(ພາບປະກອບ)

ພະແນກສາທາລະນະສຸກ ນະຄອນຫລວງວຽງຈັນ ໄດ້ເອົາໃຈໃສ່ຕິດຕາມສະພາບ ການຢ່າງໃກ້ຊິດ ແລະ ຈັດຕັ້ງປະຕິບັດ ວາງມາດຕະການໃນການປ້ອງກັນ ພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ຫລື ໄວຣັດໂຄໂຣນາ ຢ່າງເຄັ່ງຄັດ ໂດຍສະເພາະຢູ່ສະໜາມບິນສາກົນວັດໄຕ, ຂົວມິດຕະພາບ ລາວ-ໄທ 1 ແລະ ດ່ານປະເພນີ ຕ່າງໆ. ປັດຈຸບັນພະຍາດດັ່ງກ່າວ, ໄດ້ແຜ່ກະຈາຍໄປແລ້ວ 27 ປະເທດ ໂດຍມີຜູ້ຕິດເຊື້ອມາຮອດ ຕອນເຊົ້າຂອງວັນທີ 5 ກຸມພາ 2020 ມີທັງໝົດ 24.120 ຄົນ, ໃນນັ້ນເສຍຊີວິດ 492 ຄົນ ແລະ ຍັງບໍ່ທັນມີການລາຍງານ ກໍລະນີຜູ້ຕິດເຊື້ອຢູ່ ສປປ ລາວເທື່ອ.

ທ່ານ ດຣ. ຈັນທະໄລ ໄຊຍະວົງ ຫົວໜ້າຫ້ອງການບໍລິຫານ ພະແນກສາທາລະນະສຸກ ນະຄອນ ຫລວງວຽງຈັນ, ຮັບຜິດຊອບພາວະສຸກເສີນ ດ້ານສາທະລະນະສຸກ ກ່າວໃນກອງປະຊຸມເຜີຍແຜ່ ຂໍ້ມູນຂ່າວສານ ແລະ ປຸກລະດົມ ຂໍຄວາມຮ່ວມມື ເພື່ອເຝົ້າລະວັງປ້ອງກັນ ເຊື້ອໄວຣັດໂຄໂຣນາ ໃນວັນທີ 5 ກຸມພາ 2020 ໂດຍໄດ້ເນັ້ນວ່າ: ສາທາລະນະສຸກ ນະຄອນຫລວງວຽງຈັນ, ໄດ້ເອົາໃຈໃສ່ວຽກງານເຝົ້າລະວັງຢ່າງເຄັ່ງຄັດ ເຊິ່ງປັດຈຸບັນ ໄດ້ເປີດຫ້ອງປະຕິບັດການສຸກເສີນ ດ້ານສາທາລະນະສຸກ ແຕ່ວັນຈັນຫາວັນທິດ ແຕ່ 8:00-16:00 ໂມງ, ເຂົ້າປະຈຳການຢູ່ດ່ານສະໜາມບິນສາກົນວັດໄຕ ທັງສາກົນ ແລະ ພາຍໃນຕະຫລອດ 24 ຊົ່ວໂມງ ມື້ລະ 6 ທ່ານ ແລະ 3 ທ່ານ ສຳລັບດ່ານຂົວມິດຕະພາບ ລາວ-ໄທ 1.

ໃນຂະນະດຽວກັນ ກໍໄດ້ຈັດສັນສະຖານທີ່ກວດພະຍາດໄຂ້ໄອ ແລະ ຫ້ອງແຍກປ່ຽວລໍຖ້າຢູ່ 9 ໂຮງໝໍເມືອງ ແລະ ໄດ້ມີການລາຍງານຂໍ້ມູນຂ່າວ ສານປະຈຳວັນ ຈາກ​ 2 ດ່ານ ແລະ 9 ໂຮງໝໍເມືອງ ໄດ້ສຳເລັດ ການຝຶກອົບຮົມ ຄວາມຮູ້ພື້ນຖານ ກ່ຽວກັບລະບາດວິທະຍາ ໃຫ້ພະນັກງານລະບາດວິທະຍາ, ແພດປິ່ນປົວ, ວິເຄາະ ແລະ ສຸຂະສຶກສາ 9 ຕົວເມືອງ ໃນນະຄອນຫລວງວຽງຈັນ, ແຕ່ເຖິງແນວໃດກໍຕາມ ສາທາລະນະສຸກ ນະຄອນຫລວງວຽງຈັນ ກໍໄດ້ເນັ້ນໃຫ້ຫ້ອງການ ສາທາລະນະສຸກເມືອງ 9 ຕົວເມືອງ ໃຫ້ສືບຕໍ່ເອົາໃຈໃສ່ ໃນການເຝົ້າລະວັງ, ກັ່ນຕອງ ແລະ ຊອກຄົ້ນຫາກໍລະນີສົງໃສ ທີ່ມາໃຊ້ບໍລິການ ຢູ່ສະຖານບໍລິການສາລະນະສຸກ.

ທ່ານ ດຣ. ຈັນທະໄລ ໄຊຍະວົງ ກ່າວຕື່ມວ່າ: ບັນຫາ ແລະ ສິ່ງທ້າທາຍ ສໍາລັບການເຝົ້າລະວັງ ແລະ ປ້ອງກັນ ພະຍາດ ອັກເສບປອດ ຈາກເຊື້ອຈຸລະໂລກສາຍພັນໃໝ່ນີ້ ມີຫລາຍໆຢ່າງເຊິ່ງປະກອບ ມີ ການໃຫ້ຂໍ້ມູນຂ່າວສານ ຍັງບໍ່ທັນທົ່ວ ເຖິງ, ອຸປະກອນເຄື່ອງໃຊ້ບໍ່ພຽງພໍ, ການເຮັດວຽກຮ່ວມກັບຫລາຍພາກສ່ວນ, ການມີສ່ວນຮ່ວມ ແລະ ການສະໜັບສະໜູນ ຈາກຫລາຍຂະແໜງ ການຍັງມີຈຳກັດ ແລະ ອື່ນໆ.

Medialaos