ກອງປະຊຸມໃຫຍ່ຜູ້ແທນອົງຄະນະພັກເມືອງເຊໂປນນຄັ້ງທີXIໄດ້ອັດລົງດ້ວຍຜົນສຳເລັດອັນຈົບງາມໃນຕອນບ່າຍວັນທີ 11 ກຸມພາ 2020 ຢູ່ທີ່ສະໂມສອນຂອງເມືອງໂດຍການເຂົ້າຮ່ວມຂອງ ສະຫາຍ ທ່ອນແກ້ວ ພຸດທະໄກຍະລາດ ຄະນະປະຈໍາພັກແຂວງ ຮອງເຈົ້າແຂວງສະຫວັນນະເຂດ.

ຕະຫຼອດໄລຍະຂອງການດຳເນີນກອງປະຊຸມໃຫຍ່ເປັນເວລາສອງວັນພາຍຫຼັງບັນດາຜູ້ແທນທີ່ເຂົ້າຮ່ວມກອງປະຊຸມໄດ້ພ້ອມກັນສຸມສະຕິປັນຍາ, ປະກອບຄຳຄິດ,ຄໍາເຫັນ ພ້ອມນີ້ກອງປະຊຸມຍັງໄດ້ເປັນເອກະພາບກັນຮັບຮອງເອົາຮ່າງບົດລາຍງານການເມືອງທັງສອງພາກ, ແຜນພັດທະນາເສດຖະກິດ-ສັງຄົມແລະບົດສຳຫຼວດການນຳພາລວມຂອງຄະນະພັກຊຸດເກົ່າແລະໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ເຊິ່ງມີຜູ້ລົງສະໝັກທັງໝົດ29ສະຫາຍ, ຍິງ4 ສະຫາຍ, ໃນນັ້ນເລືອກເອົາ 25 ສະຫາຍ, ຜົນຂອງກອງປະຊຸມຄັ້ງປະຖົມມະລຶກໄດ້ຕົກລົງເຫັນດີເລືອກເອົາສະຫາຍ ວົງສະຫວັນ ວຽງມະນີ ເປັນເລຂາຄະນະບໍລິຫານງານພັກເມືອງ, ສະຫາຍ ບຸນລ້ອມ ສຸພາມີໄຊ ເປັນຮອງເລຂາ, ສະຫາຍ ບຸນສູງ ໄຊຍະວົງ ເປັນຮອງເລຂາທັງເປັນປະທານກວດກາ, ສະຫາຍ ບຸນທ່ຽງ ບຸດໄຂທອນ , ສະຫາຍ ສີທຸມມາ ໄຊຍະລາດ ເປັນຮອງປະທານກວດກາ,ສະຫາຍສົມບັດ ອິດທະວົງ, ສະຫາຍ ນາງ ພູທອງ ພົມມະຈັນ, ສະຫາຍ ພັນໂທ ຄໍາແພງ ກອນທິສັກ , ສະຫາຍ ຄອນສະຫວັນ ຄົມທິລາດ ເປັນຄະນະປະຈຳພັກເມືອງ ແລະ ອີກ 18 ສະຫາຍ,ຍິງ 2 ສະຫາຍເປັນກຳມະການພັກເມືອງ.

