ວັນທີ 23ສິງຫາ 2019ທີ່ຜ່ານມານີ້ ຄະນະສະຫະພັນກຳມະບານແຂວງສະຫວັນນະເຂດ ນຳໂດຍທ່ານ ບຸນລ້ຽງ ຈັນວັນເພັງ ປະທານຄະນະບໍລິຫານງານສະຫະພັນກຳມະບານແຂວງ ແລະ ທ່ານ ສົມໃຈ ສີສົມພອນ ຮອງປະທານ ຄະນະບໍລິຫານງານ ພ້ອມພະນັກງານວິຊາການ ໄດ້ນຳເອົາເຄື່ອງບໍລິໂພກ ມີນ້ຳດື່ມ, ນົມ ແລະ ເຂົ້າໜົມ ຈຳນວນ 300 ກວ່າຖົງ ເປັນມູນຄ່າ 2 ລ້ານກີບ ມາມອບ ແລະ ແຢກຢາຍ ໃຫ້ແກ່ຄົນເຈັບທີ່ກຳລັງນອນປິ່ນປົວພະຍາດໄຂ້ເລືອດອອກຢູ່ທີ່ໂຮງໝໍແຂວງສະຫວັນນະເຂດ ເຊິ່ງເຫັນໄດ້ວ່າປັດຈຸບັນແມ່ນມີການແຜ່ລະບາດຢ່າງໄວວາຂອງເຊື້ອພະຍາດດັ່ງກ່າວ

ແລະ ຕ່າງໜ້າກ່າວຮັບເອົາເຄື່ອງບໍລິໂພກດັ່ງກ່າວແມ່ນທ່ານ ອິນປັນ ຄຳວິເສດ ຄະນະກຳມະບານຮາກຖານ ພະແນກສາທາລະນະສຸກແຂວງ ເຊິ່ງທ່ານປະທານສະຫະພັນກຳມະບານແຂວງ ສະຫວັນນະເຂດ ທີ່ນຳເອົາເຄື່ອງບໍລິໂພກ ມາມອບໃນຄັ້ງນີ້ ຍັງໄດ້ກ່າວຕື່ມວ່າ: ກໍ່ເພື່ອເປັນການສະແດງເຖິງຄວາມເປັນຫ່ວງເປັນໄຍຕໍ່ກັບພໍ່ແມ່ປະຊາຊົນ ໂດຍສະເພາະຕໍ່ຄົນເຈັບທີ່ເປັນໄຂ້ ເລືອດອອກ .ດັ່ງນັ້ນ ຖ້າຫາກມີພະຍາດດັ່ງກ່າວເກີດຂື້ນແລ້ວ ເຮົາກໍ່ຄວນຫາວິທີການປ້ອງກັນ ຄືນອນໃນມຸ້ງ ແລະ ທຳລາຍແຫລ່ງເພາະພັນຂອງຍຸງລາຍໃຫ້ໝົດໄປ.
ພ້ອມນັ້ນຄະນະສະຫະພັນກຳມະບານແຂວງ ກໍ່ຍັງໄດ້ນຳເອົາເຄື່ອງບໍລິໂພກດັ່ງກ່າວມາມອບໃຫ້ແກ່ຄົນເຈັບເປັນໄຂ້ເລືອດອອກ ທີ່ກຳລັງນອນປິ່ນປົວຢູ່ທີ່ໂຮງຫມໍທະຫານແຂວງຕື່ມອີກ.