ໃນວັນທີ 14 ກຸມພາ 2020 ຜ່ານມານີ້ ທ່ານ ຄຳແພງ ເພັດທຸມພອນ ເຈົ້າເມືອງອາດສະພອນ, ທ່ານ ສູນທາລາ ຕົ້ນພານິດ ຮອງຫົວໜ້າພະແນກກະສິກຳ ແລະ ປ່າໄມ້ແຂວງສະຫວັນນະເຂດ, ມີຫົວໜ້າຫ້ອງການກະສິກຳ-ປ່າໄມ້ເມືອງ ພ້ອມດ້ວຍວິຊາການກ່ຽວຂ້ອງ, ອຳນາດການປົກຄອງບ້ານນາມົນ ໄດ້ພ້ອມກັນ ລົງສຳຫຼວດ ຈຸດທີ່ຈະສະເໜີຂຶ້ນແຜນສຶກສາຄວາມເປັນໄປໄດ້ໃນການ ກໍ່ສ້າງອ່າງເກັບນ້ຳ 2 ຈຸດຄື:

ສາຍເຊຈຳພອນ ແລະ ຫ້ວຍກູ້ ບ້ານນາມົນ ເມືອງອາດສະພອນ ແຂວງສະຫວັນນະເຂດ; ການລົງສຳຫຼວດຄັ້ງນີ້ແມ່ນອີງໃສ່ຄວາມຮຽກຮ້ອງຕ້ອງການຂອງປະຊາຊົນທີ່ມີຄວາມຮຽກຮ້ອງຕ້ອງການສູງ, ໃນການນໍາໃຊ້ຂົວຈົມ ສັນຈອນໄປມາ ຄ້າຂາຍລະຫວ່າງບ້ານຕໍ່ບ້ານ ແລະ ບ້ານຫາເມືອງ, ພ້ອມນີ້ ຍັງມີຄວາມຕ້ອງການນຳໃຊ້ລະບົບຊົນລະປະທານ ເພື່ອສະໜອງນ້ຳເຂົ້າໃນການຜະລິດ ທັງລະດູແລ້ງ-ລະດູຝົນ ແລະ ຂະຫຍາຍພັນປາ, ຖ້າຫາກໂຄງການດັ່ງກ່າວ ໄດ້ຮັບການຮັບຮອງເຂົ້າແຜນ ຈະສາມາດສະໜອງນ້ຳເຂົ້າໃນການຜະລິດກະສິກຳກວມເນື້ອທີ່ 1 ພັນກວ່າເຮັກຕາ, ມີປະຊາຊົນ 700 ກວ່າຄອບຄົວ, ຈາກ 04 ບ້ານຄື: ບ້ານນາມົນ, ບ້ານກຸດນ້ຳແລ້ງ, ບ້ານກຸດຫີນ ແລະ ບ້ານນາທົ່ມ ໄດ້ຊົມໃຊ້.

ຈາກນັ້ນ ທ່ານເຈົ້າເມືອງອາດສະພອນ ຍັງໄດ້ເນັ້ນໜັກໃຫ້ວິຊາການ ຂຽນແຜນລະອຽດ ເພື່ອສະເໜີເຂົ້າແຜນພັດທະນາຂອງເມືອງ ແລະ ແຂວງຕາມລຳດັບ. ເລັງໃສ່ຊ່ວຍໃຫ້ ປະຊາຊົນໄດ້ຊົມໃຊ້ຕາມຄວາມຮຽກຮ້ອງຕ້ອງການ ເພື່ອເພີ່ມຊ່ອງທາງການທຳມາຫາກິນຂອງ ປະຊາຊົນ, ເຮັດໃຫ້ເຂົາເຈົ້າມີລາຍຮັບເພີ່ມຂຶ້ນ ແລະ ຫຼຸດພົ້ນອອກຈາກຄວາມທຸກຍາກໄປເທື່ອລະກ້າວ.

ພາບ ແລະຂ່າວ:
ສົມຈິດ ແກ້ວສີຖາທິລາດ
savannakhet medialaos