ໃນຕອນເຊົ້າຂອງວັນທີ 30 ມັງກອນ 2020 ນີ້ ກອງບັນຊາການ ປກສ ແຂວງອັດຕະປື ໄດ້ຈັດກອງປະຊຸມສະຫຼຸບວຽກງານປ້ອງກັນຄວາມສະຫງົບປະຈຳປີ 2019 ແລະ ວາງທິດທາງແຜນການວຽກງານຈຸດສຸມ ປີ 2020 ທີ່ສະໂມສອນກອງບັນຊາການ ປກສ ແຂວງ ເຊິ່ງກອງປະຊຸມດັ່ງກ່າວຈະໄດ້ດຳເນີນໄປເປັນເວລາ 2 ວັນ, ພາຍໃຕ້ການເປັນປະທານຂອງ ທ່ານ ພັອ ສີເວີນ ແກ້ວສີວົງສາ ຮັກສາການຫົວໜ້າກອງບັນຊາການ ປກສ ແຂວງ, ມີຄະນະກອງບັນຊາການ, ຄະນະຫ້ອງ, ຄະນະກອງພັນ, ຄະນະຄ້າຍຄຸມຂັງ – ດັດສ້າງ, ຄະນະກອງບັນຊາການ ປກສ 5 ເມືອງ, ແຂກຖືກເຊີນຈາກກອງບັນຊາການທະຫານແຂວງ, ອົງການໄອຍະການປະຊາຊົນແຂວງ, ຫ້ອງການປ້ອງກັນຊາດ – ປ້ອງກັນຄວາມສະຫງົບແຂວງ ຕະຫຼອດຮອດພະນັກງານຫຼັກແຫຼ່ງກອງບັນຊາການ ປກສ ແຂວງ ເຂົ້າຮ່ວມຢ່າງພ້ອມພຽງ.

​ທ່ານ ພັທ ສັກສິດ ສີພັນດວງ ຫົວໜ້າຫ້ອງການກອງບັນຊາການ ໄດ້ຂື້ນຜ່ານຮ່າງບົດສະຫຼຸບປະຈຳປີ 2019 ເຊິ່ງທ່ານໄດ້ຍົກໃຫ້ເຫັນສະພາບການຂອງໂລກ ແລະ ພາກພື້ນ, ສະພາບຄວາມບໍ່ເປັນລະບຽບຮຽບຮ້ອຍຂອງສັງຄົມຢູ່ພາຍໃນແຂວງ ແລະ ສະພາບການຈັດຕັ້ງປະຕິບັດ 4 ຄາດໝາຍ ຂອງວຽກງານປ້ອງກັນຄວາມສະຫງົບ ປີ 2019 ເຊິ່ງສາມາດຍາດໄດ້ຫຼາຍຜົນງານເປັນຕົ້ນ: ວຽກງານປ້ອງກັນຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງດ້ານສັງຄົມ ໃນ 1 ປີຜ່ານມາ ມີຄະດີອາຍາເກີດຂື້ນທັງໝົດ 183 ລາຍ, ມ້າງໄດ້ 113 ລາຍ, ກັກຜູ້ຖືກຫາໄດ້ 260 ຄົນ, ຍິງ 48 ຄົນ, ຄົນຕ່າງປະເທດ 31 ຄົນ (ທຽບໃສ່ປີ 2018 ຄະດີເພີ່ມຂື້ນ 43 ລາຍ); ມີຄະດີອຸບັດຕິເຫດເກີດຂື້ນທັງໝົດ 216 ລາຍ, ພາຫະນະເປ້ເພ 371 ຄັນ, ໃຊ້ການບໍ່ໄດ້ 7 ຄັນ, ມີຄົນໄດ້ຮັບບາດເຈັບ 332 ຄົນ, ເສຍຊີວິດ 34 ຄົນ (ທຽບໃສ່ປີ 2018 ອຸບັດຕິເຫດເພີ່ມຂື້ນ 132 ລາຍ, ຄົນເສຍຊິວິດ ຫຼຸດລົງ 5 ຄົນ); ມີອັກຄີໄພເກີດຂື້ນ 21 ຄັ້ງ, ມູນຄ່າເສຍຫາຍປະມານ 425 ລ້ານກີບ; ມີຄະດີຢາເສບຕິດເກີດຂື້ນທັງໝົດ 88 ລາຍ, ກັກຜູ້ຖືກຫາໄດ້ 104 ຄົນ, ຍິງ 34 ຄົນ, ຄົນຕ່າງປະເທດ 3 ຄົນ, ຍິງ 1 ຄົນ; ໄດ້ຂື້ນທະບຽນສຳມະໂນຄົວໃຫ້ຄົນລາວທັງໝົດ 29.650 ຄອບຄົວ, ສຳມະໂນຄົວຕ່າງດ້າວ 7 ຄອບຄົວ, ອອກບັດປະຈຳຕົວ 788 ບັດ ແລະ ຜະລິດກາປະທັບໄດ້ທັງໝົດ 36 ໜ່ວຍ.

