຜູ້ເກົ່າ ແລະຜູ້ໃໝ່ ຄັ້ງວັນທີ 23 ສິງຫາ 2019 ໂດຍພາຍໃຕ້ການເປັນປະທານຂອງ ທ່ານ ປອ ໂພໄຊ ໄຊຍະສອນ ກໍາມະການສໍາຮອງສູນກາງພັກ ຮອງເຈົ້າແຂວງສະຫວັນນະເຂດ, ມີບັນດາຄະນະຈັດຕັ້ງແຂວງ, ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ເລຂາພັກບ້ານ-ນາຍບ້ານອ້ອມຂ້າງເມືອງເຂົ້າຮ່ວມ.

ໃນພິທີດັ່ງກ່າວ ທ່ານ ສຸດໃຈ ໄຊຍະວົງ ຮອງຫົວໜ້າຄະນະຈັດຕັ້ງແຂວງໄດ້ຂື້ນຜ່ານຂໍ້ຕົກລົງວ່າດ້ວຍການອະນຸມັດໃຫ້ລັດຖະກອນອອກຮັບເບ້ຍບໍານານ ສະບັບເລກທີ 1075/ຈຂ.ສຂ ລົງວັນທີ 08 ກໍລະກົດ 2019 ອະນຸມັດໃຫ້ ທ່ານ ຄໍາມາດ ເນົາວົງພະຈັນ ກໍາມະການພັກແຂວງ ເລຂາພັກເມືອງ ເຈົ້າເມືອງໆພີນ ອອກຮັບອຸດໜຸນເບ້ຍບໍານານ ແຕ່ວັນທີ 01 ກໍລະກົດ 2019ເປັນຕົ້ນໄປ, ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການແຕ່ງຕັ້ງພະນັກງານ ສະບັບເລກທີ 1292/ຈຂ.ສຂ ລົງວັນທີ 05 ສິງຫາ 2019 ຕົກລົງ ອະນຸມັດແຕ່ງຕັ້ງ ທ່ານ ສາລີ ວິລະວັນ ເປັນເຈົ້າເມືອງໆພີນ ແຂວງສະຫວັນນະເຂດ ແລະຜ່ານມະຕິຕົກລົງຂອງຄະນະປະຈໍາພັກແຂວງສະຫວັນນະເຂດ ວ່າດ້ວຍການແຕ່ງຕັ້ງຜູ້ວ່າການເລຂາພັກເມືອງ-ເມືອງພີນ ສະບັບເລກທີ 1164/ກປຂຂ.ສຂ ລົງວັນທີ 07 ສິງຫາ 2019 ຕົກລົງອະນຸມັດແຕ່ງຕັ້ງສະຫາຍ ສາລີ ວິລະວັນ ເປັນຜູ້ວ່າການເລຂາພັກເມືອງພີນ. ພ້ອມນັ້ນ ທ່ານ ຄໍາມາດ ເນົາວົງພະຈັນ ກໍາມະການພັກແຂວງ ເລຂາພັກເມືອງ ເຈົ້າເມືອງໆພີນ ຂື້ນລາຍງານສະພາບລວມຂອງເມືອງພີນ, ການເຄື່ອນໄຫວຈັດຕັ້ງປະຕິບັດຊີ້ນໍາໆພາວຽກງານຕ່າງໆທີ່ຜ່ານມາ, ມອບໜ້າທີ່ສືບຕໍ່ຜັນຂະຫຍາຍວຽກງານຕ່າງໆໃຫ້ແກ່ເຈົ້າເມືອງຄົນໃໝ່ພ້ອມກ່າວອໍາລາໜ້າທີ່. ວາລະດຽວກັນນີ້ ທ່ານ ປອ ໂພໄຊ ໄຊຍະສອນ ກໍາມະການສໍາຮອງສູນກາງພັກ ຮອງເຈົ້າແຂວງສະຫວັນນະເຂດໄດ້ປະກອບຄໍາຄິດຄໍາເຫັນຍ້ອງຍໍຊົມເຊີຍໃນການເຄື່ອນໄຫວຈັດຕັ້ງປະຕິບັດຊີ້ນໍາໆພາວຽກງານຕ່າງໆທີ່ຜ່ານມາຂອງ ສະຫາຍ ຄໍາມາດ ເນົາວົງພະຈັນ ອະດີດເຈົ້າເມືອງໆພີນ, ໄດ້ໂອ້ລົມປຸກລະດົມການເມືອງແນວຄິດໃນການແກ້ໄຂປັບປຸງກໍ່ສ້າງບຸກຄະລາກອນກໍ່ສ້າງຮາກຖານ, ວຽກງານຈັດຕັ້ງປະຕິບັດກະກຽມກອງປະຊຸມໃຫຍ່ທີ່ໃກ້ຈະມາເຖິງນີ້ ໃຫ້ຄະນະການນໍາຂັ້ນເມືອງ ແລະອໍານາດການປົກຄອງຂອງບ້ານໃນທົ່ວເມືອງພີນ. ຈາກນັ້ນ ກໍ່ໄດ້ມີການ ມອບ – ຮັບ ໜ້າທີ່ລະຫວ່າງເຈົ້າເມືອງໆພີນຜູ້ເກົ່າ ແລະເຈົ້າເມືອງໆພີນຜູ້ໃໝ່ຢ່າງເປັນທາງການ.