ໃນຕອນເຊົ້າຂອງວັນທີ່ 17 ກຸມພາ 2020 ຢູ່ທີ່ສະໂມສອນໃຫຍ່ຂອງ ເມືອງບູນໃຕ້, ແຂວງຜົ້ງສາລີໄດ້ເປີດກອງປະຊຸມໃຫຍ່ຜູ້ແທນອົງຄະນະພັກເມືອງບູນໃຕ້ຄັ້ງທີ່ VI ຂື້ນຢ່າງເປັນທາງການ. ໂດຍພາຍໃຕ້ການເປັນປະທານຂອງສະຫາຍ ອ່ອນຄຳ ອີນແສງ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງໆບູນໃຕ້, ເປັນກຽດເຂົ້າຮ່ວມຂອງສະຫາຍ ຄຳຜອຍ ວັນນະສານ ຮັກສາການເລຂາພັກແຂວງ, ເຈົ້າແຂວງໆຜົ້ງສາລີ, ມີສະຫາຍ ສັນຕິ ແກ້ວຍະສານ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງ, ທັງເປັນຜູ້ຊີ້ນຳວຽກງານຮອບດ້ານຂອງເມືອງບູນໃຕ້, ມີຜູ່ຕ່າງໜ້າຈາກຄະນະຄະນະຈັດຕັ້ງແຂວງ – ກວດກາແຂວງ, ກຳມະການພັກແຂວງ, ຮອງເລຂາພັກເມືອງ, ກຳມະການປະຈຳພັກເມືອງ, ກຳມະການພັກເມືອງ, ເຈົ້າເມືອງ-ຮອງເຈົ້າເມືອງຈາກ 6 ເມືອງ,ພະແນກຕ່າງໆອ້ອມຂ້າງແຂວງ, ພະນັກງານປະຕິວັດອາວຸໂສບຳນານ, ອະດິດການນຳເມືອງ, ມີຜູ້ແທນສົມບູນເຂົ້າຮ່ວມທັງໝົດ 107 ສະຫາຍ, ຍີງ 10 ສະຫາຍ, ທີ່ເປັນຕົວແທນໃຫ້ແກ່ສະມາຊີກພັກ, ທີ່ມາຈາກຄະນະພັກຮາກຖານ ແລະ ໝ່ວຍພັກທົ່ວເມືອງບູນໃຕ້ທັງໝົດ 1.456 ສະຫາຍ.

ໃນກອງປະຊຸມສະຫາຍ ອ່ອນຄຳ ອີນແສງ ກຳມະການພັກແຂວງ, ເລຂາພັກເມືອງ, ເຈົ້າເມືອງໆບູນໃຕ້ ກໍ່ໄດ້ຂື້ນກ່າວໄຂກອງປະຊຸມຢ່າງເປັນທາງການ ພ້ອມທັງຜ່ານຮ່າງລາຍງານການເມືອງ ເຊີ່ງບາງຕອນໄດ້ທ່ານກ່າວວ່າ: ພາຍໃຕ້ການຊີ້ນຳຈາກຄະນະບໍລິຫານງານພັກແຂວງ ແລະ ການນຳພາຂອງຄະນະບໍລິຫານງານພັກເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກຂັ້ນຕ່າງໆ ໂດຍສະເພາະແມ່ນ ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກເມືອງບູນໃຕ້ ຕະຫຼອດໄລຍະ 5 ປີຜ່ານມາເຫັນວ່າມີຜົນສໍາເລັດຫຼາຍດ້ານ ເປັນຕົ້ນ ທົ່ວເມືອງບູນເໜືອ ແມ່ນມີສະຖຽນລະພາບທາງດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດຖະກິດ-ສັງຄົມ ມີການພັດທະນາດ້ວຍບາດກ້າວ ແລະ ທ່ວງທ່າໃໝ່, ປະຊາຊົນບັນດາເຜົ່າມີຄວາມສາມັກຄີປອງດອງ, ພື້ນຖານໂຄງລ່າງຂອງເມືອງກໍ່ໄດ້ຮັບການປັບປຸງ, ຊີວິດການເປັນຢູ່ຂອງປະຊາຊົນກໍ່ໄດ້ຮັບການປົວແປງດີຂື້ນເປັນກ້າວໆ, ອັດຕາສ່ວນຄວາມທຸກຍາກໄດ້ຫຼຸດໜ້ອຍຖອຍລົງເທື່ອລະກ້າວ.

ເຊີ່ງສະແດງອອກດ້ານເສດຖະກິດມີການຂະຫຍາຍຕົວ ສະເລ່ຍ 8,45%, ທຽບໃສ່ແຜນການ 5 ປີ ປະຕິບັດໄດ້91,28%, ໃນນັ້ນກະສີກຳປ່າໄມ້ກວມ 60,6%, ອຸດສະຫະກຳຫັດຖະກຳ ກວມ 8%, ການບໍລິການກວມ31,4%, ເຊີ່ງສາມາດສ້າງຍອດລາຍຮັບຜົນຜະລີດໃນປີ 2019 ບັນລຸໄດ້ 314,64 ຕື້ກັບ, ໃນນີ່ກະສີກຳ – ປ່າໄມ້ 195,83 ຕື້ກີບ, ອຸດສະຫະກຳ – ຫັດຖະກຳ 22,71 ຕື້ກີບ, ການບໍລິການ 96,09 ຕື້ກີບ, ລວມຍອດມູນຄ່າຜົນຜະລີດສະເລ່ຍທຽບໃສ່ຫົວວວຄົນບັນລຸ 11.747.000 ກີບຕໍ່ຄົນຕໍ່ປີ ເທົ່າກັບ 1.468 ໂດລາຕໍ່ຄົນຕໍ່ປີ.
ກອງປະຊຸມໃຫຍ່ຄັ້ງທີ VI ຂອງຄະນະບໍລິຫານງານພັກເມືອງ ບູນໃຕ້ຄັ້ງນີ້ ຜູ້ແທນທີ່ເຂົ້າຮ່ວມຈະໄດ້ພ້ອມກັນຄົ້ນຄ້ວາ, ປະກອບຄໍາເຫັນໃສ່ຮ່າງບົດລາຍງານການເມືອງ, ແຜນພັດທະນາ ເສດຖະກິດ – ສັງຄົມ 5, ທົບທວນຕີລາຄາຄືນກ່ຽວກັບການຈັດຕັ້ງປະຕິບັດແນວທາງການປ່ຽນແປງໃໝ່ທີ່ມີຫຼັກການຂອງພັກກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກເມືອງ, ກຳນົດທິດທາງໜ້າທີ່ແຕ່ນີ້ຮອດປີ 2024. ພ້ອມທັງເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່.

ກອງປະຊຸມໃຫຍ່ຜູ້ແທນອົງຄະນະພັກເມືອງບູນໃຕ້ຄັ້ງທີ VI ຈະດຳເນີນເປັນເວລາ 2 ວັນ ຮອດວັນທີ 18 ກຸມພາ ຈື່ງສຳເລັດ.

medialaos phongsaly
( ພາບ – ຂ່າວ: ແສງຄຳສາລີວັນ )