ກອງປະຊຸມໃຫຍ່ອົງຄະນະພັກເມືອງວຽງທອງ ຄັ້ງທີ VII ໄດ້ໄຂຂຶ້ນຢ່າງເປັນທາງການ ໃນວັນທີ 11 ກຸມພາ 2020 ຢູ່ຫ້ອງວ່າການເມືອງວຽງທອງ ໂດຍພາຍໃຕ້ການເປັນປະທານຂອງ ສະຫາຍ ວົງສີ ທອງສີອິນທິປັນຍາ ກຳມະການພັກແຂວງ ເລຂາຄະນະບໍລິຫານງານພັກເມືອງ, ເປັນກຽດເຂົ້າຮ່ວມຂອງ ສະຫາຍ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ-ແຂວງບໍລິຄຳໄຊ, ມີຜູ້ແທນສົມບູນ 93 ສະຫາຍ ຍິງ 3 ສະຫາຍ, ແຂກຖືກເຊີນຈາກບັນດາເມືອງ ແລະ ພະແນກການຂັ້ນແຂວງ, ຫ້ອງການອ້ອມຂ້າງເມືອງ ເຂົ້າຮ່ວມ.

ໃນໂອກາດນີ້ ສະຫາຍ ວົງສີ ທອງສີອິນທິປັນຍາ ໄດ້ຕາງໜ້າໃຫ້ແກ່ອົງຄະນະພັກເມືອງ ຂຶ້ນຜ່ານບົດລາຍງານການເມືອງທັງສອງພາກ ເຊີ່ງເປັນຜົນງານໃນການຊີ້ນຳ-ນຳພາຂອງອົງຄະນະພັກເມືອງວຽງທອງ ຕະຫຼອດໄລຍະ 5 ປີ ຜ່ານມາ ເຫັນວ່າໄດ້ສຸມຈິດໃຈຜັນຂະຫຍາຍມະຕິຂອງອົງຄະນະພັກເມືອງ ຊຸດທີ VI ຂອງຕົນຢ່າງຕັ້ງໜ້າ ໂດຍຍົກສູງຄວາມສາມາດນຳພາ, ປັບປຸງແບບແຜນວິທີເຮັດວຽກ, ຍຶດໝັ້ນແນວທາງປ່ຽນແປງຂອງພັກ, ປົກປັກຮັກສາສະຖຽນລະພາບທາງດ້ານການເມືອງ, ພັດທະນາເສດຖະກິດເຂັ້ມແຂງ, ສັງຄົມມີຄວາມສະຫງົບ, ຄຸ້ມຄອງລັດ – ຄຸ້ມຄອງສັງຄົມ ດ້ວຍລະບຽບກົດໝາຍຢ່າງໜັກແໜ້ນ ແລະ ຍຸຕິທຳ, ສີ່ງທີ່ພົ້ນເດັ່ນ ສາມາດແກ້ໄຂປະກົດການຫຍໍ້ທໍ້ທາງສັງຄົມ ໄດ້ລຸດໜ້ອຍຖອຍລົງ ໂດຍສະເພາະແມ່ນການແກ້ໄຂ 4 ເຖື່ອນ ຕິດພັນກັບການຈັດຕັ້ງປະຕິບັດ 9 ຫົວຂໍ້ວິທະຍາສາດຢ່າງຕັ້ງໜ້າ ແລະ ສຳເລັດຫຼາຍດ້ານເຊັ່ນ:

ການແກ້ໄຂບັນຫາຄົນລັກລອບເຂົ້າເມືອງຜິດໝາຍ, ການຕັ້ງສະນຳ, ອາວຸດເຖື່ອນ ແລະ ບັນຫາການປູກຝິ່ນ-ຄັນຊາ ແລະ ອື່ນໆ ເສດຖະກິດຂະຫຍາຍຕົວຢ່າງຕໍ່ເນື່ອງໃນລະດັບ 5,8% ຕໍ່ປີ, ລາຍໄດ້ສະເລ່ຍ 8 ລ້ານກ່ວາກີບ ຫຼື 1.012 ໂດລ່າຕໍ່ຄົນຕໍ່ປີ, ຊີວິດການເປັນຢູ່ຂອງປະຊາຊົນນັບມື້ດີຂຶ້ນເປັນກ້າວໆ, ລະບົບຄົມມະນາຄົມ, ໂທລະຄົມມະນາຄົມ ແລະ ການນຳໃຊ້ໄຟຟ້າ ກໍ່ໄດ້ເຂົ້າເຖີງພໍ່ແມ່ປະຊາຊົນຢ່າງທົ່ວເຖິງ, ຊີວິດການເປັນຢູ່​ຂອງ​ປະຊາຊົນໄດ້ຮັບການ​ພັດທະນາ, ມີຄອບຄົວພົ້ນທຸກກວມ 96,89%, ບ້ານພົ້ນທຸກກວມ 70,73%, ຄອບຄົວພັດທະນາ 86,36%, ບ້ານພັດທະນາກວມ 24,39%, ສ້າງບ້ານເປັນຫົວໜ່ວຍພັດທະນາ ບັນລຸ 2 ດ້ານ, ສ້າງບ້ານໃຫຍ່ຈອມທອງເປັນສີສັນຕົວເມືອງນ້ອຍໃນຊົນນະບົດ ບັນລຸ 11 ມາດຖານ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ບັນລຸ 3 ດ້ານ, ຄອບຄົວວັດທະນະທໍາກວມ 80,39%, ບ້ານວັດທະນະທໍາ 53,65%, ຍົກສູງຄຸນນະພາບວຽກຂະຫຍາຍພັກ ທົ່ວເມືອງມີ 7 ຄະນະ​ພັກ​ຮາກ​ຖານ 77 ໜ່ວຍພັກ ເພີ່ມຂຶ້ນ 26,22%, ໜ່ວຍພັກປອດໃສ ເຂັ້ມແຂງ ໜັກແໜ້ນກວມ 75,32%, ສະມາຊິກພັກທັງໝົດ 1.431 ສະຫາຍ ເພີ່ມຂຶ້ນ 28,34%, ສະມາຊິກພັກແຂງກວມ 89,79%.

ກອງປະຊຸມນີ້ ຈະໄດ້ດຳເນີນໄປເປັນເວລາ 2 ວັນ ໃນນັ້ນ ຜູ້ແທນກອງປະຊຸມ ຍັງຈະໄດ້ປະກອບຄຳຄິດຄຳເຫັນ ແລະ ປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ຊີ້ນຳ – ນໍາພາເມືອງວຽງທອງຕໍ່ໄປ.

Medialaos bolikhamxay