ກະຊວງວິທະຍາສາດ ແລະ ເຕັກໂນໂລຊີເຜີຍແຜ່ວຽກງານຊັບສິນທາງປັນຍາ ໃຫ້ພາກລັດ ແລະ ຜູ້ປະກອບການຢູ່ແຂວງສາລະວັນ

0
324

ກອງປະຊຸມເຜີຍແຜ່ວຽກງານຊັບສິນທາງປັນຍາ ແລະສ້າງຄວາມເຂັ້ມແຂງໃຫ້ຂະແໜງການທ້ອງຖິ່ນ ແລະ ຜູ້ປະກອບການ ໄດ້ຈັດຂຶ້ນໃນວັນທີ 12 ກຸມພາ 2020ນີ້ ຢູ່ຫ້ອງປະຊຸມ VIP ຊັ້ນII ໂດຍການເຂົ້າຮ່ວມຂອງທ່ານ ວິຊຽນ ນະວິກຸນ ຮອງເຈົ້າແຂວງສາລະວັນ ຜູ້ຊີ້ນໍາວຽກງານເສດຖະກິດ-ສັງຄົມ, ທ່ານ ປອ ສຸລິອຸດົງ ສູນດາລາ, ຮອງລັດຖະມົນ ຕີກະຊວງວິທະຍາສາດ ແລະ ເຕັກໂນໂລຊີພ້ອມຄະນະ, ທ່ານ ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ ແລະມີບັນດາທ່ານ ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ມີເຈົ້າເມືອງ ແລະຫົວໜ້າຫ້ອງການວິທະຍາສາດ ແລະ ເຕັກໂນໂລຊີຈາກ 8 ຕົວເມືອງ, ພະນັກງານວິຊາການ, ຜູ້ປະກອບການທຸລະກິດເຂົ້າຮ່ວມ.

ໃນກອງປະຊຸມ ທ່ານ ປອ ສຸລິອຸດົງ ສູນດາລາ, ຮອງລັດຖະມົນ ຕີກະຊວງວິທະຍາສາດ ແລະ ເຕັກໂນໂລຊີ ໄດ້ເນັ້ນໜັກໃຫ້ຜູ້ເຂົ້າຮ່ວມກອງປະຊຸມຄັ້ງນີ້ໄດ້ຮັບຮູ້ເຂົ້າໃຈກ່ຽວກັບພາລະບົດບາດຄວາມສໍາຄັນໃນການສົ່ງເສີມ ແລະ ການນໍາໃຊ້ລະບົບຊັບສິນທາງປັນຍາ ເຂົ້າໃນການພັດທະນາເສດຖະກິດ ແລະວັດທະນະທໍາສັງຄົມ ເຊິ່ງບັນຫາການປົກປ້ອງທາງປັນຍາແມ່ນນັບມື້ນັບມີຄວາມສໍາຄັນຢ່າງຍິ່ງ ທາງດ້ານການພັດທະນາ ແລະ ການຂະຫຍາຍຕົວດ້ານເຕັກໂນໂລຊີ ແລະລະບົບໂທລະຄົມສື່ສານຢ່າງວ່ອງໄວ ເຊິ່ງໄດ້ກະຕຸກຊຸກຍູ້ໃຫ້ເສດຖະກິດໂລກໃນຍຸກສະໄໝໃໝ່ ຈະເລີນເຕີບໂຕຂຶ້ນດ້ວຍຜົນສໍາເລດຂອງການພັດທະນາເຕັກໂນໂລຊີ ໃນນັ້ນສ່ວນໜຶ່ງກໍ່ແມ່ນຍ້ອນມີລະບົບຊັບສິນທາງປັນຍາທີ່ດີ ເພາະການນໍາໃຊ້ລະບົບຊັບສິນທາງປັນຍາ ມີປະສິດທິຜົນສູງທັງເປັນການສົ່ງເສີມຫົວຄິດປະດິດສ້າງຂອງມະນຸດ ແລະເປັນການສົ່ງເສີມຖ່າຍທອດເຕັກໂນໂລຊີ ກໍຄືການລົງທຶນຢູ່ຕ່າງປະເທດ ສົ່ງເສີມທຸລະກິດການຄ້າທັງພາຍໃນ ແລະ ຕ່າງປະເທດ ໃຫ້ໄດ້ຮັບຄວາມເປັນທໍາໃນສັງຄົມ ນອກຈາກນີ້ວຽກງານຊັບສິນທາງປັນຍາ ຍັງເປັນວຽກງານໜຶ່ງທີ່ຊ່ວຍເຮັດໃຫ້ວຽກງານເສດຖະກິດຂອງຊາດໃຫ້ມີຄວາມຈະເລີນຮຸ່ງເຮືອງທຽບເທົ່າກັບສາກົນ.

ພ້ອມດຽວກັນນັ້ນໃນກອງປະຊຸມຍັງໄດ້ຮັບຟັງການເຜີຍແຜ່ຈາກບັນດານັກວິທະຍາກອນມາຈາກສູນກາງ ທີ່ມີບົດຮຽນ ແລະປະສົບການຫຼາຍດ້ານ ເປັນຕົ້ນແມ່ນການພັດທະນາວຽກງານຊັບສິນທາງປັນຍາ, ຄວາມສໍາຄັນຂອງວຽກງານສິດທິບັດ,ວຽກງານເຄື່ອງໝາຍການຄ້າ, ວຽກງານຖິ່ນກໍາເນີດ, ວຽກງານລິຂະສິດ ແລະຄວາມສໍາຄັນວຽກງານພັນພືດໃໝ່, ພ້ອມດ້ວຍວຽກງານແກ້ໄຂຂໍ້ຂັດແຍ່ງທາງດ້ານຊັບສິນ, ທາງປັນຍາ ທັງນີ້ກໍ່ເພື່ອເຮັດໃຫ້ການເຜີຍແຜ່ຄັ້ງນີ້ໄດ້ນໍາໄປຜັນຂະຫຍາຍ ແລະຈັດຕັ້ງປະຕິບັດເຂົ້າໃນໜ້າທີ່ວຽກງານໃຫ້ໄດ້ຮັບໝາກຜົນ.

ໂດຍ:ກິນດາວັນ
medialao salavan