ສະຫຼຸບວຽກງານໄອຍະການປະຊາຊົນ ແລະ ອະໄພຍະໂທດປະຈຳປີ

0
281

ອົງການ​ໄອ​ຍະ​ການ ປະ ຊາຊົນ​ສູງ​ສຸດ (ອອປສ) ໄດ້​ຈັດ​ກອງ​ປະຊຸມ​ສະຫຼຸບ​ວຽກ​ງານ​ໄອ​ຍະ​ການ​ປະຊາຊົນ ແລະ ວຽກ​ງານ​ອະໄພ​ຍະ​ໂທດ ປະຈຳ​ປີ 2019 ແລະ ປະດັບ​ຫຼຽນ​ໄຊ​ໃຫ້​ແກ່​ກົມ​ກອງ​-​​ບຸກ​ຄົນ ເມື່ອ​ວັນ​ທີ 5 ກຸມພານີ້​ ທີ່ ນະຄອນຫຼວງ​ວຽງ​ຈັນ ພາຍ​ໃຕ້​ການ​ເຂົ້າ​ຮ່ວມ​ຂອງ​ທ່ານ   ສອນ​ໄຊ ສີ​ພັນ​ດອນ ກຳມະການ​ກົມ​ການເມືອງ​ສູນ​ກາງ​ພັກ ຮອງ​ນາຍົກລັດຖະມົນຕີ  ທັງ​ເປັນ​ປະທານ​ຄະນະ​ກຳມະການ​ອະໄພ​ຍະ​ໂທດ​ລະດັບ​ຊາດ.

ທ່ານ ຄຳ​ສານ ສຸ​ວົງ ກຳມະການ​ສູນ​ກາງ​ພັກ ຫົວໜ້າ​ອົງການ​ໄອ​ຍະ​ການ​ປະຊາຊົນ​ສູງ​ສຸດ ໄດ້​ຜ່ານ​ບົດ​ສະຫຼຸບ​ຕີ​ລາຄາ​ການຈັດຕັ້ງ​ປະຕິບັດ​ວຽກ​ງານ​ອະໄພ​ຍະ​ໂທດ ປະຈຳ​ປີ 2019 ແລະ ທິດ​ທາງ​ວຽກ​ງານ​ຈຸດ​ສຸມ ປີ 2020 ວ່າ: ໂດຍ​ປະຕິບັດ​ຕາມ​ມາດຕາ 67 ຂໍ້ 12 ຂອງ​ລັດ​ຖະ​ທຳ​ມະນູນ ແຫ່ງ ສປປ ລາວ ແລະ ລັດ​ຖະ​ບັນຍັດ​ຂອງ​ປະທານ​ປະເທດ ວ່າ​ດ້ວຍ​ການ​ອະໄພ​ຍະ​ໂທດ ສະບັບ​ເລກ​ທີ 001/ປປທ, ລົງ​ວັນ​ທີ 20 ມີນາ 2018 ເຫັນ​ວ່າ​ວຽກ​ງານ​ອະໄພ​ຍະ​ໂທດ ປະຈຳ​ປີ 2019 ແມ່ນ​ເຮັດ​ໄດ້​ດີ ເຊັ່ນ: ຮັບປະກັນ​ຄວາມ​ຖືກຕ້ອງ ສອດຄ່ອງ​ຕາມ​ລັດ​ຖະ​ບັນຍັດ ຂອງ​ປະທານ​ປະເທດ ວ່າ​ດ້ວຍ​ອະໄພ​ຍະ​ໂທດ​ສະແດງ​ອອກ​ຄື: ນັກໂທດ​ທີ່​ໄດ້​ຮັບ​ການ​ອະໄພ​ຍະ​ໂທດ​ຕາມ ລັດ​ຖະ​ດຳລັດ ຂອງ​ປະທານ​ປະເທດ ໃນ​ປີ 2019 ທັງ​ໝົດ​ມີ 2.146 ຄົນ ຍິງ 347 ຄົນ, ຕ່າງປະເທດ 39 ຄົນ ຍິງ 2 ຄົນ, ນັກໂທດ​ຕະຫຼອດ​ຊີວິດ 45 ຄົນ ຍິງ 3 ຄົນ ຊຶ່ງ​ໄດ້​ແຍກ​ອອກ​ເປັນ​ສອງ​ປະເພດ​ຄື: ອະໄພ​ຍະ​ໂທດ​ຫຼຸດຜ່ອນ​ໂທດ​ມີ​ທັງ​ໝົດ 1.824 ຄົນ ຍິງ 291 ຄົນ, ຕ່າງປະເທດ 34 ຄົນ ຍິງ  2 ຄົນ ໃນ​ນີ້​ມີ ນັກໂທດ​ຄະດີ​ຢາ​ເສບ​ຕິດ 1.736 ຄົນ ຍິງ 276 ຄົນ, ຕ່າງປະເທດ 21 ຄົນ ຍິງ 1 ຄົນ, ນັກໂທດ​ຕະຫຼອດ​ຊີວິດ 45 ຄົນ  ຍິງ  3 ຄົນ, ຕ່າງປະເທດ  2 ຄົນ, ນັກ​ໂທດ ຄະດີ​ທົ່ວ​ໄປ 87 ຄົນ ຍິງ 15  ຄົນ, ຕ່າງປະເທດ 13 ຄົນ ຍິງ 1 ຄົນ ແລະ ນັກໂທດ​ຄະດີ​ກະທຳ​ຜິດຕໍ່​ຄວາມ​ສະຫງົບ​ຂອງ​ຊາດ 1 ຄົນ. ອະໄພ​ຍະ​ໂທດ​ປ່ອຍ​ຕົວ​ທັງ​ໝົດ​ມີ  322 ຄົນ, ຕ່າງປະເທດ 5 ຄົນ ໃນ​ນີ້​ມີ​ນັກໂທດ​ຄະດີ​ຢາ​ເສບ​ຕິດ 310 ຄົນ ຍິງ 56 ຄົນ ຕ່າງປະເທດ 5 ຄົນ ແລະ ນັກໂທດ​ຄະດີ​  ທົ່ວ​ໄປ 12 ຄົນ.

