ໃນຕອນເຊົ້າຂອງວັນທີ 14 ກຸມພາ 2020 ທີ່ຜ່ານມາ, ກຳມະບານຮາກຖານ ບໍລິສັດຄູນໄຊພັດທະນາຫີນກາວ ຈຳກັດ ໄດ້ເປີດກອງປະຊຸມໃຫຍ່ຄັ້ງທີ VI ຂັ້ນຂອງຕົນຂຶ້ນຢ່າງເປັນທາງການ, ທີ່ຫ້ອງປະຊຸມຂອງບໍລິສັດຄູນໄຊພັດທະນາຫີນກາວຈຳກັດ,ໂດຍການເຂົ້າຮ່ວມຂອງ ທ່ານ ນາງ ພົມມາ ທອງເພັງ ຮອງປະທານຄະນະບໍລິຫານງານສະຫະພັນກຳມະບານແຂວງ, ມີ ທ່ານ ຄອນສະຫວັນ ແກ້ວອັດສາວົງ ຮອງຜູ້ອຳນວຍການບໍລິສັດຄູນໄຊພັດທະນາຫີນກາວ ຈຳກັດ, ພ້ອມດ້ວຍບັນດາຄະນະກຳມະບານຮາກຖານ ຕະຫຼອດຮອດສະມາຊິກກຳມະບານພາຍໃນຂອງຕົນເຂົ້າຮ່ວມ ຈໍານວນ 38 ທ່ານ, ຍິງ 5 ທ່ານ.

ໃນກອງປະຊຸມ ທ່ານ ໄມຈັນຕານ ວົງສາ ຄະນະກຳມະບານຮາກຖານ ( ຊຸດເກົ່າ ), ກໍ່ໄດ້ຂື້ນຜ່ານບົດລາຍງານການເມືອງຂອງກຳມະບານຮາກຖານ ບໍລິສັດຄູນໄຊພັດທະນາຫີນກາວຈຳກັດ ພາກI ແລະ ພາກ II ຢ່າງຮອບດ້ານ ໂດຍຍົກໃຫ້ເຫັນວ່າ: ກຳມະບານຮາກຖານຂອງຕົນ ແມ່ນອົງການຈັດຕັ້ງມະຫາຊົນໜຶ່ງທີ່ນອນຢູ່ໃນຫົວໜ່ວຍທຸລະກິດການຜະລິດ ຫຸ້ນສ່ວນລະຫວ່າງລັດກັບເອກະຊົນ ຕາມທິດທາງຂະຫຍາຍເສດຖະກິດໄປຕາມກົນໄກການຕະຫຼາດທີ່ມີຜົນກຳໄລ ແລະ ເປັນກຳມະບານຮາກຖານທີ່ຂຶ້ນກັບສະຫະພັນກຳມະບານແຂວງ ໂດຍໄດ້ປະຕິບັດພາລະບົດບາດ, ໜ້າທີ່ຕາມກົດລະບຽບຂອງກຳມະບານລາວວາງອອກຢ່າງເຂັ້ມງວດ ໃນການປົກປ້ອງສິດຜົນປະໂຫຍດຂອງສະມາຊິກກຳມະບານ ເປັນຕົ້ນແມ່ນໄດ້ສະເໜີຂັ້ນເທິງຈ່າຍເງິນອຸດໜູນປີການເກົ່າໃຫ້ແກ່ສະມາຊິກກຳມະບານເປັນເງິນຈຳນວນ 10 ຕື້ກວ່າກີບ ຊຶ່ງໄດ້ຮັບການຈັດຕັ້ງປະຕິບັດເບີກຈ່າຍເປັນທີ່ຮຽບຮ້ອຍແລ້ວ,

ນອກນີ້ ກອງປະຊຸມຍັງໄດ້ມີການສຶບຕໍ່ໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະປະທານ ກຳມະບານຮາກຖານຊຸດໃໝ່ ຈາກຈຳນວນຜູ້ສະໝັກ 7 ທ່ານ, ເລືອກເອົາ 5 ທ່ານ, ໂດຍຜ່ານກອງປະຊຸມຄັ້ງປະຖົມມະລຶກ ເຫັນດີໃຫ້ ທ່ານ ບຸນທອນ ມາລາ ເປັນປະທານກຳມະບານຮາກຖານ ( ຊຸດໃໝ່ ) ທ່ານ ທັດສະພອນ ແກ້ວປະເສີດ ເປັນຮອງປະທານ, ທັງເປັນປະທານກວດກາ ແລະ ອີກ 3 ທ່ານເປັນກຳມະການ.

ຂ່າວ -ພາບ:ວັນນະເລດ ມະນີວົງ.
savannakhet medialaos