ພິທີປະກາດຮັບຮອງເອົາກຳມະບານຮາກຖານ ເຂດເສດຖະກິດພິເສດສະຫວັນ-ເຊໂນ ເປັນກຳມະບານຮາກຖານ 5 ເປັນເຈົ້າ ສະໄໝທີ III ໄດ້ຈັດຂຶ້ນຢ່າງເປັນທາງການ ໃນຕອນເຊົ້າຂອງວັນທີ 13 ກຸມພາ 2020 ທີ່ຫ້ອງປະຊຸມຂອງຕົນ, ໂດຍໃຫ້ກຽດເຂົ້າຮ່ວມຂອງສະຫາຍ ບຸນລ້ຽງ ຈັນວັນເພັງ ປະທານຄະນະບໍລິຫານງານສະຫະພັນກຳມະບານແຂວງ, ມີສະຫາຍ ທອງໄສ ໄຊຍະວົງຄຳດີ ເລຂາໜ່ວຍພັກເຂດເສດຖະກິດພິເສດສະຫວັນ-ເຊໂນ, ມີບັນດາສະຫາຍຄະນະປະທານກຳມະບານຮາກຖານ ຕະຫຼອດຮອດສະມາຊິກກຳມະບານພາຍໃນຂອງຕົນເຂົ້າຮ່ວມຈຳນວນ 53 ສະຫາຍ, ຍິງ 25 ສະຫາຍ.

ໃນພິທີ ສະຫາຍ ສີລາເພັດ ແກ້ວດວງສີ ປະທານກຳມະບານຮາກຖານເຂດເສດຖະກິດພິເສດສະຫວັນ-ເຊໂນ ກໍ່ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດເນື້ອໃນໄລຍະ 3 ປີຜ່ານມາ ( 2017-2019 ) ແລະ ທິດທາງແຜນການ 5 ປີ 2020-2024 ຂອງກໍາມະບານຮາກຖານຢ່າງຮອບດ້ານ. ໂດຍໄດ້ຍົກໃຫ້ເຫັນກ່ຽວກັບການຈັດຕັ້ງປະຕິບັດວຽກງານ 5 ເປັນເຈົ້າແຕ່ລະດ້ານ ສາມາດປະເມີນໄດ້ດັ່ງນີ້: ເປັນເຈົ້າໂຄສະນາສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກກຳມະບານຂອງຕົນປະເມີນໄດ້ 85,26%, ເປັນເຈົ້າໃນການປັບປຸງແບບແຜນວິທີເຮັດວຽກ ແລະ ຂະຫຍາຍການຈັດຕັ້ງກຳມະບານລາວປະເມີນໄດ້ 85,90%, ເປັນເຈົ້າໃນການປົກປ້ອງສິດ ແລະຜົນປະໂຫຍດອັນຊອບທຳຂອງພະນັກງານ, ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານປະເມີນໄດ້ 85,21%, ເປັນເຈົ້າເຂົ້າຮ່ວມໃນການຕິດຕາມ-ກວດກາ ການຄຸ້ມຄອງລັດ, ຄຸ້ມຄອງເສດຖະກິດ, ວັດຖະນະທຳ-ສັງຄົມ ປະເມີນໄດ້ 85,55%, ແລະ ອັນສຸດທ້າຍເປັນເຈົ້າເຂົ້າຮ່ວມໃນການຈັດຕັ້ງປະຕິບັດແນວທາງການຕ່າງປະເທດຂອງພັກ, ລະບຽບກົດໝາຍຂອງລັດ ສາມາດປະເມີນໄດ້ 86,24%, ສະເລ່ຍແລ້ວປະເມີນໄດ້ 85,06%, ຍ້ອນຜົນງານດັ່ງກ່າວ ຈຶ່ງສາມາດຄັດເລືອກໄດ້ ບຸກຄົນດີເດັ່ນປະເພດໃບຍ້ອງຍໍຈຳນວນ 31 ສະຫາຍ ຍິງ 10 ສະຫາຍ ແລະ ໃບຊົມເຊີຍຈໍານວນ 15 ສະຫາຍ, ຍິງ 10 ສະຫາຍ, ພ້ອມນີ້ກໍ່ຍັງໄດ້ຜ່ານຂໍ້ຕົກລົງຂອງປະທານສະຫະພັນກຳມະບານແຂວງ ວ່າດ້ວຍການຮັບຮອງເອົາກຳມະບານຮາກຖານ ເຂດເສດຖະກິດພິເສດສະຫວັນ-ເຊໂນ ເປັນກຳມະບານຮາກຖານ 5 ເປັນເຈົ້າ ສະໄໝທີ III ຢ່າງເປັນທາງການ,

ໂດຍການມອບໃບຢັ້ງຢືນດັ່ງກ່າວ ຂອງ ທ່ານ ບຸນລ້ຽງ ຈັນວັນເພັງ ປະທານຄະນະບໍລິຫານງານສະຫະພັນກຳມະບານແຂວງ ຢ່າງສົມກຽດ, ຊຶ່ງມາໃນຕອນທ້າຍຂອງພິທີ ທ່ານ ຍັງໄດ້ໂອ້ລົມ ແລະ ໃຫ້ທິດຊີ້ນຳຕໍ່ ກຳມະບານຮາກຖານດັ່ງກ່າວຫຼາຍໆບັນຫາທີ່ສຳຄັນ ເປັນຕົ້ນແມ່ນ: ຕ້ອງໄດ້ເອົາໃຈໃສໃນການສຶກສາອົບຮົມທາງດ້ານການເມືອງແນວຄິດ ໃຫ້ແກ່ຖັນແຖວສະມາຊິກກຳມະບານທີ່ຢູ່ໃນຄວາມຮັບຜິດຊອບຂັ້ນຂອງຕົນ ໃຫ້ມີແນວຄິດອຸ່ນອ່ຽນທຸ່ນທ່ຽງເຊື່ອໝັ້ນຕໍ່ການນຳພາຂອງພັກ, ລະບຽບກົດໝາຍຂອງລັດ, ເປັນເຈົ້າຕົນເອງເຂົ້າໃນການປັບປຸງການຈັດຕັ້ງໃຫ້ມີຄວາມເຂັ້ມແຂງ, ມີຄວາມເປັນເອກະພາບ, ຍົກສູງທາງດ້ານຄຸນນະພາບຄຽງຄູ່ກັບປະລິມານ ເພື່ອປະກອບສ່ວນທາງດ້ານຫົວຄິດປະດິດສ້າງຂອງຕົນເຂົ້າໃນການປະຕິບັດໜ້າທີ່ວຽກງານກຳມະບານ ທີ່ຂັ້ນເຖິງມອບໝາຍໃຫ້ໄດ້ຮັບຜົນສຳເລັດດີຂຶ້ນເປັນກ້າວໆ.

savannakhet medialaos