ກອງປະຊຸມໃຫຍ່ ຄັ້ງທີ II ພະແນກ ການເງິນແຂວງ ອັດຕະປື ເລືອກຄະນະພັກຊຸດໃໝ່ 7 ຫາຍ

0
328

ກອງປະຊຸມໃຫຍ່ ສະມາຊິກພັກ ຄັ້ງທີ II ຂອງຄະນະພັກ ຮາກຖານພະແນກການເງິນແຂວງ ອັດຕະປື ທີ່ໄຂຂຶ້ນໃນວັນທີ 10 ກຸມພາ 2020 ຢູ່ຫໍປະຊຸມໃຫຍ່ຂອງແຂວງ ຕາມວາລະຂອງກອງປະຊຸມນັ້ນ ຄະນະພັກຊຸດເກົ່າ ໄດ້ຜ່ານບົດລາຍງານການເມືືຶືຶືອງຕີລາຄາເຖິງຜົນສຳເລັດໃນໄລຍະ 5 ປີ ຜ່ານມາຂອງຄະນະພັກຮາກຖານ ພະແນກການເງິນ ເຊິ່ງໄດ້ກຳນົດທິດທາງໜ້າທີ່, ຄາດໝາຍສູ້ຊົນຜ່ານມາ ແລະ ວຽກງານຈຸດສຸມໃນໄລຍະ 5 ປີ ຕໍ່ໜ້າ, ວິໄສທັດຮອດປີ 2030 ແລະ ແຜນຍຸດທະສາດ ຮອດປີ 2025 ຢ່າງລະອຽດ, ຜ່ານບົດສຳຫຼວດຂອງການນຳພາຂອງ ຄະນະພັກຮາກຖານຊຸດເກົ່າເຫັນວ່າ ຕະຫລອດໄລຍະ 5 ປີຜ່ານມາ ໄດ້ປັບປຸງກົນໄກ ແລະ ລະບົບການຈັດເກັບລາຍຮັບເຂົ້າງົບປະມານໃຫ້ວ່ອງໄວ, ກະທັດຮັດ, ມີຄວມໂປງໄສ ແລະ ທັນສະໄໝ ເຊິ່ງມັນສະແດງອອກດ້ານຕົວເລກປະຕິບັດໄດ້ 710.163.930.000 ກີບ, ເທົ່າກັບ 84,37% ຂອງແຜນການ, ໃນນັ້ນ ພູດລາຍຮັບສູນກາງ 136.715.120.000 ກີບ, ເທົ່າກັບ 70,03% ຂອງແຜນການ ແລະ ພູດລາຍຮັບທ້ອງຖິ່ນ 573.448.810.000 ກີບ ເທົ່າກັບ 6,11% ຂອງ GDP ພ້ອມນີ້ຍັງໄດ້ມີ ບັນຫາອື່ນໆນຳອີກ.

ກອງປະຊຸມໄດ້ປ່ອນບັດຄັດເລືອກເອົາຄະນະພັກຊຸດໃໝ່ ສະໄໝທີ II ເພື່ອເປັນແກນນຳໃນການນຳພາວຽກງານໃນພະແນກການເງິນແຂວງ ໃຫ້ມີຜົນສຳເລັດໃໝ່ໃຫຍ່ຫຼວງກ່ວາເກົ່າ ຊຶ່ງມີຜູ້ສະໝັກ 9 ສະຫາຍ, ເລືອກເອົາ 7 ສະຫາຍ, ກອງປະຊຸມໃຫຍ່ຄັ້ງປະຖົມມະລຶກ ໄດ້ເປັນເອກະພາບເລືອກເອົາດັ່ງນີ້ 1) ສະຫາຍ ຄຳເຜີຍ ໂສມຖາວອນ ເປັນເລຂາຄະນະພັກຮາກຖານ; 2) ສະຫາຍ ນາງ ໄຍຄຳ ສີຊານົນ ເປັນ ຮອງເລຂາຄະນະພັກ; 3) ສະຫາຍ ບຸນຍົງ ໄຊຍະແສງ ເປັນຄະນະພັກ ທັງເປັນປະທານກວດກາ; 4) ສະຫາຍ ລົດສະນີ ສີຫາວົງ ເປັນຄະນະພັກ ທັງເປັນຮອງປະທານກວດກາ; 5) ສະຫາຍ ທູນໄຊ ເມກດາວົງ ເປັນຄະນະພັກ ທັງເປັນຮອງປະທານກວດກາ; 6) ສະຫາຍ ກິແກ້ວ ມະນີຈັນ; 7) ສະຫາຍ ສຸກໃໝ ສຸດບຸນລົ້ນ ເປັນຄະນະພັກ.
ກອງປະຊຸມໃຫຍ່ ພະແນກ ການເງິນແຂວງຍັງໄດ້ປ່ອນບັດຄັດເລືອກເອົາຜູ້ແທນສົມບູນ ແລະ ສຳຮອງ ເພື່ອໄປຮ່ວມກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ ເຊິ່ງປະກອບມີ : ຜູ້ແທນສົມບູນ 5 ສະຫາຍ ແລະ ຜູ້ແທນສຳຮອງອີກ 4 ສະຫາຍ.

ໃນໂອກາດກອງປະຊຸມໃຫຍ່ໃນຄັ້ງນີ້ ສະຫາຍ ເລັດ ໄຊຍະພອນ ເລຂາພັກແຂວງ ເຈົ້າແຂວງ ອັດຕະປື ໄດ້ໃຫ້ຄວາມເຊື່ອໝັ້ນວ່າ: ບັນດາທິດທາງທີ່ ຄະນະພັກຮາກຖານ ຊຸດໃໝ່ ວາງອອກ ໃນຊຸມປີຕໍ່ໜ້ານັ້ນ ຈົ່ງສືບຕໍ່ຄົ້ນຄ້ວາເຊື່ອມຊຶມ, ກຳແໜ້ນມະຕິກອງປະຊຸມໃຫຍ່ ຄັ້ງທີ II ໃຫ້ບັນລຸຜົນສຳເລັດ ພ້ອມກັນນັ້ນຄະນະພັກຊຸດໃໝ່, ຄະນະໜ່ວຍພັກຕ້ອງເພີ່ມທະວີບົດບາດນຳພາ ໃນນັ້ນ ຕົ້ນຕໍແມ່ນພະນັກງານ-ສະມາຊິກພັກຕ້ອງມີຄວາມຮູ້ຄວາມສາມາດ, ສົມຄູ່ກັບໜ້າກັບໜ້າທີ່ການເມືອງ ແລະ ຄວາມຮຽກຮ້ອງຕ້ອງການໃນໄລຍະໃໝ່, ຄະນະພັກ, ຄະນະໜ່ວຍ ແລະ ສະມາຊິກພັກທຸກສະຫາຍ ຈົ່ງເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ຕັດສິນໃຈຜ່ານຜ່າຄວາມຫຍຸ້ງຍາກ, ເຕົ້າໂຮມຄວາມສາມັກຄີເປັນປຶກແຜ່ນ ແລະ ມີຄວາມເປັນເອກະພາບສູງ ໃນການນຳພາຜັນຂະຫຍາຍມະຕິກອງປະຊຸມໃຫຍ່ຄັ້ງທີ II ຂອງຕົນ ເຂົ້າສູ່ຂະບວນການຕົວຈິງ ເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ສູ່ຈຸດໜາຍສັງຄົມນິຍົມເທື່ອລະກ້າວ.

ໂດຍ: ມາລາທິບ