ກອງປະຊຸມໃຫຍ່ອົງຄະນະພັກເມືອງເຊໂປນຄັ້ງທີ XI ໄດ້ເປີດຂຶ້ນຢ່າງເປັນທາງການ

0
469

ກອງປະຊຸມໃຫຍ່ອົງຄະນະພັກເມືອງເຊໂປນຄັ້ງທີ 11 ໄດ້ໄຂຂຶ້ນຢ່າງເປັນທາງການ ໃນວັນທີ 10 ກຸມພາ 2020 ນີ້ ຢູ່ທີ່ສະໂມສອນຂອງເມືອງ. ໂດຍການເຂົ້າຮ່ວມສະຫາຍ ທ່ອນແກ້ວ ພຸດທະໄກຍະລາດ ຄະນະປະຈໍາພັກແຂວງ ຮອງເຈົ້າແຂວງສະຫວັນນະເຂດ,ສະຫາຍ ວົງສະຫວັນ ວຽງມະນີ ວ່າການເລຂາພັກເມືອງ ເຈົ້າເມືອງເຊໂປນ ພ້ອມດ້ວຍບັນດາສະຫາຍຜູ້ແທນສົມບູນ ຈຳນວນ 159 ສະຫາຍ,ຍິງ 16 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກໃນທົ່ວເມືອງເຊໂປນທັງໝົດ 1.795 ສະຫາຍ, ຍິງ 456 ເຂົ້າຮ່ວມ.

ສະຫາຍ ວົງສະຫວັນ ວຽງມະນີ ວ່າການເລຂາພັກເມືອງ ເຈົ້າເມືອງເຊໂປນ ໄດ້ກ່າວໄຂກອງປະຊຸມໃຫຍ່ອົງຄະນະພັກເມືອງເຊໂປນ ຄັ້ງທີ 11 ຢ່າງເປັນທາງການວ່າ: .ໃນທ່າມກາງບັນຍາກາດແຫ່ງຄວາມພາກພູມໃຈ ແລະ ເບີກບານມ່ວນຊື່ນຂອງທົ່ວພັກ, ທົ່ວກອງທັບ, ທົ່ວປວງຊົນຊາວເມືອງເຊໂປນ ຕໍ່ຜົນງານຕ່າງໆທີ່ຍາດມາໄດ້ ຜ່ານການຈັດຕັ້ງປະຕິບັດກອງປະຊຸມໃຫຍ່ຄັ້ງທີ 10 ອົງຄະນະພັກເມືອງຂອງຕົນໃນຊຸມປີຜ່ານມາ ບັນດາສະຫາຍພະນັກງານສະມາຊິກພັກ ແລະປະຊາຊົນບັນດາເຜົ່າ,ພາຍໃນເມືອງຕ່າງກໍ່ເປັນເຈົ້າການແຂ່ງຂັນສ້າງຜົນງານປະຕິບັດໜ້າທີ່ວິຊາສະເພາະຂັ້ນຂອງຕົນ, ເຂົ້າຮ່ວມໃນຂະບວນການວຽກງານຕ່າງໆ, ເປັນເຈົ້າການໃນການປົກປັກຮັກສາສະຖຽນລະພາບດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມ, ຊຸກຍູ້-ສົ່ງເສີມທາງດ້ານເສດຖະກິດ ແລະການຜະລິດສິນຄ້າ ກໍ່ຄືວຽກງານດ້ານອື່ນໆ ໂດຍສະເພາະແມ່ນການຍົກສູງຈິດໃຈເປັນເຈົ້າຂອງປະເທດຊາດເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງຢ່າງເປັນຂະບວນຟົດຟື້ນ.