ຈາກນັ້ນໃນກອງປະຊຸມ ສະຫາຍ ທ່ອນແກ້ວ ພຸດທະໄກຍະລາດ ຄະນະປະຈໍາພັກແຂວງ ຮອງເຈົ້າແຂວງສະຫວັນນະເຂດ ກໍ່ໄດ້ມີຄໍາເຫັນໂອ້ລົມຕໍ່ຄະນະບໍລິຫານງານພັກເມືອງຊຸດໃໝ່, ໂດຍໄດ້ເນັ້ນໜັກໃຫ້ເພີ່ມທະວີຍົກລະດັບບົດບາດການນຳພາ ຂອງພັກໃນທຸກຂົງເຂດວຽກງານ, ຊອກທຸກວິທີທາງໃຫ້ມະຫາຊົນມີຄວາມເຊື່ອໝັ້ນຕໍ່ການນຳພາຂອງພັກ ,ຕ້ອງເອົາໃຈໃສ່ຢ່າງບໍ່ລົດລະຕໍ່ວຽກງານປ້ອງກັນຊາດ, ປ້ອງກັນຄວາມສະຫງົບ, ຮັບປະກັນໃຫ້ມີສະຖຽນລະພາບທາງດ້ານການເມືອງແລະສັງຄົມມີຄວາມສະຫງົບປອດໄພ,ກ່ຽວກັບການພັດທະນາທາງດ້ານເສດຖະກິດແລະແກ້ໄຂຄວາມທຸກຍາກຂອງປະຊາຊົນຕ້ອງກຳໃຫ້ໄດ້ວ່າເຂດໃດ, ບ້ານໃດມີທ່າແຮງໃນການຜະລິດດ້ານໃດເພື່ອສຸມວິຊາການ, ສຸມທຶນເຂົ້າຊ່ວຍໝູນ ແລະ ຊຸກຍູ້ປະຊາຊົນຈັດຕັ້ງປະຕິບັດແຜນການຜະລິດໃຫ້ມີປະສິດທິຜົນ,ຕ້ອງເພີ່ມທະວີເຮັດວຽກງານສຶກສາອົບຮົມການເມືອງ-ແນວຄິດ,ບັນດາສະຫາຍທີ່ໄດ້ຮັບການເລືອກຕັ້ງເປັນຄະນະບໍລິຫານງານພັກເມືອງຊຸດໃໝ່ ແມ່ນຄວາມໄວ້ວາງໃຈ ຂອງບັນດາຖັນແຖວສະມາຊິກພັກທົ່ວອົງຄະນະພັກເມືອງເຊໂປນ, ທີ່ໄດ້ເລືອກເອົາສະຫາຍເຂົ້າໃນອົງການນຳສູງສຸດຂອງເມືອງ, ເພື່ອຊີ້ນຳ-ນຳພາຮອບດ້ານແຕ່ກອງປະຊຸມໃຫຍ່ສະໄໝນີ້ ໄປຫາກອງປະຊຸມໃຫຍ່ສະໄໝໜ້າ, ເຊິ່ງຈະຕ້ອງແບກຫາບພາລະໜ້າທີ່ໆໜັກໝ່ວງແຕ່ມີກຽດສະຫງ່າງາມ,

ສະນັ້ນ ບັນດາສະຫາຍຕ້ອງເສີມຂະຫຍາຍຄວາມຮູ້ຄວາມສາມາດຂອງຕົນ,ຈັດຕັ້ງປະຕິບັດໜ້າທີ່ຕາມການມອບໝາຍດ້ວຍຄວາມຮັບຜິດຊອບສູງ, ກ່ອນອື່ນຕ້ອງຮັກສາຄວາມສາມັກຄີເປັນເອກະພາບໃນໝູ່ຄະນະ, ບົນພື້ນຖານເອົາໃຈໃສ່ກໍ່ສ້າງຊ່ວຍເຫຼືອເຊິ່ງກັນແລະກັນ, ປະຕິບັດລະບອບການນຳພາຢ່າງເຂັ້ມງວດ, ຕ້ອງຮັບຜິດຊອບຕໍ່ໂຊກຊາຕາກຳຂອງປະຊາຊົນບັນດາເຜົ່າທົ່ວເມືອງ,ຈະກ້າວໜ້າຮັ່ງມີແມ່ນໜ້າທີ່ຂອງພວກສະຫາຍນຳພາແລະ ເຊື່ອໝັ້ນວ່າພາຍໃຕ້ແນວທາງນະໂຍບາຍຂອງພັກແລະຄວາມຮູ້ຄວາມສາມາດຂອງບັນດາສະຫາຍໃຫ້ເປັນຄັນທຸງນຳພາຢູ່ເມືອງພວກສະຫາຍໃຫ້ດີຂື້ນເປັນກ້າວໆ.

ຈາກນັ້ນ ສະຫາຍ ວົງສະຫວັນ ວຽງມະນີ ເລຂາຄະນະບໍລິຫານງານພັກເມືອງກໍ່ໄດ້ກ່າວປິດກອງປະຊຸມໃຫຍ່ຜູ້ແທນອົງຄະນະພັກເມືອງເຊໂປນຄັ້ງທີXIຢ່າງເປັນທາງການ.

savannakhet medialaos