ພິທີຖະແຫຼງຂ່າວ ກ່ຽວກັບ ສະພາບການລະບາດຂອງພະຍາດອັກເສບປອດ ເຊື້ອຈຸລະໂລກສາຍພັນໃໝ່ novel Corona Virus

0
355

ໃນວັນທີ 03/02/2020 ເວລາ 16:00 ໂມງ ທີ່ຫ້ອງປະຊຸມ ກະຊວງສາທາລະນະສຸກ, ໄດ້ຈັດພິທີຖະແຫຼງຂ່າວ ກ່ຽວກັບ ສະພາບການລະບາດຂອງພະຍາດອັກເສບປອດ ເຊື້ອຈຸລະໂລກສາຍພັນໃໝ່ novel Corona Virus.

ໂດຍຖະແຫຼງການຮ່ວມ ມີ 3 ພາກສ່ວນ ຄື: ກະຊວງການຕ່າງປະເທດ, ກະຊວງສາທາລະນະສຸກ ແລະ ອົງການອະນາໄມໂລກ ປະຈຳ ສປປ ລາວ.

ຈຸດປະສົງການຖະແຫຼງຂ່າວໃນມື້ນີ້ ກ່ຽວກັບ ສະພາບການລະບາດຂອງພະຍາດອັກເສບປອດ ຈາກເຊື້ອໄວຣັດ ໂຄໂຣນາ (novel Corona Virus) ແລະ ມາດຕະການຄວບຄຸມສະກັດກັ້ນພະຍາດອັກເສບປອດຢູ່ ສປປ ລາວ ແລະ ວິຖີປ້ອງກັນພະຍາດດັ່ງກ່າວ.

ການຖະແຫຼງຂ່າວໃນມື້ນີ້ ກະຊວງສາທາລະນະສຸກ ໄດ້ລາຍງານວ່າ ມາຮອດປັດຈຸບັນ ຍັງບໍ່ພົບຜູ້ຕິດເຊື້ອພະຍາດອັກເສບປອດ ເຊື້ອຈຸລະໂລກສາຍພັນໃໝ່ ໃນ ສປປ ລາວ.

ນັບແຕ່ວັນທີ່ 15 ມັງກອນ -2 ກຸມພາ 2020 ໄດ້ກວດ ແລະ ເກັບຕົວຢ່າງກໍລະນີຄົນເຈັບສົງໃສທັງໝົດ 13 ກໍລະນີ, ປັດຈຸບັນທັງໝົດ 13 ກໍລະນີມີຜົນກວດລົບ ໝາຍຄວາມວ່າບໍ່ມີຜູ້ຕິດເຊື້ອໃນ ສປປລາວ ໃນປັດຈຸບັນ.

ມາຮອດວັນທີ 03/02/2020 ໄດ້ມີໜັງສືແຈ້ງຈາກ ສະຖານກົງສູນໃຫຍ່ ສປ ຈີນ ປະຈຳຫຼວງພະບາງ ສະບັບເລກທີ LZ 10/2020, ກ່ຽວກັບ ການກວດພົບຜູ້ເປັນພະຍາດອັກເສບປອດສາຍພັນໃໝ່ ໄວຣັດໂຄໂຣນາ novel Corona Virus ຈຳນວນ 01 ຄົນ (ຄົນຈີນ) ຜູ້ກ່ຽວໄດ້ເດິນທາງເຂົ້າມາ ສປປ ລາວ ໃນວັນທີ 26 ມັງກອນ 2020 ໂດຍມາທ່ອງທ່ຽວ ແລະ ໄດ້ເດິນທາງອອກຈາກປະເທດລາວ ໃນວັນທີ 31 ມັງກອນ 2020. ເຊິ່ງໜັງສືແຈ້ງດັ່ງກ່າວນີ້ ແມ່ນມີຄວາມຈິງ ເພາະເອກະສານດັ່ງກ່າວແມ່ນໄດ້ຜ່ານ ພະແນກສາທາລະນະສຸກແຂວງແລ້ວ.

ສະນັ້ນ, ສປປ ລາວ ກໍຄື ກະຊວງສາທາລະນະສຸກ ແລະ ພາກສ່ວນຕ່າງໆ ໄດ້ສຸມໃສ່ສືບຕໍ່ເອົາໃຈໃສ່ຕິດຕາມສະພາບການຢ່າງໃກ້ຊິດ ຕໍ່ກັບການແຜ່ລະບາດຂອງພະຍາດດັ່ງກ່າວ ແລະ ມີມາດຕະການປ້ອງກັນຢ່າງເຄັ່ງຄັດ.

ໂດຍມີວິທີປ້ອງກັນ ດັ່ງລຸ່ມນີ້:

  • ຫຼີກລ່ຽງການເດີນທາງໄປເຂດທີ່ມີການລະບາດ ຫຼື ຊຸມຊົນແອອັດ, ຖ້າຈຳເປັນຈະໄປຕ້ອງໄດ້ປະຕິບັດດັ່ງລຸ່ມນີ້:
  • ຫຼີກລ່ຽງການສຳຜັດໃກ້ຊິດກັບຄົນທີ່ມີອາການຄ້າຍຄືໄຂ້ຫວັດເຊັ່ນ: ໄຂ້, ໄອ, ເຈັບຄໍແລະຫາຍໃຈຍາກ,
  • ຖ້າ​ມີ​ອາ​ການທີ່​ກ່າວ​ມາ​ຂ້າງ​ເທີງ​ກະ​ລຸ​ນາ​ໄປ​ພົບ​ແພດ​ໝໍທີ່​ຢູ່​ໃກ້
  • ຫຼີກລ່ຽງການສຳຜັດສັດເປັນຫຼືຕາຍ, 
  • ປະຕິບັດມາລະຍາດໃນການໄອຈາມດ້ວຍ​ການ​ອັດ​ປາກ ​ແລະດັງ, ໃຊ້ຜ້າອັດປາກ, ລ້າງມືຂອງທ່ານທຸກຄັ້ງດ້ວຍ
  • ສະບູຫຼືນ້ຳຢາຂ້າເຊື້ອ
  • ຫາກທ່ານມີອາການຄ້າຍຄືໄຂ້ຫວັດເຊັ່ນ: ໄຂ້, ໄອ, ເຈັບຄໍ, ຫາຍໃຈຍາກ ກະລຸນາໄປພົບແພດໝໍໃກ້ບ້ານທ່ານ
  • ແລະ ແຈ້ງປະຫວັດການເດີນທາງຂອງທ່ານຖ້າໄດ້ໄປເຂດທີ່ມີການລະບາດພະຍາດດັ່ງກ່າວໃນໄລຍະ 14 ວັນກ່ອນ
  • ມີອາການ.

Medialaos