ໃນຕອນເຊົ້າ ວັນທີ 20 ກຸມພາ 2020 ທີ່ຈະມາເຖິງນີ້, ສປປ ລາວ ຈະເປັນເຈົ້າພາບຈັດກອງປະຊຸມລັດຖະມົນຕີ ຕ່າງປະເທດອາຊຽນ-ຈີນ ສະໄໝພິເສດ ກ່ຽວກັບ ການລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (Special ASEAN-China Foreign Ministers’ Meeting on the novel coronavirus disease (COVID) ທີ່ ໂຮງແຮມ ດອນຈັນພາເລດ ພາຍໃຕ້ການເປັນປະທານຮ່ວມ ຂອງ ລັດຖະມົນຕີຕ່າງປະເທດ ຟີລິບປິນ ແລະ ສປ.ຈີນ. ເຂົ້າຮ່ວມກອງປະຊຸມຄັ້ງນີ້, ຈະມີບັນດາລັດຖະມົນຕີ ຕ່າງປະເທດອາຊຽນ, ລັດຖະມົນຕີ ຕ່າງປະເທດ (ທີ່ປຶກສາແຫ່ງລັດ) ແຫ່ງ ສປ. ຈີນ ແລະ ເລຂາທິການໃຫຍ່ອາຊຽນ, ພ້ອມດ້ວຍພະນັກງານວິຊາການກ່ຽວຂ້ອງ.

ຈຸດປະສົງຂອງກອງປະຊຸມໃນຄັ້ງນີ້, ແມ່ນເພື່ອປຶກສາຫາລື ແລະ ແລກປ່ຽນຄໍາຄິດຄໍາເຫັນຮ່ວມກັນ ເພື່ອຊອກຊ່ອງທາງ ແລະ ກຳນົດມາດຕະການໃນການຕ້ານ ແລະ ຮັບມືກັບການລະບາດ ຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່. ຄາດວ່າກອງປະຊຸມຄັ້ງນີ້, ຈະມີການພິຈາລະນາ ຮັບຮອງເອົາຖະແຫລງການປະທານຮ່ວມ (Co-chairs’ Statement) ໃນການຕ້ານ ແລະ ຮັບມືກັບການລະບາດຂອງພະຍາດດັ່ງກ່າວ.

Medialaos