ກອງປະຊຸມໃຫຍ່ ຄັ້ງທີ V ຂອງຄະນະພັກຮາກຖານພະແນກກະສິກຳ ແລະ ປ່າໄມ້ແຂວງ ໄດ້ຈັດຂຶ້ນໃນວັນທີ 31 ມັງກອນ 2020 ຢູ່ສະໂມສອນໃຫຍ່ຂອງແຂວງ ໂດຍພາຍໃຕ້ການເປັນປະທານຂອງ ສະຫາຍ ພອນສະຫວັນ ຫອມນະບຸນລັດ ເລຂາຄະນະພັກຮາກຖານພະແນກກະສິກຳ ແລະ ປ່າໄມ້ແຂວງ, ເປັນກຽດເຂົ້າຮ່ວມຂອງສະຫາຍ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ມີເລຂາ-ຮອງເລຂາໜ່ວຍພັກຈາກຫ້ອງການກະສິກຳເມືອງ, ສະມາຊິກພັກພາຍໃນພະແນກ ແລະ ແຂກຖືກເຊີນ ຈາກຮາກຖານອ້ອມຂ້າງເຂົ້າຮ່ວມ.

​ໃນກອງປະຊຸມ ໄດ້ຮັບຟັງການຜ່ານບົດລາຍງານ ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 4 ຜ່ານມາ ຮາກຖານພັກພະແນກກະສິກຳ ແລະ ປ່າໄມ້ແຂວງ ມີ 10 ຂະແໜງ ມີ 8 ໜ່ວຍພັກ ທີ່ຂຶ້ນກັບ ເພີ່ມຂຶ້ນ 1 ໜ່ວຍ, ມີສະມາຊິກພັກທັງໝົດ 175 ສະຫາຍ ຍິງ 51 ສະຫາຍ, ສຳຮອງ 4 ສະຫາຍ ຍິງ 2, ຕະຫຼອດໄລຍະຜ່ານມາ ຄະນະພັກໄດ້ເອົາໃຈໃສ່ຊີ້ນຳວຽກງານ ເປັນຕົ້ນແມ່ນວຽກງານຈັດສັນພູມລຳເນົາ ແລະ ສ້າງອາຊີບ ທຳມາຫາກິນແບບຄົງທີ່ ຖືເອົາວຽກງານປູກຝັງ ແລະ ລ້ຽງສັດ ຫັນໄປນຳໃຊ້ເຕັກນິກໃໝ່ເທື່ອລະກ້າວ ຮອດຕົ້ນປີ 2019 ສາມາດບັນລຸຄາດໝາຍແກ້ໄຂຄວາມທຸກຍາກ ຍັງເຫຼືອພຽງແຕ່ 1,8%, ຄອບຄົວພັດທະນາ 44.887 ຄອບຄົວ, ບ້ານພັດທະນາ 205 ບ້ານ, ປະກາດຮັບຮອງການສ້າງບ້ານໃຫຍ່ເປັນສີສັນຕົວເມືອງນ້ອຍໄດ້ 2 ບ້ານ, ປີ 2019 ມີເນື້ອທີ່ປູກເຂົ້ານາປີ 37.795 ຮຕ, ນາແຊງ 1.357 ຮຕ, ຜະລິດເຂົ້າໄດ້ 150.044 ໂຕນ ທຽບໃສ່ແຜນການ 5 ປີ ເທົ່າກັບ 95,56%, ສະເລ່ຍເຂົ້າກິນໄດ້ 482,89 ກິໂລ/ຄົນ/ປີ ເທົ່າກັບ 92,90%, ຜົນຜະລິດພືດ ແລະ ໄມ້ໃຫ້ໝາກ 311.978 ໂຕນ, ຜະລິດເຂົ້າລຸ້ນ 2 ແລະ 3 ໄດ້ຈຳນວນໜຶ່ງ, ການລ້ຽງສັດໃຫຍ່-ນ້ອຍ, ສັດນ້ຳ ໄດ້ຫັນມາລ້ຽງແບບເປັນກຸ່ມເປັນຟາມ ການນຳໃຊ້ເຕັກນິກການລ້ຽງ ການໃຫ້ຢາປ້ອງກັນ, ໃຫ້ອາຫານ ແລະ ການສ້າງທົ່ງຫຍ້າ ເຮັດໃຫ້ຈຳນວນສັດນັບມື້ເພີ່ມຂຶ້ນ ເຊັ່ນ: ຄວາຍ, ງົວ 163.547 ໂຕ, ແບ້, ໝູ 111.857 ໂຕ, ສັດປີກ 904.590 ໂຕ, ຜະລິດປາໄດ້ 3.874,26 ໂຕນ, ຟາມໝູມີ 21 ຟາມ, ກຸ່ມລ້ຽງສັດໃຫຍ່ມີ 174 ກຸ່ມ, ກຸ່ມລ້ຽງແບ້ ມີ 38 ກຸ່ມ, ສະເລ່ຍການບໍລິໂພກຊີ້ນ, ປາ, ໄຂ່ 52,54 ກິໂລ/ຄົນ/ປີ ເພີ່ມຂຶ້ນ 8,71 ກິໂລ/ຄົນ.