ຈາກ​ນັ້ນ​ກໍ​ໄດ້​ມີ​ການ​ປະດັບ​ຫຼຽນ​ໃຫ້​ແກ່​ບຸກ​ຄົນ ແລະ ກົມ​ກອງ ທີ່​ມີ​ຄຸນງາມຄວາມດີ​ໃນ​ການ​ປະກອບ​ສ່ວນ​ເຂົ້າ​ໃນ​ວຽກ​ງານ​ໄອ​ຍະ​ການ​ປະຊາຊົນ ຕະຫຼອດ​ໄລຍະ 30 ປີຜ່ານມາ ມີ​ດັ່ງ​ລຸ່ມ​ນີ້: ປະດັບ​ຫຼຽນ​ໄຊ​ອິດສະຫຼະ​ຊັ້ນ II ໃຫ້ 6 ທ່ານ; ປະດັບ​ຫຼຽນ​ໄຊ​ອິດສະຫຼະ​ຊັ້ນ III ໃຫ້ 3 ກົມ​ກອງ ແລະ ບຸກຄົນ12 ທ່ານ; ປະດັບ​ຫຼຽນ​ໄຊ​ແຮງ​ງານ​ຊັ້ນ I ໃຫ້ 9 ກົມ​ກອງ ແລະ ບຸກຄົນ 65 ທ່ານ; ປະດັບ​ຫຼຽນ​ໄຊ​ແຮງ​ງານ​ຊັ້ນ II ໃຫ້ 2 ກົມ​ກອງ ແລະ ບຸກຄົນ 214 ທ່ານ; ປະດັບ​ຫຼຽນ​ໄຊ​ແຮງ​ງານ​ຊັ້ນ III ໃຫ້ 19 ກົມ​ກອງ; ໃບ​ຍ້ອງຍໍ​ລັດຖະບານ ໃຫ້​ບຸກຄົນ 648 ທ່ານ ;ໃບ​ຍ້ອງຍໍ​ຫົວໜ້າ ອອປສ ໃຫ້ 4 ກົມ​ກອງ ແລະ ບຸກຄົນ  460 ທ່ານ. 

