ເພື່ອເປັນການກະກຽມຄວາມພ້ອມໃຫ້ແກ່ການດຳເນີນກອງປະຊຸມໃຫ່ຍຄັ້ງທີ IX ຂອງອົງຄະນະພັກເມືອງໄຊຍະບູລີທີ່ຈະໄຂຂື້ນໃນຕໍ່ໜ້ານີ້. ຕອນເຊົ້າວັນທີ 11 ກຸມພາ 2020 ນີ້ທ່ານ ບຸນແທນ ທີແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງໄຊຍະບູລີໄດ້ໃຫ້ສຳພາດຕໍ່ທີມງານນັກຂ່າວວ່າ: ເພື່ອເຮັດສຳເລັດໜ້າທີ່ການເມືອງ ແລະ ບັນລຸຄາດໝາຍມະຕິກອງປະຊຸມໃຫ່ຍຄັ້ງທີ VIII ຂອງອົງຄະນະພັກເມືອງວາງອອກ, ໃນໄລຍະ 5 ປີຜ່ານມາຄະນະບໍລິຫານງານພັກເມືອງໄຊຍະບູລີແມ່ນໄດ້ສຸມໃສ່ຢ່າງແຂງແຮງໃນການຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ເພື່ອຮັບປະກັນເຮັດໃຫ້ສັງຄົມມີຄວາມສະຫົງບ, ມີສະຖຽນລະພາບທາງດ້ານການເມືອງ ເສດຖະກິດໄດ້ຮັບການພັດທະນາ ແລະ ມີການຂະຫຍາຍຕົວຢ່າງຕໍ່ເນື່ອງ, ວັດທະນະທໍາສັງຄົມໄດ້ຮັບການຍົກລະດັບຫັນໄປສູ່ຄຸນນະພາບໃໝ່ ພ້ອມກັບຮີດຄອງປະເພນີອັນດີງາມຂອງເຜົ່າຕ່າງໆໄດ້ຮັບການປົກປັກຮັກສາເສີມຂະຫຍາຍ, ດ້ານລະບົບການເມືອງປະຊາທິປະໄຕປະຊາຊົນຂັ້ນຮາກຖານໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງ, ມີການແບ່ງຂັ້ນຄຸ້ມຄອງ ຈະແຈ້ງຂື້ນກວ່າເກົ່າ, ສາມາດເສີມຂະຫຍາຍບົດບາດການນຳພາຂອງຫຼາຍທ້ອງຖີ່ນຮາກຖານບ້ານ, ສຳນັກງານອົງການຂັ້ນເມືອງເປັນຕົວຂັບເຂື່ອນ ແຕ່ລະຂົງເຂດວຽກງານມີການພັດທະນາຂື້ນ. ສະແດງອອກຄື:

ດ້ານວຽກງານປ້ອງກັນຊາດປ້ອງກັນຄວາມສະຫົງບໄດ້ຫັນລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານເປັນໜ້າທີ່ຍຸດທະສາດ ໄປພ້ອມກັບການສ້າງທ່າສະຫນາມປ້ອງກັນຊາດປ້ອງກັນຄວາມສະຫງົບທົ່ວປວງຊົນຢ່າງແຂງແຮງ, ສາມາດສ້າງຄອບຄົວຕົວແບບດ້ານປ້ອງກັນຊາດບັນລຸ 94,73%, ຄອບຄົວປ້ອງກັນຄວາມສະຫົງບໄດ້ 96,17%, ຮັກສານາມມະຍົດການສ້າງບ້ານປ້ອງກັນຊາດເຂັ້ມແຂງ ແລະ ບ້ານປ້ອງກັນຄວາມສະຫງົບດີໄດ້ 100%, ເສດຖະກິດຂອງເມືອງສືບຕໍ່ຂະຫຍາຍຕົວຢ່າງຕໍ່ເນື່ອງດ້ວຍຈັ່ງຫວະສະເລ່ຍ 8% ຕໍ່ປີ, ລວມລາຍໄດ້ສະເລ່ຍຕໍ່ພົນລະເມືອງບັນລຸ 14 ລ້ານກວ່າກີບຫຼືເທົ່າກັບ 1800 ໂດລາຕໍ່ຄົນຕໍ່ປີ ບັນຫາສໍາຄັນແມ່ນສາມາດເຮັດໃຫ້ລາຍໄດ້ຕົວຈີງຂອງປະຊາຊົນເພີ້ມຂື້ນ 600 ໂດລາຕໍ່ຄົນຕໍ່ປີຫຼືເທົ່າກັບ 4,8 ລ້ານກວ່າກີບເມື່ອທຽບໃສ່ປີ 2014, ສີ່ງທີ່ເປັນປັດໃຈພົ້ນເດັ່ນ ແລະ ເປັນຂະບວນການຢ່າງຕັ້ງໜ້າ ແມ່ນການປະຕິບັດນະໂຍບາຍລັດ ແລະ ປະຊາຊົນພ້ອມກັນເຮັດໃນການກໍ່ສ້າງທາງເບຕົງ 13 ເສັ້ນໃນ 9 ບ້ານເທດສະບານ ເຊີ່ງເຮັດມີໃບໜ້າອັນໃໝ່ໂດຍການສົມທົບທືນປະກອບສ່ວນຂອງປະຊາຊົນພາຍໃນບ້ານຫຼາຍກວ່າ 1,7 ຕື້ກີບ, ຂະຫຍາຍການກໍ່ສ້າງຂົວນ້ຳຮຸ່ງຈາກຈຸດດຽວມາເປັນ 3 ຈຸດເພື່ອຮັບຮອງການສັນຈອນທີ່ສະດວກຂອງຕົວເມືອງໃໝ່ດ້ານຕາເວັນອອກເຊື່ອມຈອດຫາຕົວເມືອງດ້ານຕາເວັນຕົກຕາມ 2 ຝັ່ງລໍາແມ່ນ້ຳຮຸ່ງ, ທົ່ວເມືອງມີລະບົບຕາຄ່າຍໄຟຟ້າຖາວອນ 98%ຂອງຈຳນວນບ້ານທັງໝົດ, ອັດຕາການເຂົ້າຮຽນຊັ້ນປະຖົມບັນລຸ 100%, ອັດຕາການເຂົ້າເຖີງການບໍລີການດ້ານສາທາລະນະສຸກໄດ້ 100%, ສ້າງບ້ານສາທາລະນະສຸກແບບຢ່າງກວມເອົາ 99%, ອັດຕາການຊົມໃຊ້ນ້ຳສະອາດກວມເອົາ 93%, ອັດຕາການຊົມໃຊ້ວີດຖ່າຍກວມເອົາ 92%, ອາຍຸຍືນສະເລ່ຍ 68 ປີ, ສາມາດສ້າງບ້ານວັດທະນະທຳກວມ 91% ຂອງຈໍານວນບ້ານທັງໝົດ,ໄດ້ຍູ້ແຮງວຽກງານທ່ອງທ່ຽວ ແລະ ໄດ້ກໍານົດອອກເປັນ 13 ແລວທາງ ໄປພ້ອມກັບການເປີດປີທ່ອງທ່ຽວລາວຂອງທົ່ວປະເທດຢ່າງເປັນຂະບວນຟົດຟື້ນ, ເຮັດໃຫ້ຫລາຍແລວທາງໄດ້ຮັບການປັບປຸງຍົກລະດັບ, ມີຄຸນນະພາບ ເປັນຕົ້ນແມ່ນການພັດທະນາແຫຼ່ງທ່ອງທ່ຽວຖ້ຳລອດ, ແຫຼ່ງທ່ອງທ່ຽວບ້ານຕາລານ, ວັດສີບຸນເຮືອງບ້ານໃຫ່ຍ ແລະ ພະເຈົ້າໃຫ່ຍພູທອກເຊີ່ງເປັນໃບໜ້າອັນໃໝ່ໂດຍພື້ນຖານໃນການຍູ້ໃຫ້ວຽກງານທ່ອງທ່ຽວພາຍໃນເມືອງ, ດ້ານການກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານກໍ່ໄດ້ຫັນເອົາພະນັກງານຜູ້ທີ່ມີຄວາມຮູ້, ຄວາມສາມາດ, ມີອານາຄົດ ໂດຍການສົ່ງໄປບໍາລຸງສ້າງ ໃນວຽກຊີ້ນຳຕົວຈີງຢູ່ຂັ້ນຮາກຖານບ້ານ, ຄຸ້ມບ້ານຕ່າງໆ ຕາມທິດສ້າງບ້ານໃຫ້ເປັນໜື່ງໃນການພັດທະນາໄປພ້ອມກັບທິດນຳ 8 ສ້າງ 9 ແບບຢ່າງ ຢ່າງແຂງແຮງ ແລະ ເປັນຂະບວນຢ່າງຕັ້ງໜ້າ, ເຮັດໃຫ້ຫຼາຍເຂດຊານເມືອງ ແລະ ຊົນນະບົດມີຮູບຮ່າງສີສັນເປັນຕົວເມືອງນ້ອຍໃນຊົນນະບົດ, ຜ່ານການກວດກາມາດຖານ 309 ທົ່ວເມືອງຍັງມີຄອບຄົວທຸກຍາກ 30 ຄອບຄົວ ແລະ ກວດກາຕາມ 348 ມີ 83% ບັນລຸມາດຖານຄອບຄົວພັດທະນາ, 76% ຂອງບ້ານທັງໝົດໃນທົ່ວເມືອງບັນລຸຕາມມາດຖານພົ້ນທຸກ, ປະຈຸບັນທົ່ວເມືອງມີການຈັດຕັ້ງຮາກຖານພັກທັງໝົດ 213 ຮາກຖານ, ມີ 11 ຄະນະພັກ ທຽບໃສ່ປີ 2014 ເພີ້ມຂື້ນ 45 ໜ່ວຍພັກເທົ່າກັບ 22, 27%, ຜ່ານການດໍາເນີນຊີວີດການເມືອງປັບປຸງປົວແປງພັກສາມາດຮັບຮອງເປັນໜ່ວຍພັກເຂັ້ມແຂງຮູ້ນຳພາຮອບດ້ານ 77,24%( ຄາດໝາຍ 80%), ມີສະມາຊີກພັກທັງໝົດ 2.730 ສະຫາຍ, ຍິງ 1.100ສະຫາຍ, ສໍາຮອງ 78 ສະຫາຍທຽບໃສ່ປີ 2014ເພີ້ມຂື້ນ 36 %, ສາມາດຮັບຮອງເປັນສະມາຊິກພັກແຂງ 95,67%, ຜ່ານການປະເມີນຂໍ້ແຂ່ງຂັນຮັກຊາດ ແລະ ພັດທະນາມີຄອບຄົວຖືກປະເມີນທັງໝົດ 15.169 ຄອບຄົວໄດ້ປະເພດ 1 ກວມເອົາ 73%, ບ້ານໄດ້ປະເພດແຂງກວມເອົາ 95%, ເພື່ອສືບຕໍ່ໃນການພັດທະນາ ທ່ານ ບຸນແທນ ທີແກ້ວ ເຈົ້າເມືອງ ໄຊຍະບູລີກ່າວຕື່ມອີກວ່າ: ເມືອງໄຊຍະບູລີຈະໄດ້ສຸມໃສ່ສ້າງເມືອງຕາມຍຸດທະສາດ, ກາຍເປັນເມືອງຜະລິດສະບຽງອາຫານ, ປູກພືດອຸດສາຫະກຳເປັນສິນຄ້າ ຕິດພັນກັບການປຸງແຕ່ງ, ສົ່ງເສີມຜະລິດຕະພັນທີ່ເປັນມູນເຊື້ອ ແລະ ພັດທະນາການບໍລິການທ່ອງທ່ຽວທີ່ເປັນມິດກັບສີ່ງແວດລ້ອມ. ສູ້ຊົນເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງໃນລະດັບ 8,5% ຕໍ່ປີລວມຍອດຜະລິດຕະພັນໃຫ້ບັນລຸ 1.630 ຕື້ກີບ, ສະເລ່ຍໃຫ້ບັນລຸ 19 ລ້ານຕໍ່ຄົນຕໍ່ປີ ຫຼື ເທົ່າກັບ2.380 ໂດລາຕໍ່ຄົນຕໍ່ປີ, ຮັບປະກັນການພັດທະນາສີຂຽວ ແລະ ຍືນຍົງ ຖືເອົາການພັດທະນາເສດຖະກິດເປັນໃຈກາງ, ມີຄວາມສອດຄ່ອງກົມກຽວລະຫວ່າງການພັດທະນາເສດຖະກິດ, ວັດທະນະທຳສັງຄົມ, ການປົກປັກຮັກສາສະພາບແວດລ້ອມທັງເປັນເຈົ້າການຮັບມືໄພທິບັດຢ່າງທັນການ ແລະ ຮັບປະກັນການພັດທະນາຊົນນະບົດຮອບດ້ານຕິດພັນກັບການແກ້ໄຂຄວາມທຸກຍາກຂອງປະຊາຊົນຕາມທິດ 3 ສ້າງຢ່າງແຂງແຮງ.

ຂ່າວ-ພາບ: ສົມພົງສີສະຫວັດ.
Medialaos xayaboury