ກະຊວງ ປກສ ໄດ້ສົ່ງນັກກິລາ ເຂົ້າແຂ່ງຂັ້ນ ງານມະຫະກໍາ ກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ທັງໝົດ ມີ 11 ປະເພດກິລາ, ສໍາລັບຕັ້ງເປົ້າໝາຍແມ່ນຈະໃຫ້ຄວ້າຫຼຽນຄໍາໃນທຸກປະເພດທີ່ສົ່ງລົງແຂ່ງຂັນ.

ພັອ ທອງເພັດ ມະນີສະຫວັນ ຫົວໜ້າກົມກິລາ ກົມໃຫຍ່ການເມືອງ ປກສ, ຄະນະຮັບຜິດຊອບຊີ້ນໍາລວມ ກິລາກະຊວງ ປກສ ໃຫ້ຮູ້ວ່າ: ໃນງານມະຫາກໍາຄັ້ງນີ້ ກະຊວງ ປກສ ໄດ້ສົ່ງນັກກິລາ ແລະ ຄູຝືກ ຈໍານວນ 148 ສະຫາຍ ຍິງ 35 ສະຫາຍ, ເຂົ້າຮ່ວມໃນ 11 ປະເພດຄື: ເຕະບານ, ກະຕໍ້, ປັນຈາສີລັດ, ມວຍລາວ, ມວຍສາກົນ, ມວຍປໍ້າ, ຍິງປືນ,ແລ່ນ-ລານ, ເປຕັງ, ຍິງທະນູ ແລະ ມວຍເທຄວັນໂດ. ສໍາລັບຄວາມຫວັງ ແມ່ນຈະຄວ້າຫຼຽນຄໍາໃນທຸກປະເພດກິລາທີ່ສົ່ງລົງແຂ່ງຂັນ, ນັບແຕ່ວັນທີ 21 ທັນວາ 2019 ເປັນຕົ້ນມາ ໄດ້ສົ່ງນັກກິລາເຂົ້າເກັບໂຕ ແລະ ຝືກຊ້ອມ ຢ່າງເປັນປົກກະຕິຊ້ອມແຕ່ວັນຈັນ ເຖິງວັນເສົາ ແລະ ມີການເຄື່ອນໄຫວແຂ່ງຂັນທົດສອບ ທິມທາງນອກຢ່າງເປັນປະຈໍາ, ມາເຖິງປັດຈຸບັນ ແມ່ນມີຄວາມພ້ອມໃນການແຂ່ງຂັນ.

ຫົວໜ້າກົມກິລາ ຍັງໃຫ້ຮູ້ຕື່ມວ່າ: ການຝືກຊ້ອມຍັງພົບບັນຫາຫຼາຍພໍສົມຄວນ ເປັນຕົ້ນ ແມ່ນສະ ໝາມຝືກຊ້ອມບໍ່ໄດ້ມາດຕະຖານ ແລະ ຢູ່ຫ່າງໄກ, ອຸປະກອນຝືກຊ້ອມຍັງບໍ່ທັນພຽງພໍ ແລະ ພາຫະນະຮັບສົ່ງນັກກິລາ ຍັງບໍ່ທັນກດັບສະພາບຕົວຈິງ, ເຖິງຢ່າງໃດກໍຕາມ ທາງຄະນະຮັບຜິດຊອບ ວຽກງານ ກະຊວງ ປກສ ມີການເອົາໃຈໃສ່, ແກ້ໄຂ ແລະ ນໍາພານັກກິລາຝືກຊ້ອມຢ່າງຕໍ່ເນື່ອງ ເພື່ອລົງຊິງໄຊໃຫ້ໄດ້ຕາມເປົ້າໝາຍທີ່ວາງໄວ້.