ໃນວັນທີ 27 ສິງຫາ 2019 ນີ້ ພະແນກການເງິນແຂວງວຽງຈັນ ໄດ້ຈັດພິທີເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ X, ມະຕິກອງປະຊຸມຄົບຄະນະບໍລິຫານງານພັກແຂວງວຽງຈັນ ຄັ້ງທີ 9 ສະໄໝທີ V, ຜົນສຳເລັດກອງປະຊຸມອົງການປົກຄອງແຂວງວຽງຈັນ, ຜົນສຳເລັດກອງປະຊຸມສະໄໝສາມັນເທຶ່ອທີ 7 ຂອງສະພາປະຊາຊົນແຂວງວຽງຈັນຊຸດທີ I ແລະ ດຳລັດຂອງລັດຖະບານ ສະບັບເລກທີ 184/ລບ ວ່າດ້ວຍຈັນຍາບັນຂອງພະນັກງານ-ລັດຖະກອນ.


ໂດຍແມ່ນ ທ່ານ ຄຳເຫັຼກ ທອງສະຫວັນ ຫົວໜ້າພະແນກການເງິນແຂວງວຽງຈັນ, ທ່ານ ຂັນທອງ ພະລະຄອນ ຫົວໜ້າສວຍສາອາກອນແຂວງວຽງຈັນ, ທ່ານ ອຸ່ນ ພົມມະຈັນ ຫົວໜ້າຄັງເງິນແຫ່ງຊາດປະຈຳແຂວງວຽງຈັນ ແລະ ທ່ານ ນາງ ອ່ອນ ຈັນທະວົງ ຮອງຫົວໜ້າສວຍສາອາກອນແຂວງວຽງຈັນ ໄດ້ພັດປ່ຽນກັນຜ່ານບັນດາເອກະສານສຳຄັນດັ່ງກ່າວ.


ມີບັນດາຫົວໜ້າ, ຮອງຫົວໜ້າຂະແໜງການ, ພ້ອມດ້ວຍພະນັກງານ-ລັດຖະກອນຂອງພະແນກການເງິນແຂວງເຂົ້າຮ່ວມເຊື່ອມຊຶມ. ທັງນີ້ກໍ່ເພຶ່ອເຮັດໃຫ້ຄະນະພັກ, ຄະນະນຳ, ບັນດາສະຫາຍສະມາຊິກພັກ, ພະນັກງານຫຼັກແຫຼ່ງຂອງຂະແໜງການເງິນໄດ້ເຊຶ່ອມຊຶມ, ຜັນຂະຫຍາຍເນື້ອໃນຈິດໃຈສຳຄັນຂອງບັນດາເອກະສານສຳຄັນດັ່ງກກ່າວ ທັງນີ້ກໍເພຶ່ອແນໃສ່ສ້າງຄວາມເຂົ້າໃຈຢ່າງຈະແຈ້ງຕໍ່ກັບບັນຫາຕ່າງໆທີ່ພວກເຮົາພວມປະເຊີນໜ້າ, ສຸມໃສ່ແກ້ໄຂຢ່າງຈິງຈັງ ແລະ ແທດເຖິງ ໂດຍສະເພາະແມ່ນບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ສ້າງການຫັນປ່ຽນທາງດ້ານແນວຄິດ-ຈິນຕະນາການຢ່າງເປັນລະບົບ, ເຮັດໃຫ້ພະນັກງານ-ລັດຖະກອນຂະແໜງການເງິນ ມີທັດສະນະຫຼັກໝັ້ນການເມືອງໜັກແໜ້ນ, ມີສະຕິຕໍ່ການຈັດຕັ້ງ, ມີຄວາມຫ້າວຫັນ, ມີຄວາມຮັບຜິດຊອບສູງຕໍ່ການປະຕິບັດໜ້າທີ່ຂອງຕົນ ກ້າວເຂົ້າສູ່ຄວາມເປັນເຈົ້າການໃນການຈັດຕັ້ງຜັນຂະຫຍາຍ ແລະ ປະຕິບັດໃຫ້ເກີດໝາກຜົນຕົວຈິງ.