ສະຫາຍ ຂັນຕີ ສີລະວົງສາ ໄດ້ຮັບເລືອກເປັນເລຂາຄະນະບໍລິຫານງານພັກເມືອງລະມາມ

0
303

ກອງປະຊຸມໃຫຍ່ຄັ້ງທີ IX ອົງຄະນະພັກເມືອງລະມາມ ແຂວງເຊກອງ ໄດ້ສໍາເລັດລົງຢ່າງຈົບງາມ ໃນວັນທີ 13 ກຸມພາ ນີ້ ທີ່ຫ້ອງປະຊຸມຂອງເມືອງດັ່ງກ່າວ
ກອງປະຊຸມໄດ້ພ້ອມກັນຄົ້ນຄວ້າ ແລະເປັນເອກະພາບຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະບົດສໍາຫຼວດການນໍາພາລວມຂອງຄະນະບໍລິຫານງານພັກເມືອງຊຸດທີ VIII ໃນໄລຍະ 5 ປີຜ່ານມາ ແລະທິດທາງໜ້າທີ່ໃນຕໍ່ໜ້າ ກໍຄືຄາດໝາຍສູ້ຊົນຂອງແຜນການ 5 ປີ (2020-2024) ເພື່ອເຮັດໃຫ້ເມືອງລະມາມ ກ້າວຂຶ້ນດ້ວຍທ່ວງທ່າອັນໜັກແໜ້ນ, ຮອບດ້ານ, ສ້າງພື້ນຖານໃຫ້ອົງຄະນະພັກເມືອງນຳພາປະຊາຊົນບັນດາເຜົ່າຫຼຸດພົ້ນອອກຈາກຄວາມທຸກຍາກ ແລະດ້ອຍພັດທະນາເທື່ອລະກ້າວ.

ຊຶ່ງກອງປະຊຸມໄດ້ຟັງການປະກອບຄໍາເຫັນຈາກຜູ້ຕາງໜ້າຫຼາຍພາກສ່ວນ, ເຊິ່ງສ່ວນຫຼາຍໄດ້ລົງເລິກລາຍງານຜົນສໍາເລັດແຫ່ງການຜັນຂະຫຍາຍ ແລະຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IX ເຂົ້າໃນແຕ່ລະຂົງເຂດວຽກງານກົມກອງ, ຂະແໜງການຂອງຕົນເອງ, ອັນໄດ້ເຮັດໃຫ້ກອງປະຊຸມມີເນື້ອໃນສົມບູນຄົບຖ້ວນ ແລະໄດ້ດໍາເນີນການປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດທີ IX ເຊິ່ງມີຜູ້ຮັບສະໝັກທັງໝົດ 29 ສະຫາຍ,ຍິງ 4 ສະຫາຍ, ໃນນີ້ເລືອກເອົາ 25 ສະຫາຍ, ຍິງ 3 ສະຫາຍ.

ກອງປະຊຸມຄັ້ງປະຖົມມະລຶກໄດ້ຕົກລົງເລືອກເອົາສະຫາຍ ຂັນຕີ ສີລະວົງສາ ເປັນເລຂາຄະນະບໍລິຫານງານພັກເມືອງ, ສະຫາຍ ບົວໄລ ວິໄລວົງ ເປັນຮອງເລຂາ, ທັງເປັນປະທານກວດກາພັກເມືອງ, ສະຫາຍ ໄຊຍະຫວັດ ກ້ອນຄໍາຫມັ້ນ ເປັນຮອງເລຂາ, ເລືອກເອົາສະຫາຍ ນາງ ວິນັນດາ ອ່ອນສີມາ ແລະສະຫາຍ ສາຍຄອນ ບົວສີ ເປັນຮອງປະທານ.

ຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຂອງສະຫາຍເລຂາພັກແຂວງ, ເຊິ່ງສະຫາຍໄດ້ເນັ້ນໜັກໃຫ້ຄະນະບໍລິຫານງານພັກເມືອງຊຸດໃໝ່ຕ້ອງໄດ້ຄົ້ນຄວ້າ, ເຊື່ອມຊຶມກໍາແໜ້ນ ແລະຜັນຂະຫຍາຍແນວທາງນະໂຍບາຍ, ມະຕິ, ຄໍາສັ່ງ, ນິຕິກໍາຕ່າງໆຂອງຂັ້ນເທິງ ກໍຄືມະຕິກອງປະຊຸມໃຫຍ່ຄັ້ງທີ IX ໃຫ້ກາຍເປັນອັນລະອຽດ ແລະສອດຄ່ອງກັບສະພາບຄວາມເປັນຈິງ ແລະນໍາພາຈັດຕັ້ງປະຕິບັດໃຫ້ມີຜົນສໍາເລັດ, ເພີ່ມທະວີໃນການສຶກສາອົບຮົມໃຫ້ຖັນແຖວພະນັກງານ-ສະມາຊິກພັກ ແລະປະຊາຊົນບັນດາເຜົ່າໃຫ້ມີຄວາມໜັກແໜ້ນທາງດ້ານການເມືອງ, ມີຄວາມເຊື່ອໝັ້ນຕໍ່ການນໍາພາຂອງພັກ, ພ້ອມທັງເສີມຂະຫຍາຍຈິດໃຈເປັນເຈົ້າຕົນເອງ ເພິ່ງຕົນເອງ ສ້າງຄວາມຮັ່ງມີເຂັ້ມແຂງດ້ວຍຕົນເອງໃຫ້ເປັນຮູບປະທໍາຫຼາຍຂຶ້ນ.

ຂ່າວ: ພຸດທະສອນ
Medialaos ຂ່າວເຊກອງ