ສຸມໃສ່ສ້າງຄວາມເຂັ້ມແຂງ ແກ່ທີມງານ ເຝົ້າລະວັງ-ຕອບໂຕ້ໄວ ພະຍາດ ໂຄໂຣນາ

0
364

ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຮ່ວມກັບ ອົງການອະນາໄມໂລກ, ສູນຄວບຄຸມ ແລະ ປ້ອງກັນພະຍາດ ສະຫະລັດອາເມລິກາ ໄດ້ຈັດສຳມະນາ ກ່ຽວກັບວຽກງານເຝົ້າລະວັງ ແລະ ການຕອບໂຕ້ຕໍ່ກັບ ການລະບາດ ຂອງເຊື້ອພະຍາດ ອັກເສບປອດຍ້ອນເຊື້ອຈຸລະໂລກ ໄວຣັດ ໂຄໂຣນາ 2019, ລວມທັງທີມງານຕອບໂຕ້ໄວຂັ້ນແຂວງ (RRT) ໃນທົ່ວປະເທດ ຊຶ່ງຈັດຂຶ້ນໃນວັນທີ 13 ກຸມພາ 2020 ທີ່ໂຮງແຮມຄຣາວພາຊາ ນະຄອນຫລວງວຽງຈັນ.

ທ່ານ ດຣ ພອນປະດິດ ສັງໄຊຍະລາດ ຫົວໜ້າສູນວິເຄາະ ແລະ ລະບາດວິທະຍາ ກະຊວງ ສາທາລະນະສຸກ ໄດ້ກ່າວວ່າ: ການສຳມະນາໃນຄັ້ງນີ້ ມີຈຸດປະສົງເພື່ອຍົກລະດັບ ແລະ ກຽມຄວາມພ້ອມໃນການຮັບມື ໃຫ້ທີມງານຕອບໂຕ້ ໄວຂັ້ນແຂວງ ໄດ້ເຂົ້າໃຈເຖິງສະຖານະການ ຂອງໂລກ ແລະ ຍຸດທະສາດການຕອບໂຕ້ ກັບເຊື້ອໄວຣັດ ໂຄໂຣນາ ສາຍພັນໃໝ່ (2019-nCoV) ແລະ ພະຍາດລະບາດອື່ນໆທີ່ອາດເກີດຂຶ້ນ ໃນ ສປປ ລາວ; ພ້ອມທັງເຂົ້າໃຈເຖິງກົນໄກ ການປະສານງານ ທີ່ມີຢູ່ແລ້ວ (ສູນປະຕິບັດງານສຸກເສີນ) ແລະ ຂະບວນການຄັດກອງ ທີ່ດ່ານສາກົນຂາເຂົ້າຕ່າງໆ. ພ້ອມກັນນີ້, ຍັງເປັນການທົບ ທວນຄືນ ແລະ ໃຫ້ຄຳແນະນຳ ກ່ຽວກັບການກວດກໍລະນີຄົນເຈັບ, ການສອບສວນ ແລະ ຕິດຕາມການຕິດຕໍ່ ໃຫ້ທີມງານການ ຕອບໂຕ້ໄວຂັ້ນແຂວງ.

ນອກຈາກນີ້, ກໍເພື່ອເປັນການປະຕິບັດ ຕາມຄຳແນະນຳສຳ ລັບຫ້ອງວິເຄາະແຫ່ງຊາດ ໃນປັດຈຸບັນ ສຳລັບເຊື້ອ  ໄວຣັສ ໂຄໂຣນາ, ທັງນີ້ ກໍເພື່ອເປັນການຍົກສູງສະ ຕິຕື່ນຕົວ ກ່ຽວກັບການຄຸ້ມຄອງກໍລະນີ, ການປ້ອງກັນ ແລະ ຄວບຄຸມ ການຕິດເຊື້ອ ໄວຣັສດັ່ງກ່າວ, ລວມທັງການປະຕິບັດ ການນຸ່ງເຄື່ອງປ້ອງກັນຕົວເອງ ຢ່າງເໝາະສົມ ສຳລັບການຄັດກອງກໍລະນີ, ການສອບສວນກໍລະນີ ແລະ ໃນຫ້ອງວິເຄາະ.

Medialaos