ກອງປະຊຸມໃຫຍ່ ຂອງອົງຄະນະພັກ ເມືອງທ່າໂທມ ແຂວງໄຊສົມບູນ ຄັ້ງທີ 5 ໄດ້ໄຂຂຶ້ນຢ່າງເປັນທາງການ ໃນລະຫວ່າງວັນທີ 30-31 ມັງກອນ ນີ້ ທີ່ສະໂມສອນກອງບັນຊາການທະຫານ ເມືອງ ໂດຍການເປັນປະທານຂອງສະຫາຍ ພິມພາ ນິລາວົງ, ເລຂາພັກເມືອງ, ເຈົ້າເມືອງໆ ທ່າໂທມ ໂດຍການເຂົ້າຮ່ວມຂອງສະຫາຍ ພົຕ ຄຳລຽງ ອຸທະໄກສອນ, ເລຂາຄະນະບໍລິຫານງານພັກແຂວງ, ເຈົ້າແຂວງໄຊສົມບູນ, ມີສະຫາຍ ບຸນສຸກ ຈອມວິສານ, ຮອງເລຂາພັກແຂວງ, ປະທານສະພາປະຊາຊົນ ແຂວງ ທັງເປັນຫົວໜ້າອະນຸກຳມະການ-ບຸກຄະລາກອນ ກະກຽມກອງປະຊຸມໃຫຍ່ 3 ຂັ້ນ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ ພ້ອມດ້ວຍແຂກທີ່ຖືກເຊີນຈາກເມືອງບໍລິຄັນ ແຂວງບໍລິຄຳໄຊ, ເມືອງໝອກ ແລະ ເມືອງຄູນ ແຂວງຊຽງຂວາງ ບັນດາເມືອງອ້ອມຂ້າງ ພາຍໃນແຂວງ, ພະນັກງານອາວຸໂສບຳນານ, ນັກທຸລະກິດ ຜູ້ປະກອບການ ແລະ ຜູ້ແທນສົມບູນ ເຂົ້າຮ່ວມ.

ກອງປະຊຸມ ຄັ້ງນີ້ ຈະໄດ້ພ້ອມກັນທົບທວນຕີລາຄາຄືນບັນດາຜົນງານ ທີ່ຍາດມາໄດ້, ຈຸດອ່ອນ ບັນຫາຂໍ້ຄົງຄ້າງຕ່າງໆ ແລະ ສະຫລຸບຖອດຖອນບົດຮຽນ ໃນໄລຍະ 5 ປີ ຜ່ານມາ ເພື່ອກຳນົດຄາດໝາຍສູ້ຊົນໃນຕໍ່ໜ້າ ພ້ອມທັງຄັດເລືອກເອົາຄະນະບໍລິຫານງານພັກເມືອງ ຊຸດໃໝ່ ເພື່ອສືບຕໍ່ຊີ້ນຳ-ນຳພາ ເມືອງທ່າໂທມ ໃຫ້ກ້າວຂຶ້ນຢ່າງບໍ່ຢຸດຢັ້ງ ດ້ວຍຜົນງານ ແລະ ໄຊຊະນະໃໝ່ທີ່ໃຫຍ່ຫຼວງກວ່າເກົ່າ. ໂອກາດນີ້ ສະຫາຍ ພິມພາ ນີລາວົງ ໄດ້ຂຶ້ນຜ່ານບົດລາຍງານການເມືອງຂອງຄະນະບໍລິຫານງານພັກເມືອງທ່າໂທມ ຊຶ່ງໄດ້ຍົກໃຫ້ເຫັນເຖິງການຊີ້ນຳໆພາ ຂອງອົງຄະນະພັກເມືອງ ໃນໄລຍະ 5 ປີ ຜ່ານມາ. ໂດຍລວມແລ້ວ ພາຍໃນເມືອງແມ່ນມີສະຖຽນລະພາບທາງດ້ານການເມືອງ ຢ່າງໜັກແໜ້ນ, ສັງຄົມມີຄວາມສະຫງົບປອດໄພໂດຍພື້ນຖານ, ເສດຖະກິດໄດ້ຮັບການຂະຫຍາຍຕົວ ຢ່າງຕໍ່ເນື່ອງ ແລະ ໜັ້ນທ່ຽງ ລວມຍອດລາຍຮັບ ໃນປີ 2019 ບັນລຸໄດ້ 201,29 ຕື້ກີບ, ສະເລ່ຍໃສ່ຫົວຄົນ 8 ລ້ານ ກວ່າກີບ, ຫລື 1,112 ໂດລາສະຫະລັດ ຕໍ່ຄົນ ຕໍ່ປີ, ທຽບໃສ່ 2014 ເພີ່ມຂຶ້ນ 163 ໂດລາ, ທຽບໃສ່ມະຕິກອງປະຊຸມໃຫ່ຍ ຄັ້ງທີ 4 ສາມາດປະຕິບັດໄດ້ 87,21 ສ່ວນຮ້ອຍ.