ໂອກາດກ່າວໄຂກອງປະຊຸມຄັ້ງນີ້ ສະຫາຍ ວົງສະຫວັນ ວຽງມະນີ ວ່າການເລຂາພັກເມືອງ ຍັງໄດ້ຮຽກຮ້ອງມາຍັງຜູ້ແທນສົມບູນ ແລະແຂກທັງຫຼາຍ ຈົ່ງພ້ອມກັນສຸມທຸກກໍາລັງເຫື່ອແຮງ, ສະຕິປັນຍາ ເຂົ້າໃນການຄົ້ນຄວ້າເນື້ອໃນບົດລາຍງານການເມືອງກໍ່ຄືທິດທາງແຜນການພັດທະນາເສດທະກິດ – ສັງຄົມຂອງເມືອງ 5 ປີຕໍ່ໜ້າຕະຫຼອດຮອດວຽກງານຕ່າງໆ ເພື່ອເຮັດໃຫ້ກອງປະຊຸມຄັ້ງນີ້ດໍາເນີນໄປດ້ວຍຜົນສໍາເລັດຢ່າງຈົບງາມ.
ໂອກາດດຽວກັນນີ້ ສະຫາຍ ວົງສະຫວັນ ວຽງມະນີ ວ່າການເລຂາພັກເມືອງ ກໍ່ໄດ້ຜ່ານບົດລາຍງານການເມືອງພາກ 1 ແລະ ພາກ 2 ເຊິ່ງໃຫ້ຮູ້ວ່າ: ຕະຫຼອດໄລຍະ 5 ປີຜ່ານມາ ຄະນະພັກທຸກຂັ້ນໄດ້ຖືເອົາວຽກງານສຶກສາອົບຮົມການເມືອງແນວຄິດເປັນບັນຫາກົກ,ຫັນເອົາລະບົບການຈັດຕັ້ງພັກແຕ່ຂັ້ນເມືອງລົງຮອດຮາກຖານກຸ່ມບ້ານ. ທົ່ວເມືອງມີ 19 ຄະນະພັກຮາກຖານ ເພີ່ມຂຶ້ນ 3 ຮາກຖານ, ມີໜ່ວຍພັກທັງໝົດ 132 ໜ່ວຍ ເພີ່ມຂຶ້ນເກືອບ 40ສ່ວນຮ້ອຍ, ມີສະມາຊິກພັກທັງໝົດ 1.795 ສະຫາຍ, ຍິງ 456 ສະຫາຍ ເພີ່ມຂຶ້ນ 485 ສະຫາຍ, ສະມາຊິກພັກສົມບູນໄດ້ຮັບບັດແດງແລ້ວ 1.092 ສະຫາຍ, ຍິງ 261 ສະຫາຍ ເທົ່າກັບ 69ກວ່າສ່ວນຮ້ອຍ ຂອງສະມາຊິກພັກສົມບູນທັງໝົດ. ດ້ານວຽກງານເສດຖະກິດ – ສັງຄົມໄດ້ມີການຂະຫຍາຍຕົວຢ່າງຕໍ່ເນື່ງ,ໝັ້ນທ່ຽງ ແລະ ຖືກທິດ ອັດຕາການຂະຫຍາຍຕົວສະເລ່ຍ 6ກວ່າສ່ວນຮ້ອຍ ລວມຍອດຜະລິດຕະພັນພາຍໃນ GDP ໄດ້ 458 ຕື້ກວ່າກີບ,ທຽບໃສ່ປີ 2014 ເພີ່ມຂຶ້ນ 158 ຕື້ກວ່າກີບ ສະເລ່ຍໃສ່ຫົວຄົນບັນລຸໄດ້ 7.370.000 ກີບ ຫຼື ເທົ່າກັບ 877 ໂດລາຕໍ່ຄົນຕໍ່ປີ.

ສຳລັບທິດທາງແຜນການໃນ 5 ປີຕໍ່ໜ້າອົງຄະນະພັກເມືອງເຊໂປນແມ່ນຈະໄດ້ສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະແມ່ນຄວາມຫຍຸ້ງຍາກທາງດ້ານເສດຖະກິດ ສຳລັບແຂວງກໍ່ຄືເມືອງເຊໂປນແມ່ນຍັງມີຫຼາຍບັນຫາທີ່ຈະຕ້ອງໄດ້ປະເຊີນໜ້າ ເປັນຕົ້ນ ບັນຫາປະກົດການຫຍໍ້ທໍ້ຕ່າງໆ,ປະຊາຊົນສ່ວນຫຼາຍເປັນຊາວກະສິກອນ, ເຄື່ອງມືການຜະລິດຍັງບໍ່ທັນສະໄໝ, ການຜະລິດຍັງອີງໃສ່ທຳມະຊາດ,ພື້ນຖານໂຄງລ່າງທີ່ຈໍາເປັນບາງດ້ານຍັງບໍ່ສາມາດຕອບສະໜອງໄດ້,ຖານລາຍຮັບງົບປະມານຂອງເມືອງຍັງມີໜ້ອຍແຕ່ຄວາມຕ້ອງການຈ່າຍສູງ ແຕ່ພາຍໃຕ້ການນໍາພາຂອງສູງກາງພັກຂອງອົງຄະນະພັກແຂວງ ແລະ ຄວາມຮັບຜິດຊອບອັນສູງສົ່ງຂອງທົ່ວອົງຄະນະພັກເມືອງເຊໂປນເຊື່ອໝັ້ນວ່າບັນຫາຄວາມຫຍຸ້ງຍາກເຫຼົ່ານີ້ຕ້ອງໄດ້ຮັບການແກ້ໄຂໃຫ້ດີຂຶ້ນ.
ຈາກນັ້ນໃນກອງປະຊຸມສະຫາຍ ສົມບັດ ອິດທະວົງ ກໍາມະການພັກເມືອງ ຫົວໜ້າຫ້ອງການແຜນການ ແລະ ການລົງທຶນເມືອງກໍ່ໄດ້ຜ່ານແຜນພັດທະນາເສດທະກິດ – ສັງຄົມ 5 ປີຄັ້ງທີ 11 ປີ 2020-2024 ຂອງເມືອງເຊໂປນຕື່ມອີກ.

savannakhet medialaos