ໃນ​ຕອນ​ທ້າຍ​ຂອງ​ກອງ​ປະຊຸມ ທ່ານ ສອນ​ໄຊ ສີ​ພັນ​ດອນ​ ໄດ້​ໃຫ້​ກຽດ​ໂອ້​ລົມ​ໃຫ້​ທິດ​ຊີ້​ນຳ​ຕໍ່​ກອງ​ປະຊຸມ ກ່ອນ​ອື່ນ​ທ່ານ​ໄດ້​ສະແດງ​​ຄວາມ​ຍ້ອງຍໍ​ຊົມເຊີຍ​ໂດຍ​ສະເພາະ​ໃນ 1 ປີຜ່ານມາ ສານ​ທັງ​ສາມ​ຂັ້ນ ໄດ້​ພິຈາລະນາ​ຕັດສິນ ແລະ ພິພາກສາ ເອົາ​ຕາມ​ການ​ຖະແຫຼງ​ຂອງ​ຫົວໜ້າ​ອົງການ​ໄອ​ຍະ​ການປະຊາຊົນ ໂດຍ​ສະເລ່ຍ​ຄະດີ​ອາຍາ 97,03% ແລະ ຄະດີ​ແພ່ງ 95,03% ທຽບ​ໃສ່​ຄາດໝາຍ​ທີ່​ໄດ້​ວາງ​ໄວ້ 95% ເຫັນ​ວ່າ​ລື່ນ​ຄາດໝາຍ ຄຽງ​ຄູ່​ກັບ​ຜົນສຳເລັດ​ທີ່​ຍາດ​ມາ​ໄດ້​ນັ້ນ​ແຕ່​ຕ້ອງ​ໄດ້​ສຸມ​ໃສ່​ປັບປຸງ​ແກ້​ໄຂ​ບາງ​ຈຸດ​ເພື່ອ​ບັນລຸ​ທິດ​ທາງ​ຄາດໝາຍ​ສູ້​ຊົນ​ທີ່​ໄດ້​ວາງ​ໄວ້​ດັ່ງນີ້: ດ້ານ​ວຽກ​ງານ​ໄອ​ຍະ​ການ ໜຶ່ງ: ​ສືບ​ຕໍ່​ປັບປຸງ​ກົງຈັກ​ການຈັດຕັ້ງ ແລະ ກໍ່ສ້າງ​ພັກ​-​ພະນັກງານ”, ໃຫ້ເອົາໃຈ​ໃສ​່ຕື່ມ ໃນ​ການ​ສຶກສາ​ອົບຮົມ​ວຽກ​ງານ​ການ​ເມືອງ​-​ແນວ​ຄິດ, ຄຸນ​ທາດ​ການເມືອງ​ເພື່ອ​ໃຫ້​ມີຄວາມ​ຮູ້, ຄວາມ​ເຂົ້າໃຈ ຕໍ່​ແນວທາງ​ນະໂຍບາຍ​ຂອງ​ພັກ, ກົດ​ໝາຍ​ຂອງ​ລັດ ເພື່ອ​ເຮັດ​ ວຽກ​ງານ​ໄອຍະ​ການມີ​ການ​ຫັນປ່ຽນ ແລະ ພັດທະນາ ສູ່​ຄຸນ​ນະ​ພາບ​ໃໝ່. ສອງ:  ສືບຕໍ່​ເພີ່ມ​ທະວີ​ການ​ຕິດຕາມ​ກວດກາການ​ປະຕິບັດ​ກົດໝາຍຢູ່​ໃນ​ກົງຈັກ​ລັດແຕ່​ລະ​ຂັ້ນໃຫ້​ແຂງແຮງ​ຂຶ້ນ​ກວ່າ​ເກົ່າ ເປັນຕົ້ນ​ແມ່ນ ຕິດຕາມ​ກວດກາ​ການ​ປະຕິບັດ ກົດໝາຍ ຂອງ​ເຈົ້າ​ໜ້າທີ່​ສືບ​ສວນ​-​ສອບ​ສວນ ໃນ​ການ​ນໍາ​ໃຊ້ 7 ມາດ​ຕະການ​ສະກັດ​ກັ້ນ ໃຫ້​ຖືກຕ້ອງ ແລະ ຊອກ​ຫາ​ວິທີ​ປັບປຸງ ແລະ ຍົກ​ສູງ​ຄຸນ​ນະ​ພາບ ຂອງ​ການ​ດໍາ​ເນ​ີນຄະດີ ແລະ ການ​ສັ່ງ​ຟ້ອງ ໃຫ້​ກ້າວ​ຂຶ້ນ​ສູ່​ຄຸນ​ນະ​ພາບ​ໃ​ໝ່ ໃຫ້​ປະກົດ​ຜົນ​ສໍາ​ເລັດ ແລະ ເປັນ​ຮູບ​ປະ​ທໍາ ແລະ ສາມ: ເພີ່ມ​ທະວີ​ການ​ຕິດຕາມ​ກວດກາ ການ​ປະຕິບັດ​​ໜ້າທີ່​ຂອງ​ພະນັກງານ​ລັດ ຕາມ​ທີ່​ກົດ​ໝາຍ​ໄດ້​ກໍາ​ນົດ​ໄວ້  ຊຶ່ງ​ຜ່ານມາ​ເຫັນ​ວ່າ​ຍັງ​ບໍ່​ທັນ​ເຂັ້ມ​ງວດ​ເທົ່າ​ທີ່​ຄວນ. ໂດຍ​ສະເພາະ ແມ່ນ ການ​ກັກ​ຕົວ ທີ່​ບໍ່​ຖືກຕ້ອງ, ການ​ກັກ​ຕົວ ເກີນ​ກໍາ​ນົດ ແລະ ອື່ນໆ   ດ້ານ​ວຽກ​ງານ​ອະໄພ​ຍະ​ໂທດ​ໃຫ້​ສືບ​ຕໍ່​ດັ່ງນີ້:

1. ໃຫ້​ຄະ​ນະ​ກໍາ​ມະ​ການ ​ອະໄພ​ຍະ​ໂທດ ລະດັບຊາດ ເປັນ​ເຈົ້າ​ການ​ສືບຕໍ່​ຈັດ​ຕັ້ງ​ເຊື່ອມ​ຊຶມ ລັດຖະ​ບັນຍັດ ແລະ ຄໍາ​ແນະ​ນໍາ ຂອງ​ຄະ​ນະ​ກໍາ​ມະ​ການ​ອະໄພ​ຍະ​ໂທດ​ລະດັບ​ຊາດ ໃຫ້​ຄະ​ນະ​ກໍາ​ມະ​ການ ຂັ້ນ​ຕ່າງໆ ໄດ້​ຮັບ​ຮູ້ ແລະ ເຂົ້າໃຈ​ເລິກເຊິ່ງ ພ້ອມ​ທັງ​ຈັດ​ຕັ້ງ​ການ​ເຜີຍແຜ່ ໃຫ້​ຊັ້ນ​ຄົນ ແລະ ສັງຄົມ ຢ່າງ​ກວ້າງຂວາງ;

2. ຍົກ​ສູງ​ຄວາມ​ຮັບຜິດ ຊອບ ແລະ ເປັນ​ເຈົ້າ​ການ ຂອງ​ຄະ​ນະ​ກໍາ​ມະ​ການ ລະດັບຕ່າງໆ ໃນການ​ຄົ້ນຄວ້າ ຈໍາ​ນວນ​ນັກ ໂທດ ທີ່​ຈະ​ໃຫ້ການ​ອະໄພ​ຍະ​ໂທດ ຕ້ອງ​ຮັບປະກັນ​ຄວາມ​ຖືກຕ້ອງ, ຄວາມ​ໂປ່​ງ​ໃສ, ຍຸ​ຕິ​ທໍາ ແລະ ທັນ​ຕາມ​ກໍາ​ນົດ​ເວລາ.

3 ເພີ່ມ​ທະວີ​ການ​ຊີ້ນຳ​ນຳພາ ຂອງ​ຄະນະ​ພັກ ຄະນະ ນໍາ​ກະຊວງ, ຄະນະ​ພັກ, ອົງ ການ​ ການປົກ​ຄອງ​ແຂວງ​- ນະຄອນຫຼວງ ໃຫ້​ຫຼາຍຂຶ້ນ​ກວ່າ​ເກົ່າ, ໃນ​ນີ້ ໃຫ້​ຈັດ​ສັນ​ງົບ ປະມານ​ຂອງ​ກະຊວງ ແລະ ແຂວງ​-​ ນະຄອນຫຼວງ ໃຫ້​ແກ່​ວຽກ​ງານ​ອະໄພ​ຍະ​ໂທດ​ຢູ່​ຂັ້ນ​ຂອງ​ຕົນ ຕາມ​ໜ້າ​ວຽກ​ງານ​ຕົວ​ຈິງ ເພື່ອ​ເຮັດ​ໃຫ້​ວຽກ​ງານ​ດັ່ງກ່າວ​ໄດ້​ຮັບ​ການຈັດຕັ້ງ​ປະຕິບັດ.

4. ມອບ​ໃຫ້​ຄະ​ນະ​ກໍາ​ມະ​ການ​ອະໄພ​ຍະ​ໂທດ ລະດັບ​ຕ່າງໆ ນໍາ​ເອົາ​ເນື້ອ​ໃນ​ຂອງ​ກອງ​ປະຊຸມ​ຄັ້ງ ນີ້ ໄປ​ຈັດ​ຕັ້ງ​ປະຕິບັດ​ໃຫ້​ມີ​ຜົນ​ສໍາ​ເລັດ ແລະ ທັນ​ກໍາ​ນົດ​ເວ​ລາ​.

Medialaos