ຕອນບ່າຍ ວັນທີ 5 ກຸມພາ 2020 ນີ້, ກອງບັນຊາການ ປກສ ແຂວງບໍລິຄໍາໄຊ ໄດ້ນໍາເອົາລົດມອດໄຟ ຈໍານວນ 01 ຄັນ ໄປມອບໃຫ້ກອງບັນຊາການ ປກສ ເມືອງບໍລິຄັນ ແຂວງບໍລິຄໍາໄຊ, ກ່າວມອບໂດຍ ທ່ານ ພັນໂທ ກົງຈັນ ໄຊປັນຍາ ວ່າການເລຂາຄະນະພັກ ຮັກສາການຫົວໜ້າກອງບັນຊາການ ປກສ ແຂວງບໍລິຄໍາໄຊ, ກ່າວຮັບໂດຍ ທ່ານ ພັນໂທ ແກ້ວສຸວັນ ວັນນະແຝງ ຫົວໜ້າກອງບັນຊາການ ປກສ ເມືອງ, ມີທ່ານ ນາງ ວາລີ ສຸດທະວົງ ຫົວໜ້າຄະນະຈັດຕັ້ງເມືອງ, ມີ ພະນັກງານ-ນັກຮົບ ເຂົ້າຮ່ວມ ເປັນສັກຂີພະຍານ.

ທ່ານ ພັນໂທ ກົງຈັນ ໄຊປັນຍາ ໄດ້ກ່າວວ່າ: ຍ້ອນເຫັນໄດ້ຄວາມຂາດເຂີນ ແລະ ບໍ່ພຽງພໍ ດ້ານພາຫະນະຮັບໃຊ້ກ່ຽວກັບວຽກງານວິຊາສະເພາະ ຂອງກອງບັນຊາການ ປກສ ເມືອງບໍລິຄັນ, ໂດຍສະເພາະແມ່ນວຽກງານສະກັດກັ້ນ ແລະ ຕ້ານອັກຄີໄພ, ຈຶ່ງໄດ້ນໍາເອົາ ລົດມອດໄຟ ຈໍານວນ 01 ຄັນ ມາມອບໃຫ້ ເພື່ອນໍາໃຊ້ເຂົ້າໃນວຽກງານວິຊາສະເພາະ ເປັນຕົ້ນ ແມ່ນວຽກງານສະກັດກັ້ນ ແລະ ຕ້ານອັກຄີໄພ ໃຫ້ພຽງພໍກັບຄວາມຮຽກຮ້ອງຕ້ອງການຂອງຫນ້າທີ່ວຽກງານໃນໄລຍະໃໝ່ ເພື່ອນໍາໃຊ້ເຂົ້າໃນການດັບມອດໄຟໃນເວລາເກີດເຫດອັກຄີໄພ-ໄຟໄຫມ້ ໃຫ້ທັນເວລາ, ແນ່ໃສ່ເພື່ອປົກປ້ອງຊີວິດ, ສຸຂະພາບ ແລະ ຊັບສິນຂອງພໍ່ແມ່ປະຊາຊົນບັນດາເຜົ່າ.

ໃນໂອກາດດຽວກັນ ທ່ານ ພັນໂທ ແກ້ວສຸວັນ ວັນນະແຝງ ຕາງໜ້າຄະນະພັກ-ຄະນະກອງບັນຊາການ ປກສ ເມືອງ ຕະຫຼອດຮອດພະນັກງານ-ນັກຮົບ ໄດ້ກ່າວສະແດງຄໍາຂອບໃຈທ່ານ ພັນໂທ ກົງຈັນ ໄຊປັນຍາ ພ້ອມດ້ວຍຄະນະ ທີ່ນໍາເອົາລົດຄັນດັ່ງກ່າວມາມອບໃຫ້ໃນຄັ້ງນີ້ ແລະ ຈະນໍາໃຊ້ເຂົ້າໃນວຽກງານວິຊາສະເພາະໃຫ້ໄດ້ຮັບຜົນສໍາເລັດຢ່າງມີປະສິດທິຜົນສູງ, ອວຍພອນໄຊແດ່ທ່ານພ້ອມດ້ວຍຄະນະ, ຈົ່ງມີສຸຂະພາບແຂງແຮງປະສົບຜົນສໍາເລັດໃນໜ້າທີ່ວຽກງານ ສືບຕໍ່ຊີ້ນໍາ-ນໍາພາ ກໍາລັງປ້ອງກັນຄວາມສະຫງົບ ແຂວງບໍລິຄຳໄຊ ກໍ່ຄືກຳລັງ ປກສ ເມືອງບໍລິຄັນ ໃຫ້ມີບາດກ້າວເຕີບໃຫຍ່ຂະຫຍາຍຕົວດີຂຶ້ນເປັນກ້າວໆ.

Medialaos bolikhamxay