ນາຍົກລັດຖະມົນຕີ ເນັ້ນການພັດທະນາກະສິກຳສະອາດ ແລະ ສີຂຽວ ຢູ່ເມືອງສັງທອງ

0
162

ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ ເມືອງສັງທອງ ນະຄອນຫລວງວຽງຈັນ, ໂດຍມີຈຸດປະສົງເພື່ອຊຸກຍູ້ ແລະ ສົ່ງເສີມຂະບວນການ ຜະລິດຂອງ ປະຊາຊົນ ໃຫ້ຕິດພັນກັບ ກະສິກຳສະອາດ ແລະ ສີຂຽວ ແນ່ໃສ່ເຮັດໃຫ້ ການພັດທະນາມີຄວາມຍືນຍົງ ແລະ ປອດໄພ ຕໍ່ຊຸມຊົນ.

ໃນໂອກາດລົງຢ້ຽມຢາມ ວັນທີ 7 ກຸມພາ 2020, ທ່ານນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ບັນດາການນຳ ຂອງເມືອງສັງທອງ ທີ່ເຮັດໃຫ້ເມືອງຂອງຕົນເອງ ໄດ້ມີການພັດທະນາຢ່າງຕໍ່ເນື່ອງ ແລະ ມີໃບໜ້າໃໝ່ ຕະຫລອດໄລຍະຜ່ານມາ ເປັນຕົ້ນແມ່ນ ການພັດທະນາພື້ນຖານໂຄງລ່າງ ແລະ ການຊອກຫາທ່າແຮງບົ່ມຊ້ອນ ໂດຍໄດ້ມີການ ຊຸກຍູ້ສົ່ງເສີມ ໃຫ້ພໍ່ແມ່ປະຊາຊົນ ຂຸດຄົ້ນ ແລະ ນຳໃຊ້ຊັບພະຍາກອນທຳມະຊາດ ທີ່ມີເພື່ອມາປຸງແຕ່ງ ເປັນຜະລິດຕະພັນ ທີ່ມີມູນຄ່າ ແລະ ສ້າງລາຍຮັບເຂົ້າສູ່ຄອບຄົວ, ເຮັດໃຫ້ປະຊາຊົນມີວຽກເຮັດງານທຳ ແລະ ມີລາຍຮັບຢ່າງຕໍ່ເນື່ອງ ເພື່ອກ້າວໄປ ສູ່ການຫລຸດພົ້ນ ອອກຈາກຄວາມທຸກຍາກເທື່ອລະກ້າວ. ໃນຂະນະດຽວກັນ, ກໍຍັງສາມາດດຶງດູດເອົາການລົງທຶນ, ການຮ່ວມມື ແລະ ການຊ່ວຍເຫລືອ ຈາກໂຄງການຕ່າງໆທັງພາຍໃນ ແລະ ຕ່າງປະເທດ ເຂົ້າມາພັດທະນາເມືອງສັງທອງ ເພື່ອເຮັດໃຫ້ ເສດຖະກິດ-ສັງຄົມ ມີການພັດທະນາ ແລະ ຊີວິດການເປັນຢູ່ຂອງພໍ່ແມ່ປະຊາ ຊົນໄດ້ຮັບການປັບປຸງ ໃຫ້ນັບມື້ນັບດີຂຶ້ນ ເທື່ອລະກ້າວ. ພ້ອມດຽວກັນນັ້ນ, ທ່ານນາຍົກລັດຖະມົນຕີ ກໍໄດ້ເນັ້ນໃຫ້ອຳນາດ ການປົກຄອງເມືອງສັງທອງ ກໍຄື ພໍ່ແມ່ປະຊາຊົນ ໃຫ້ສືບຕໍ່ເອົາໃຈໃສ່ ຂະຫຍາຍທ່າແຮງຂອງຕົນ ເປັນຕົ້ນແມ່ນ ການພັດທະນາຂະແໜງກະສິກຳ ແລະ ການທ່ອງທ່ຽວ ໄປຄຽງຄູ່ກັບການພັດທະ ນາອຸດສາຫະກຳ ໂດຍໃຫ້ມີການວາງແຜນລະອຽດຊັດເຈນ ແລະ ແທດເໝາະກັບ ສະພາບເງື່ອນໄຂຂອງແຕ່ລະອັນ.

ໂອກາດດຽວກັນ, ທ່ານ ດາວເພັດ ອາລຸນ ເຈົ້າເມືອງສັງທອງ ກໍໄດ້ລາຍງານ ກ່ຽວກັບສະພາບການພັດທະນາ ເສດຖະກິດ-ສັງຄົມ ຂອງເມືອງໂດຍຫຍໍ້ ໂດຍເນັ້ນວ່າ: ລະລົບໂຄງລ່າງພື້ນຖານ ໄດ້ມີການຂະຫຍາຍຕົວ ແລະ ອຳນວຍຄວາມ ສະດວກ ໃຫ້ແກ່ຂະບວນການຜະລິດ ແລະ ການບໍລິການຕ່າງໆ ເຊິ່ງສິ່ງເຫລົ່ານີ້ ໄດ້ເຮັດໃຫ້ເມືອງສັງທອງ ມີການພັດທະນາ ຢ່າງຕໍ່ເນື່ອງ. ທົ່ວເມືອງສັງທອງ ມີເນື້ອທີ່ກະສິກຳທັງໝົດ 29 ພັນກວ່າເຮັກຕາ, ເຊິ່ງໃນປີ 2019 ສາມາດຜະລິດເຂົ້ານາປີໄດ້ 8.500 ເຮັກຕາ, ນາແຊງ​ 53 ເຮັກຕາ, ພືດອຸດສາຫະກຳ 1.155 ເຮັກຕາ, ໄມ້ໃຫ້ໝາກ 216 ເຮັກຕາ ແລະ ສຳລັບການລ້ຽງສັດ ມີທັງໝົດ 128.000 ກວ່າໂຕ, ໄດ້ລ້ຽງເປັນຟາມ 11 ​ຟາມ ປະກອບມີ ງົວ,​ ແບ້,​ ໝູ, ໄກ່ ແລະ ເຕົ່າ.

ນອກຈາກນັ້ນ, ຄະນະດັ່ງກ່າວກໍໄດ້ລົງຢ້ຽມຢາມ ພື້ນຖານການຜະລິດຂອງ ພໍ່ແມ່ປະຊົນ ເປັນຕົ້ນແມ່ນກຸ່ມການ ຜະລິດຕະພັນ ໄມ່ປ່ອງ ຢູ່ບ້ານນາປໍ, ຟາມລ້ຽງງົວ ຢູ່ບ້ານເພຍລາດ, ຟາມເຕົ່າ, ຟາມປູກ  ໝາກແຕງ, ລວມທັງພົບປະໂອ້ລົມ ແລະ ຊຸກພໍ່ແມ່ປະຊາຊົນບ້ານຊໍ້, ເຊິ່ງແມ່ນໜຶ່ງໃນສາມບ້ານຂອງໂຄງການທົດລອງຮ່ວມມື ແກ້ໄຂຄວາມທຸກຍາກ ລາວ-ຈີນ ທີ່ເປັນໂຄງກາຮ່ວມມື ລະຫວ່າງສອງລັດຖະ ບານ ມູນຄ່າ 40 ຕື້ກວ່າກີບ ແນ່ໃສ່ພັດທະນາໂຄງລ່າງພື້ນຖານ ແລະ ປັບປຸງຊີວິດການເປັນຢູ່ຂອງປະຊາຊົນ.

Medialaos