ເມືອງ ຊານໄຊ ແຂວງ ອັດຕະປື ຍັງສືບຕໍ່ບໍ່ລົດລະໃນການຄຸ້ມຄອງບໍລິຫານລັດໃຫ້ມີທ່າຂະຫຍາຍຕົວຢ່າງຕໍ່ເນື່ອງຢູ່ ນັບທັງດ້ານເສດຖະກິດ, ວັດທະນະທຳ-ສັງຄົມ, ກົງຈັກການຈັດຕັ້ງຕ່າງກໍ່ໄດ້ມີການປັບປຸງຕິດພັນກັບການຫັນລົງກໍ່ສ້າງຮາກຖານກໍ່້ສາງຮາກຖານກຸ່ມ ແລະ ບ້ານໄດ້ຮັບການແກ້ໄຂເທື່ອລະກ້າວ, ຊີວິດການເປັນຢູ່ໄດ້ຮັບການປັບປຸງດີຂຶ້ນ ແລະ ສະພາບຄວາມທຸກຍາກຂອງປະຊາຊົນໄດ້ຫຼຸດລົງເທື່ອລະກ້າວ.

ໃນກອງປະຊຸມໃຫຍ່ ຄັ້ງທີ XIII ຂອງອົງຄະນະພັກເມືອງ ຊານໄຊ ທີ່ໄດ້ເປີດຂຶ້ນໃນວັນທີ 17-18 ກຸມພາ 2020 ນັ້ນ ສະຫາຍ ບົວລາ ພັນມີໄຊ ຮອງເຈົ້າເມືອງ ໄດ້ຕ່າງໜ້າໃຫ້ຄະນະບໍລິຫານພັກເມືອງ ຊຸດເກົ່າ ຕີລາຄາສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ XIII (2015-2019) ຕໍ່ກອງປະຊຸມໃຫຍ່ວ່າ: ເມືອງ ຊານໄຊ ລວມມີ 7 ເຜົ່າຢູ່ຮ່ວມກັນ ປະກອບມີ 39 ບ້ານ, ມີພົນລະເມືອງ ທັງໝົດ 24.521 ຄົນ, ຍິງ 12.319 ຄົນ, ມີ 5.166 ຄອບຄົວ ທຽບໃສ່ປີ 2014 ເພິ່ມຂຶ້ນ 864 ຄອບຄົວ ກວມເອົາ 20%; ມີ 4.362 ຄົວເຮືອນ ທຽບໃສ່ປີ 2014 ເພີ່ມຂຶ້ນ 762 ຄົວເຮືອນ ກວມເອົາ 21,17%; ພື້ນຖານເສດຖະກິດຂອງເມືອງ ຍັງຮັກສາໄດ້ຈັງວະການເຕີບໂຕຢູ່ໃນລະດັບດີ ແລະ ເພີ່ມຂຶ້ນຢ່າງຕໍ່ເນື່ອງ, ລວມຍອດຜະລິດພາຍໃນ GDP ເພີ່ມຂຶ້ນໃນ 5 ປີ 27,3%, ສະເລ່ຍອັດຕາເພີ່ມຂຶ້ນ 5,47% ຕໍ່ປີ

ມາຮອດທ້າຍປີ 2019 ລວມຍອດລາຍຮັບຜະລິດຕິພັນພາຍໃນ (GDP) ສາມາດບັນລຸໄດ້ສະເລ່ຍ 119,46 ຕື້ກີບ ເທົ່າກັບ 4.871.00 ກີບ ສະເລ່ຍລາຍຮັບຕໍ່ຫົວຄົນໄດ້ເພີ່ມຂຶ້ນຈາກ 573 ໂດລາຄົນ ທຽບໃສ່ໃນປີ 2014 ເພີ່ມຂຶ້ນ 766.000 ກີບ ແລະ ທຽບໃສ່ແຜນການບັນລຸໄດ້ 68,21%, ພົນລະເມືອງ ເພີ່ມຂຶ້ນສະເລ່ຍ 1,12% ຕໍ່ປີ; ມາຮອດປັດຈຸບັນບ້ານພົ້ນທຸກປະຕິບັດໄດ້ 82% ຂອງຈຳນວນບ້ານທັງໝົດ, ຄອບຄົວທຸກຍາຍັງເຫຼືອ 13,46% ຂອງຈຳນວນຄອບຄົວທັງໝົດ ທຽບໃສ່ປີ 2014 ຫຼຸດລົງ 7,39% ຂອງຈຳນວນຄອບຄົວທັງໝົດ, ອັດຕາການຂະຫຍາຍຕົວຂອງຂະແໜງການກກະສິກຳ-ປ່າໄມ້ ເພີ່ມຂຶ້ນ ສະເລ່ຍ 28,86% ກວາມເອົາ 72,16% ຂອງ GDP; ຂະແໜງອຸດສະຫະກໍາ ເພີ່ມຂຶ້ນສະເລ່ຍ 25,50% ຕໍ່ປີ ກວມເອົາ 8,51% ຂອງ GDP; ຂະແໜງການບໍລິການ ເພີ່ມຂຶ້ນສະເລ່ຍ 27,34% ຕໍ່ປີ ກວາມເອົາ 19,33% ຂອງ GDP.

ກອງປະຊຸມໃຫຍ່ ອົງຄະນະພັກເມືອງ ຊານໄຊ ຍັງຈະໄດ້ພ້ອມກັນຄົ້ນຄ້ວາ ແລະ ຮັບຮອງເອົາບັນດາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກເມືອງ ຄັ້ງທີ XIII ຕາມລະບຽບການຂອງພັກ, ຮັບຟັງການປະກອບຄໍາຄິດຄໍາເຫັນ ຂອງບັນດາຫ້ອງການ, ກົມກອງ, ຕົວແບບດ້ານຕ່າງໆ ພ້ອມນີ້ ຍັງໄດ້ມີການປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ ຄັ້ງທີ XIII ເຊິ່ງມີຄະນະບໍລິຫານງານພັກເມືອງ ໃນຊຸດໃໝ່ ອອກສະໝັກ 29 ສະຫາຍ, ຍິງ 5 ສະຫາຍ ໃນນີ້ ຈະໄດ້ປ່ອນບັດຄັດເລືອກເອົາ 25 ສະຫາຍ ເພື່ອພ້ອມກັນປັບປຸງແກ້ໄຂ ແລະ ກຳນົດທິດທາງ 5 ປີຕໍ່ໜ້າ ຕາມຈິດໃຈມະຕິກອງປະຊຸມໃຫຍ່ຂອງອົງຄະນະພັກເມືອງໃຫ້ເປັນຮູບປະທຳ ຈາກນີ້ ກອງປະຊຸມຍັງໄດ້ ເລືອກຕັ້ງເອົາຜູ້ແທນສົມບູນເຂົ້າຮ່ວມກອງປະຊຸມໃຫຍ່ຂອງອົງຄະນະພັກແຂວງອີກຈຳນວນ 14 ສະຫາຍ ໂດຍມີຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງທັງໝົດ 117 ສະຫາຍ, ຍິງ 7 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກທັງໝົດໃນທົ່ວເມືອງ 1.232 ສະຫາຍ ຍີງ 251 ສະຫາຍ.

ໂດຍ: ສາຍນ້ຳ