ນອກຈາກນັ້ນ, ທ່ານຍັງໄດ້ລາຍງານສະພາບການຈັດຕັ້ງປະຕິບັດວຽກງານປັບປຸງ – ກໍ່ສ້າງກຳລັງປ້ອງກັນຄວາມສະຫງົບປະຊາຊົນ ໃຫ້ປອດໃສ, ເຂັ້ມແຂງ, ໜັກແໜ້ນ ແລະ ມີແບບແຜນທັນສະໄໝ; ວຽກງານຮັບປະກັນພະລາທິການປ້ອງກັນຄວາມສະຫງົບ; ວຽກງານພົວພັນ – ຮ່ວມມືກັບຕ່າງປະເທດ ແລະ ຍົກສູງຄຸນນະພາບການເປັນເສນາທິການ ໃຫ້ຄະນະພັກ – ຄະນະບັນຊາແຕ່ລະຂັ້ນ ໃຫ້ເຂົ້າສູ່ລະບອບລະບຽບ ແລະ ຄຸນນະພາບໃໝ່. ຕໍ່ຈາກນັ້ນ, ທ່ານກໍໄດ້ຜ່ານທິດທາງແຜນການວຽກງານຈຸດສຸມ ປີ 2020 ໂດຍຈະໄດ້ສືບຕໍ່ຈັດຕັ້ງປະຕິບັດເນື້ອໃນ 4 ຄາດໝາຍ, 4 ແຜນງານ, 41 ໂຄງການ ທີ່ກອງບັນຊາການ ປກສ ແຂວງວາງອອກ ເພື່ອຮັບປະກັນເຮັດໃຫ້ແຂວງອັດຕະປື ມີສະຖຽນລະພາບທາງດ້ານການເມືອງໜັກແໜ້ນ, ເຮັດໃຫ້ສັງຄົມມີຄວາມສະຫງົບ – ມີຄວາມເປັນລະບຽບຮຽບຮ້ອຍໂດຍພື້ນຖານ.
​ໃນກອງປະຊຸມທີ່ມີຄວາມໝາຍສຳຄັນໃນຄັ້ງນີ້ ຜູ້ແທນກອງປະຊຸມຍັງໄດ້ຂື້ນປະກອບຄຳຄິດຄຳເຫັນ ຕາມຄຳຖາມເຈາະຈີ້ມຈາກທ່ານປະທານ ເພື່ອປະກອບເຂົ້າໃນຮ່າງບົດສະຫຼຸບ ແລະ ທິດທາງແຜນການ ໃຫ້ມີເນື້ອໃນຄົບຖ້ວນ, ສົມບູນ ແລະ ສອດຄ່ອງ ໃນການນຳໄປຈັດຕັ້ງປະຕິບັດຢູ່ແຕ່ລະຂົງເຂດວຽກງານໃຫ້ມີຜົນສຳເລັດ ຕາມລະດັບຄາດໝາຍ.

ບົດຂ່າວ: ປກສ ແຂວງອັດຕະປື
ເສົາດາລົງ ເພັດສົງຄາມ
ມີເດຍລາວ ອັດຕະປື