ພິທີ ມອບ-ຮັບໜ້າທີ່ຫົວໜ້າພະແນກຖະແຫຼງຂ່າວວັດທະນະທໍາ ແລະ ທ່ອງທ່ຽວແຂວງຫຼວງພະບາງ ໄດ້ຈັດຂຶ້ນວັນທີ 12 ກຸມພາ 2020 ທີ່ຫໍພິພິທະພັນແຫ່ງຊາດຫຼວງພະບາງ ໂດຍມີ ທ່ານ ວົງສະຫວັນ ເທບພະຈັນ ຮອງເຈົ້າແຂວງ, ພະແນກການອ້ອມຂ້າງແຂວງ; ແຂກຮັບເຊີນ, ພາກສ່ວນທຸລະກິດທ່ອງທ່ຽວ ແລະ ຂະແໜງການອ້ອມຂ້າງພະແນກພ້ອມດ້ວຍພະນັກງານເຂົ້າຢ່າງພ້ອມພຽງກັນ.

ພິທີດັ່ງກ່າວໄດ້ຜ່ານຂໍ້ຕົກລົງເຈົ້າແຂວງຫຼວງພະບາງ ວ່າດ້ວຍການອະນຸມັດໃຫ້ທ່ານ ສຸລິທິບ ໜໍ່ຄຸນຜົນ ເລຂາຄະນະພັກຮາກຖານ ຫົວໜ້າພັກແນກຖະແຫຼງຂ່າວວັດທະນາທໍາ ແລະ ທ່ອງທ່ຽວແຂວງຜູ້ເກົ່າອອກພັກຜ່ອນຮັບອຸດໜຸນບໍານານຕາມອາຍຸການທີ່ໄດ້ກໍານົດໄວ້ໃນກົດໝາຍ ແລະ ຜ່ານຂໍ້ຕົກລົງຂອງເຈົ້າແຂວງວ່າດ້ວຍ ການແຕ່ງຕັ້ງ ທານ ປອ ນາງ ສຸດາພອນ ຄົມທະວົງ ຮອງຫົວໜ້າພະແນກຖະແຫຼງຂ່າວວັດທະນາທໍາ ແລະ ທ່ອງທ່ຽວແຂວງຂຶ້ນເປັນຫົວໜ້າພະແນກ ຖວທ ແຂວງຄົນໃໝ່ .

ຈາກນັ້ນ ກໍໄດ້ມີພິທີເຊັນບົດບັນທຶກມອບ-ຮັບຢ່າງເປັນທັງການ. ພ້ອມດຽວກັນນີ້ຍັງໄດ້ຟັງການລາຍງານ ການເຄື່ອນໄຫວພາຍໃຕ້ການຊີ້ນໍາ-ນໍາພາຂອງ ທ່ານ ສຸລິທິບ ໜໍ່ຄຸນຜົນ ອະດິດຫົວໜ້າ ພະແນກຖະແຫຼງຂ່າວວັດທະນະທໍາ ແລະ ທ່ອງທ່ຽວ ໃນໄລຍະຜ່ານມາ ເຊິ່ງໃນນີ້ໄດ້ຍົກໃຫ້ເຫັນຜົນງານໃນຫຼາຍດ້ານເປັນຕົ້ນ ແມ່ນໄດ້ຈັດຕັ້ງບັນດາໂຄງການລົງທຶນຂອງລັດ 7 ໂຄງການ,ໃນນີ້ສໍາເລັດການຈັດຕັ້ງປະຕິບັດໂຄງການປຸກສ້າງຫໍວັດທະນະທໍາ ແລະ ຫ້ອງການກຸ່ມບ້ານ ນາຫຼວງ ເມືອງໂພນທອງ ລວມມີ 6 ໂຄງການ,ສົມທົບກັບພະແນກການທີ່ກ່ຽວຂ້ອງລົງກວດກາບັນດາໂຄງການທີ່ນໍາສະເໜີເຂົ້າແຜນປີ 2020 ປະກອບມີ 4 ໂຄງການ.

ວຽກງານຖະແຫຼງຂ່າວ-ສື່ມວນຊົນ: ແມ່ນສາມາດສ້າງນັກຂ່າວໄດ້ 94 ຄົນ, ຍິງ 36 ຄົນ, ຕິດຕັ້ງ ໂທລະໂຄ່ງ ໃຫ້ບັນດາບ້ານໃນ 12 ເມືອງໄດ້ 243 ບ້ານ ກວມ 32%ຂອງຈໍານວນ758 ບ້ານ ໃນທົ່ວແຂວງ; ຜະລິດໜັງສືພິມຫຼວງພະບາງໃໝ່ ເປັນລາຍປັກ (15 ວັນ) ໄດ້ 42.000 ສະບັບ, ຈໍາໜ່າຍໄດ້ 29.760 ສະບັບ.ສາມາດສ້າງຄອບຄົວວັດທະນະທໍາໄດ້ 19.872 ຄອບຄົວ ແລະສ້າງບ້ານວັດທະນະທໍາໄດ້ 236 ບ້ານ ກວມ 31% ຂອງບ້ານທັງໝົດ,ປັດຈຸບັນທົ່ວແຂວງມີບ້ານວັດທະນະທໍາ ທັງໝົດ 580 ບ້ານ, ກວມ 75.5%, ມີຄອບຄົວວັດທະນະທໍາ 54.717 ຄອບຄົວ, ກວມ 74.11%.

ສ້າງກຸ່ມບ້ານວັດທະນະທໍາ ໄດ້ 15 ກຸ່ມບ້ານ, ສໍານັກງານວັດທະນະທໍາ ໄດ້ 4 ສໍານັກງານ ແລະກອງຕໍາຫຼວດວັດທະນະທໍາໄດ້ 1 ກົມກອງ ແລະ ໄດ້ສຸມໃສ່ໃນການພັດທະນາໂຄງລ່າງພື້ນຖານການທ່ອງທ່ຽວ, ສິ່ງອໍານວຍຄວາມສະດວກດ້ານຕ່າງໆຄື ຫ້ອງນໍ້າຢູ່ແຫຼ່ງທ່ອງທ່ຽວທີ່ສໍາຄັນເຊັ່ນ: ຫໍພິພິທະພັນ, ວັດຊຽງທອງ, ພູສີ, ຕາດກວາງຊີ, ຖໍ້າຕິ່ງ ແລະບ່ອນອື່ນໆ. ນອກຈາກນີ້ ຍັງສ້າງສິ່ງໂຄສະນາ, ແຜນທີ່ ແລະປ້າຍຊີ້ບອກຕ່າງໆ, ໄດ້ສຸມໃສ່ພັດທະນາບຸກຄະລາກອນໃນຂົງເຂດການທ່ອງທ່ຽວຕື່ມອີກ.

ໂອກາດອັນມີຄວາມໝາຍຄວາມສໍາຄັນນີ້ທ່ານ ວົງສະຫວັນ ເທບພະຈັນ ຮອງເຈົ້າແຂວງ ກໍໄດ້ຄໍາເຫັນໂອ້ລົມ ໂດຍໄດ້ຍົກໃຫ້ເຫັນກ່ຽວກັບການຍົກຍ້າຍ, ສັບຊ້ອນບ່ອນປະຈໍາການຂອງພະນັກງານການນໍາ, ພະນັກງານຫຼັກແຫຼ່ງ ເພື່ອກະກຽມຄວາມພ້ອມໃຫ້ແກ່ການດໍາເນີນກອງປະຊຸມຂອງອົງຄະນະພັກແຕ່ລະຂັ້ນໃຫ້ຮັບປະກັນລັກສະນະສືບທອດ-ປ່ຽນແທນ ທາງດ້ານນະພາບ,ພ້ອມທັງໄດ້ເໜັ້ນໃຫ້ຫົວໜ້າພະແນກຖະແຫຼງຂ່າວ, ວັດທະນາທໍາ ແລະ ການທ່ອງທ່ຽວແຂວງ ຄົນໃໝ່ ສືບຕໍ່ປະຕິບັດວຽກງານຮອບດ້ານ,ສຸມໃສ່ບຸກຄະລາກອນ ແລະ ສະມາຊິກພັກ ເຂົ້າໃໃສ່ແຜນພັດທະນາວຽກງານ ໃຫ້ມີຄຸນນະພາບ ເພື່ອພັດທະນາບັນດາຂົງເຂດວຽກງານຢູ່ພາຍໃນພະແນກດີຂຶ້ນ.

ຂ່າວ: ເພັດສາຄອນ ສິມມະວົງ
LuangprabangNews