ວັນທີ 12 ກຸມພາ 2020 ຢູ່ສະໂມສອນ ຫ້ອງວ່າການ #ເມືອງລະມາມ #ແຂວງເຊກອງ #ໄຂກອງປະຊຸມໃຫຍ່ຜູ້ແທນອົງຄະນະພັກເມືອງຄັ້ງທີIX ຂຶ້ນຢ່າງເປັນທາງການ ໂດຍພາຍໃຕ້ການເປັນປະທານຂອງ ສະຫາຍ ຂັນຕີ ສີລະວົງສາ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເປັນກຽດເຂົ້າຮ່ວມຂອງ ສະຫາຍ ຄໍາເຜີຍ ບຸດດາວຽງ ກຳມະການສູນກາງພັກ ເລຂາຄະນະບໍລິຫານງານພັກແຂວງ-ແຂວງເຊກອງ, ມີຜູ້ແທນສົມບູນ 111 ສະຫາຍ ຍິງ 11 ສະຫາຍ, ແຂກຖືກເຊີນຈາກບັນດາເມືອງ ຂອງ 3 ແຂວງ ອ້ອມຂ້າງຄື: ຈໍາປາສັກ, ສາລະວັນ ແລະອັດຕະປື, ພ້ອມດ້ວຍພະແນກການຂັ້ນແຂວງ, ຫ້ອງການອ້ອມຂ້າງເມືອງ ເຂົ້າຮ່ວມ.

ໃນໂອກາດນີ້ ສະຫາຍ ຂັນຕີ ສີລະວົງສາ ໄດ້ຕາງໜ້າໃຫ້ແກ່ອົງຄະນະພັກເມືອງ ຜ່ານບົດລາຍງານການເມືອງທັງສອງພາກ ເຊິ່ງໄດ້ຕີລາຄາຜົນສໍາເລັດໃນການຊີ້ນຳ-ນຳພາຂອງອົງຄະນະພັກເມືອງລະມາມ ຕະຫຼອດໄລຍະ 5 ປີ ຜ່ານມາ ເຫັນວ່າໄດ້ສຸມຈິດໃຈຜັນຂະຫຍາຍມະຕິຂອງອົງຄະນະພັກເມືອງ ຊຸດທີ VIII ຂອງຕົນຢ່າງຕັ້ງໜ້າ ໂດຍຍົກສູງຄວາມສາມາດນຳພາ, ປັບປຸງແບບແຜນວິທີເຮັດວຽກ, ຍຶດໝັ້ນແນວທາງປ່ຽນແປງຂອງພັກ, ປົກປັກຮັກສາສະຖຽນລະພາບທາງດ້ານການເມືອງ, ພັດທະນາເສດຖະກິດເຂັ້ມແຂງ, ສັງຄົມມີຄວາມສະຫງົບ, ຄຸ້ມຄອງລັດ-ຄຸ້ມຄອງສັງຄົມ ດ້ວຍລະບຽບກົດໝາຍຢ່າງໜັກແໜ້ນ ແລະ ຍຸຕິທຳ, ສິ່ງທີ່ພົ້ນເດັ່ນ ສາມາດແກ້ໄຂປະກົດການຫຍໍ້ທໍ້ທາງສັງຄົມ ໄຫ້ຫລຸດໜ້ອຍຖອຍລົງ ໂດຍສະເພາະ ໄດ້ແກ້ໄຂຄະດີທີ່ເກີດຂຶ້ນ ທັງຫມົດ 146 ລາຍ, ຢຶດໄມ້ປະເພດຕ່າງໆ ໄດ້ 144 ແມັດກ້ອນ, ທໍາລາຍອາວຸດລ່າເນື້ອ (ປືນແກັບ) 2.243 ກະບອກ, ອາວຸດເສິກ 5 ກະບອກ, ຫມໍ້ຊ໋ອດ 30 ເຄື່ອງ, ຈັກສະຕິນ 62 ເຄື່ອງ, ປະກາດບ້ານປ້ອງກັນຄວາມສະຫງົບດີ ໄດ້ 5 ບ້ານ, ສາມາດເປັນຕົວແບບມີ 2 ບ້ານ ແລະ ອື່ນໆ.

ເສດຖະກິດຂອງເມືອງຂະຫຍາຍຕົວຢ່າງຕໍ່ເນື່ອງ, ລວມຍອດຜະລິດຕະພັນພາຍໃນເພີ່ມຂຶ້ນ 7,10%, ເຊິ່ງສາມາດສ້າວມູນຄ່າໃນລາຄາປັດຈຸບັນໄດ້ 629,37 ຕື້ກີບ, ທຽບໃສ່ປີ 2014 ເພີ່ມຂຶ້ນ 1,84 ເທົ່າ, ລາຍໄດ້ສະເລ່ຍ 16,31 ລ້ານກີບ ຫຼືເທົ່າກັບ 2.038,86 ໂດລາຕໍ່ຄົນຕໍ່ປີ, ຊີວິດການເປັນຢູ່ຂອງປະຊາຊົນນັບມື້ດີຂຶ້ນເປັນກ້າວໆ, ລະບົບຄົມມະນາຄົມ, ໂທລະຄົມມະນາຄົມ ແລະ ການນຳໃຊ້ໄຟຟ້າ ກໍ່ໄດ້ເຂົ້າເຖິງພໍ່ແມ່ປະຊາຊົນຢ່າງທົ່ວເຖິງ, ຊີວິດການເປັນຢູ່ ຂອງປະຊາຊົນ ໄດ້ຮັບການປັບປຸງຍົກລະດັບຢ່າງບໍ່ຢຸດຢັ້ງ, ມີຫລາຍບ້ານໄດ້ຫລຸດພົ້ນອອກຈາກຄວາມທຸກຍາກ ແລະໄດ້ກາຍເປັນບ້ານພັດທະນາ, ປະຈຸບັນ ບ້ານທຸກຍາກຍັງເຫລືອ 4 ບ້ານ, ອັດຕາຄອບຄົວທຸກຍາກໄດ້ຫລຸດລົງເທື່ອລະກ້າວ.
ຊຶ່ງກອງປະຊຸມຄັ້ງນີ້ ຈະໄດ້ຮັບຮອງເອົາບັນດາເອກະສານທີ່ເປັນຍຸດທະສາດຂອງຄະນະບໍລິຫານງານພັກເມືອງ ສະໄຫມທີ IX, ພ້ອມກັນນັ້ນ ກໍຈະໄດ້ໃຊ້ສິດປະຊາທິປະໄຕ ຄັດເລືອກຄະນະບໍລິຫານງານພັກເມືອງຊຸດໃຫມ່ ເພື່ອສືບຕໍ່ຊີ້ນໍາ-ນໍາພາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກເມືອງ ໃນ 5 ປີ ຕໍ່ຫນ້າ ໃຫ້ປະກົດຜົນເປັນຈິງ.
ກອງປະຊຸມນີ້ ຈະໄດ້ດຳເນີນໄປເປັນເວລາ 2 ວັນ (12-13/2/2020) ຈຶ່ງຈະສໍາເລັດ.

ຂ່າວ:ພຸດທະສອນ
Medialaos ຂ່າວເຊກອງ