ຂະບວນການຊາວໜຸ່ມຕະລຸມບອນ ແຂວງອຸດົມໄຊ ຮ່ວມໃຈກັນບໍລິຈາກເລືອດ ຊ່ວຍຊີວິດເພື່ອນມະນຸດດ້ວຍກັນໃນສັງຄົມ ເພື່ອຄຳນັບຮັບຕ້ອນກອງປະຊຸມໃຫຍ່ຄັ້ງທີ 8 ຜູ້ແທນຊາວໜຸ່ມທົ່ວແຂວງ ອຸດົມໄຊ, ໂດຍສົມທົບກັບສູນເລືອດແຂວງ ອຸດົມໄຊ ລົງປຸກສະດົມຮັບບໍລິຈາກເລືອດຢູ່ໂຮງຮຽນມັດທະຍົມສົມບູນເທດສະບານແຂວງ, ໂດຍສະເພາະແມ່ນ ນັກຮຽນ ຊັ້ນ ມ6 ແລະ ມ 7,

ໃນພິທີ ແມ່ນໄດ້ອະທິບາຍຄວາມໝາຍຄວາມສຳຄັນຂອງເລືອດ, ໃນການນຳໄປຊ່ວຍເຫຼືອຄົນເຈັບທີ່ຂາດເລືອດ ແລະ ຄວາມຕື່ນຕົວຂອງບັນດາສະມາຊິກຊາວໜຸ່ມຕະລຸມບອນທີ່ຈະຕ້ອງໄດ້ເສຍສະຫຼະເລືອດຂອງຕົນເອງເພື່ອຊ່ວຍເຫຼືອສັງຄົມ, ຜ່ານການໂຄສະນະເຜີຍແຜ່ຄວາມໝາຍຄວາມສຳຄັນ ຂອງເລືອດແລ້ວ ໄດ້ມີນັກຮຽນ ກໍ່ຄືສະມາຊິກຊາວໜຸ່ມ ທີ່ມີມາດຖານເງືອນໄຂບໍລິຈາກເລືອດເຊັ່ນ: ຕ້ອງມີອາຍຸ ເລີ້ມ 18 ປີ ມີນ້ຳໜັກ 45 ກິໂລ ມີສຸຂະພາບແຂງແຮງດີ ຈີ່ງສາມາດບໍລິຈາກໄດ້, ຜ່ານການກວດສຸຂະພາບຕົວຈີງມີ 25 ຄົນ ແລະ ໄດ້ເລືອດຕົວຈີງ 25 ຖົງ ເຊີ່ງເລືອດທີ່ໄດ້ຮັບຄັ້ງນີ້ແມ່ນຈະໄດ້ນຳໄປຊ່ວຍເຫຼືອຄົນເຈັບຢູ່ໂຮງໝໍແຫ່ງຕ່າງໆໃນທົ່ວແຂວງ ທີ່ຂາດເລືອດໃນການປີ່ນປົວຄົນເຈັບ, ໂອກາດນີ້ ທາງອົງການກາແດງລາວ ກໍ່ໄດ້ມອບໃບຍ້ອງຍໍກົມກອງ ໃຫ້ແກ່ໂຮງຮຽນມັດທະຍົມສົມບູນເທດສະບານແຂວງ ທີ່ໄດ້ປະກອບສ່ວນບໍລິຈາກເລືອດເພື່ອຊ່ວຍສັງຄົມໃນໄລຍະຜ່ານມາ,
ພິທີດັ່ງກ່າວແມ່ນໄດ້ຈັດຂື້ນໃນວັນທີ່ 10 ກຸມພາ 2020 ນີ້ທີ່ ມສ ເທດສະບານແຂວງ, ໂດຍມີ ທ່ານ ຄຳແບ່ງ ຈັນມະນີ ຮອງຄະນະບໍລິຫານງານຊາວໜຸ່ມແຂວງ ອຸດົມໄຊ, ມີທ່ານ ສັງທອງ ສັນຕິສຸກ ຫົວໜ້າສູນເລືອດແຂວງ, ມີທ່ານຫົວໜ້າອຳນວຍການໂຮງຮຽນ ມສ ແຂວງ ພ້ອມດ້ວຍພະນັກງານວິຊາການ ແລະ ນັກຮຽນຊັ້ນ ມ6 ແລະ ມ7 ເຂົ້າຮ່ວມ.

ມີເດຍລາວ ອຸດົມໄຊ
ແສງອາທິດ.