ພ້ອມນີ້ ເມືອງທ່າໂທມ ໄດ້ຖືເອົາການສົ່ງເສີມການປູກພືດກະສິກຳອິນຊີ ເປັນສິນຄ້າ ເປັນບັນຫາສຳຄັນ ຊຶ່ງໃນທົ່ວເມືອງ ສາມາດຜະລິດເຂົ້າໄດ້ 9,118,73 ໂຕນ ຕໍ່ປີ, ປູກພືດອຸດສາຫະກຳໄດ້ 1,376,72 ເຮັກຕາ, ພືດສະບຽງອາຫານໄດ້ 262,28 ເຮັກຕາ, ສົ່ງເສີມການລ້ຽງສັດໃຫຍ່, ສັດນ້ອຍ ແລະ ສັດປີກ ໄດ້ທັງໝົດ 79,937 ໂຕ, ມີຊົນລະປະທານ ທັງໝົດ 244 ແຫ່ງ ຄຽງຄູ່ກັນນັ້ນ ຍັງໄດ້ສົ່ງເສີມບັນດາຫົວໜ່ວຍທຸລະກິດ, ກຸ່ມຜະລິດກະສິກຳປຸງແຕ່ງ, ຫັດຖະກຳ ໃຫ້ໄດ້ມີການຂະຫຍາຍຕົວຢ່າງຕໍ່ເນື່ອງ ແລະ ເປັນທີ່ຍອມຮັບ ຂອງຕະຫລາດ. ໃນໄລຍະ 5 ປີຜ່ານມາ ເມືອງທ່າໂທມ ໄດ້ຮັບການລົງທຶນທັງໝົດ 108 ໂຄງການ ລວມເປັນເງິນທັງໝົດ 394,24 ຕື້ ກີບ ທຽບໃສ່ແຜນການປະຕິບັດໄດ້ 39,77 ສ່ວນຮ້ອຍ ແລະ ວຽກງານດ້ານອື່ນໆ ກໍໄດ້ມີການຈັດຕັ້ງປະຕິບັດ ແລະ ສຳເລັດ ຕາມລະດັບຄາດໝາຍ. ຈາກນັ້ນ ທ່ານ ບຸນທອນ ປັນແກ້ວ, ຮອງເລຂາພັກເມືອງ, ຮອງເຈົ້າເມືອງໆ ທ່າໂທມ ໄດ້ຂຶ້ນຜ່ານຮ່າງແຜນພັດທະນາເສດຖະກິດ-ສັງຄົມ ຂອງເມືອງ ທັງໄດ້ຮັບຟັງການປະກອບຄຳເຫັນ ແລະ ການລາຍງານຕົວແບບ ກຸ່ມການປູກພືດເປັນສິນຄ້າ ບ້ານນາຊົງ ແລະ ກຸ່ມຫັດຖະກຳຫວາຍ ບ້ານວັງໄຮ ພ້ອມດຽວກັນນີ້ ຍັງຈະໄດ້ຮັບຟັງຄຳໂລ້ລົມ ຂອງສະຫາຍ ເລຂາພັກແຂວງ ຕື່ມອີກ ກອງປະຊຸມຄັ້ງນີ້ ຈະໄດ້ດຳເນີນເປັນເວລາ 2 ວັນ ຈຶ່ງຈະສຳເລັດ.

MediaLaos xaysomboun
ພາບ-ຂ່າວ: ນາງ ພຸດທະສອນ ເວດສະວົງ