ນອກຈາກນັ້ນກອງປະຊຸມຄັ້ງນີ້ ຍັງໄດ້ມີມະຕິຮັບຮອງເອົາຮ່າງລາຍງານການເມືອງ, ແຜນພັດທະນາກະສິກຳ ແລະ ປ່າໄມ້, ທິດທາງຄາດໝາຍສູ້ຊົນ, ບົດສຳຫຼວດການນຳພາຂອງຄະນະພັກຊຸດເກົ່າ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ເປັນຕົ້ນແມ່ນ ການສູ້ຊົນເຮັດໃຫ້ລວມຍອດຜະລິດຕະພັນພາຍໃນຂະແໜງການກະສິກຳ ແລະ ປ່າໄມ້ ຂະຫຍາຍຕົວໃນລະດັບ 3,7%, ການພັດທະນາ 3 ປະເພດປ່າໃຫ້ຍືນຍົງ ແລະ ເພີ່ມທະວີວຽກກໍ່ສ້າງພັກປອດໃສ, ເຂັ້ມແຂງ, ໜັກແໜ້ນ.

ພ້ອມດຽວກັນໃນພິທີ ຍັງໄດ້ປ່ອນບັດຄັດເລືອກເອົາຄະນະພັກຮາກຖານຊຸດໃໝ່, ຜ່ານການປ່ອນບັດຄັດເລືອກ ແລະ ກອງປະຊຸມຄັ້ງປະຖົມມະລຶກ ໄດ້ຄັດເລືອກເອົາ ສະຫາຍ ພັດທະຈອນ ແກ້ວພຸດທະວົງ ເປັນເລຂາຄະນະພັກຮາກຖານ ຊຸດທີ V, ສະຫາຍ ຊາຍຄຳ ກຸນນະວົງ ເປັນຮອງເລຂາ, ສະຫາຍ ສອນໄຊ ພົມມະວົງ ເປັນຜູ້ກວດກາ, ສະຫາຍ ຄຳເດັດ ສຸວິແກ້ວ ແລະ ສະຫາຍ ສົມສະຫວາດ ຊົມຄຳນິລັນດອນ ເປັນຄະນະພັກຮາກຖານ ແລະ ຍັງໄດ້ປ່ອນບັດເອົາຜູ້ແທນສົມບູນ 4 ສະຫາຍ ແລະ ສຳຮອງ 1 ສະຫາຍ ໄປຮ່ວມກອງປະຊຸມໃຫຍ່ ຄັ້ງທີ VII ຂອງຄະນະບໍລິຫານງານພັກແຂວງ.

Medialaos bolikhamxay