ທ່ານເຈົ້າແຂວງໄຊສົມບູນ ພ້ອມດ້ວຍພັນລະຍາ ແລະ ຄະນະນໍາແຂວງ ແລະ ເມືອງລ້ອງແຈ້ງ ລົງມອບເຄື່ອງຊ່ວຍເຫລືອໃຫ້ພໍ່ແມ່ປະຊາຊົນ ບ້ານໜອງພູນໄຊ ແລະ ບ້ານນາຕີ ເມືອງລ້ອງແຈ້ງ ໃນວັນທີ 11 ກຸມພາ 2020 ນີ້ ມີອຳນາດການປົກຄອງ, ພໍ່ແມ່ປະຊາຊົນທັງສອງບ້ານ ເຂົ້າຮ່ວມຮັບເຄື່ອງຊ່ວຍເຫລືອ ຢ່າງຫລວງຫລາຍ.


ເຄື່ອງທີ່ນຳໄປຊ່ວຍເຫລືອ ເທື່ອນີ້, ປະກອບມີ: ເຄື່ອງນຸ່ງຮົ່ມ, ກະເປົ໋າເປ້ ແລະ ອຸປະກອນການຮຽນ ໃນນີ້ ມີເສື້ອກັນໜາວແຂນຍາວ 355 ໂຕ, ເສື້ອແລນແຂນຍາວ 355, ກະເປົ໋າເປ້ນັກຮຽນ 125 ໜ່ວຍ ແລະ ມີປື້ມ, ບິ໋ກ, ສໍ ຈໍານວນໜຶ່ງ ລວມມູນຄ່າທັງໝົດ 41,415,000 ກີບ ( ສີ່ສິບເອັດລ້ານ ສີ່ແສນ ສິບຫ້າພັນກີບ ) ທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ ໄດ້ກ່າວວ່າ:

ການນຳເອົາເຄື່ອງມາຊ່ວຍເຫລືອພໍ່ແມ່ປະຊາຊົນສອງບ້ານຂອງເມືອງລ້ອງແຈ້ງ ເທື່ອນີ້, ແມ່ນເພື່ອເປັນການຊ່ວຍເຫລືອບັນເທົ່າທຸກ ສ່ວນໃດ ສ່ວນໜຶ່ງ, ຈາກພັກ-ລັດ ກໍ່ຄືການນຳແຂວງ ແລະ ເມືອງ ທີ່ໄດ້ເປັນຫ່ວງ ເປັນໄຍ ຕໍ່ຄວາມສຸກທຸກຂອງປະຊາຊົນ. ພ້ອມນີ້ ທ່ານຍັງໄດ້ຮຽກຮ້ອງໃຫ້ປະຊາຊົນຈົ່ງມີຄວາມດຸໝັ່ນ, ອົດທົນ, ສູ້ຊົນ, ມີຄວາມສາມັກຄີຊ່ວຍເຫລືອເຊິ່ງກັນ ແລະ ກັນ ພ້ອມກັນສ້າງເສດຖະກິດຄອບຄົວ ດ້ວຍການທຳການຜະລິດ ປູກຝັງ-ລ້ຽງສັດ ໃຫ້ກາຍເປັນສິນຄ້າ ເພື່ອໃຫ້ຄອບຄົວຂອງຕົນມີຢູ່ມີກິນ ແລະ ຫລຸດພົ້ນອອກຈາກຄວາມທຸກຍາກເທື່ອລະກ້າວ. ຈາກນັ້ນ ທ່ານ ເຈົ້າແຂວງ ພ້ອມດ້ວຍພັນລະຍາ ແລະ ຄະນະ ໄດ້ນຳເອົາເຄື່ອງອຸປະໂພກ, ບໍລິໂພກ ແລະ ເຄື່ອງນຸ່ງຮົ່ມ ຈຳນວນໜຶ່ງ ໄປມອບໃຫ້ ກອງພັນ 468 ລວມມູນຄ່າ ຫ້າແສນກວ່າກີບ. ເພື່ອເປັນການຊຸກຍູ້ ແລະ ສົ່ງເສີມ ດ້ານປັດໃຈໃຫ້ແກ່ກົມກອງ ດັ່ງກ່າວ.

MediaLaos
xaysomboun
ພາບ-ຂ່າວ: ສຸກສັນ ອ້ວນລິທິກຸນ