ກອງປະຊຸມໃຫຍ່ ຄັ້ງທີ 7 ອົງຄະນະພັກເມືອງປາກກະດິງ ເປີດຂຶ້ນຢ່າງເປັນທາງການ

0
218

ກອງປະຊຸມໃຫຍ່ອົງຄະນະພັກເມືອງປາກກະດິງ ຄັ້ງທີ VII ໄດ້ໄຂຂຶ້ນຢ່າງເປັນທາງການ ໃນວັນທີ 13 ກຸມພາ 2020 ຢູ່ຫ້ອງວ່າການເມືອງປາກກະດິງ ໂດຍພາຍໃຕ້ການເປັນປະທານຂອງ ສະຫາຍ ສົມພອນ ຈັນທະນາສຸກ ເລຂາຄະນະບໍລິຫານງານພັກເມືອງ, ເປັນກຽດເຂົ້າຮ່ວມຂອງ ສະຫາຍ ປອ ສຸວັນນີ ໄຊຊະນະ ຮອງເລຂາຄະນະບໍລິຫານງານພັກແຂວງ-ແຂວງບໍລິຄຳໄຊ, ມີຜູ້ແທນສົມບູນ 111 ສະຫາຍ ຍິງ 4 ສະຫາຍ, ແຂກຖືກເຊີນຈາກບັນດາເມືອງ ແລະ ພະແນກການຂັ້ນແຂວງ, ຫ້ອງການອ້ອມຂ້າງເມືອງ ເຂົ້າຮ່ວມ.

ສະຫາຍ ສົມພອນ ຈັນທະນາສຸກ ເລຂາຄະນະບໍລິຫານງານພັກເມືອງ ໄດ້ເປັນກຽດຜ່ານບົດລາຍງານການເມືອງທັງສອງພາກ ເຊີ່ງທ່ານໄດ້ຍົກໃຫ້ເຫັນວ່າ: ຕະຫຼອດໄລຍະ 5 ປີ ຜ່ານມາອົງຄະນະພັກເມືອງ ຊຸດທີ VI ໄດ້ຕັ້ງໜ້າ ໂດຍຍົກສູງຄວາມສາມາດນຳພາ, ປັບປຸງແບບແຜນວິທີເຮັດວຽກ, ຍຶດໝັ້ນແນວທາງປ່ຽນແປງຂອງພັກ, ປົກປັກຮັກສາສະຖຽນລະພາບທາງດ້ານການເມືອງ, ພັດທະນາເສດຖະກິດເຂັ້ມແຂງ, ເຮັດໃຫ້ສັງຄົມມີຄວາມສະຫງົບຢ່າງໜັກແໜ້ນ, ການຄຸ້ມຄອງລັດ-ຄຸ້ມຄອງສັງຄົມ ດ້ວຍລະບຽບກົດໝາຍຢ່າງໜັກແໜ້ນ ແລະ ຍຸຕິທຳ, ສີ່ງທີ່ພົ້ນເດັ່ນ ສາມາດແກ້ໄຂປະກົດການຫຍໍ້ທໍ້ທາງສັງຄົມ ໄດ້ລຸດໜ້ອຍຖອຍລົງ ໂດຍສະເພາະແມ່ນການແກ້ໄຂ 4 ເຖື່ອນ ຕິດພັນກັບການຈັດຕັ້ງປະຕິບັດ 9 ຫົວຂໍ້ວິທະຍາສາດຢ່າງຕັ້ງໜ້າ ແລະ ສຳເລັດຫຼາຍດ້ານ ເຊັ່ນ:

ສາມາດເກັບລາຍຮັບເຂົ້າງົບປະມານບັນລຸໄດ້ 98,99% ຂອງແຜນການ, ໄດ້ຫັນລົງກໍ່ສ້າງຮາຖານການເມືອງ-ພັດທະນາຊົນນະບົດຮອບດ້ານ ຕິດພັນກັບວຽກງານ 3 ສ້າງ, ສຸມໃສ່ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ເຮັດໃຫ້ເສດຖະກິດຂະຫຍາຍຕົວຕໍ່ເນື່ອງ ສະເລ່ຍໃນລະດັບ 8,26% ຕໍ່ປີ, ລາຍຮັບຂອງປະຊາຊົນບັນລຸ 1.089 ໂດລ່າຕໍ່ຄົນຕໍ່ປີ, ມູນຄ່າການລົງທຶນຢູ່ພາຍໃນເມືອງມີທ່າອ່ຽງເພີ່ມຂຶ້ນ, ຊີວິດການເປັນຢູ່ຂອງປະຊາຊົນນັບມື້ດີຂຶ້ນເປັນກ້າວໆ, ລະບົບຄົມມະນາຄົມ, ໂທລະຄົມມະນາຄົມ ແລະ ການນຳໃຊ້ໄຟຟ້າ ກໍ່ໄດ້ເຂົ້າເຖີງພໍ່ແມ່ປະຊາຊົນຢ່າງທົ່ວເຖິງ, ຊີວິດການເປັນຢູ່ຂອງປະຊາຊົນໄດ້ຮັບການພັດທະນາ ມີຄອບຄົວພົ້ນທຸກກວມ 97,36%, ຄອບຄົວພັດທະນາ ກວມ 97,36%, ບ້ານວັດທະນະທຳກວມເອົາ 100%, ອັດຕາການເຂົ້າຮຽນສຸດທິຊັ້ນປະຖົມບັນລຸ 99,8%, ອັດຕາການເຂົ້າຮຽນລວມຊັ້ນມັດທະຍົມຕົ້ນບັນລຸ 75% ແລະ ມັດທະຍົມປາຍ 42%, ສາມາດສ້າງໜ່ວຍພັກປອດໃສ, ເຂັ້ມແຂງໜັກແໜ້ນໄດ້ 61 ໜ່ວຍ ກວມ 81,3%, ສະມາຊິກພັກແຂງຈໍານວນ 1.093 ສະຫາຍ ກວມ 86,95%.
ກອງປະຊຸມນີ້ ຈະໄດ້ດຳເນີນໄປເປັນເວລາ 2 ວັນ ໂດຍຜູ້ແທນກອງປະຊຸມ ຈະໄດ້ປະກອບຄຳຄິດຄຳເຫັນ ແລະ ປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ຊີ້ນຳ – ນໍາພາເມືອງປາກກະດິງຕໍ່ໄປ.

Medialaos bolikhamxay