ກອງປະຊຸມໃຫຍ່ ອົງຄະນະພັກເມືອງ ຊົນນະບູລີ ສະໄໝທີ VI ໄດ້ໄຂຂຶ້ນຢ່າງເປັນທາງການໃນຕອນເຊົ້າວັັນທີ 24 ກຸມພາ 2020 ຢູ່ທີ່ສະໂມສອນຂອງເມືອງ ໂດຍການໃຫ້ກຽດເຂົ້າຮ່ວມ ຂອງສະຫາຍ ສັນຕິພາບ ພົມວິຫານ ກໍາມະການສູນກາງພັກ , ເລຂາຄະນະບໍລິຫານງານພັກແຂວງ, ເຈົ້າແຂວງສະຫວັນນະເຂດ, ສະຫາຍ ສຸວິໄລ ຫຼວງຊະລາດ ວ່າການເລຂາຄະນະບໍລິຫານງານພັກເມືອງ ເຈົ້າເມືອງຊົນນະບູລີ, ມີບັນດາເຈົ້າເມືອງອ້ອມຂ້າງ ພະແນກການຕ່າງໆອ້ອມຂ້າງແຂວງ, ບັນດາສະມາຊິກພັກສົມບູນ 194 ສະຫາຍ, ຍິງ 19 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກສົມບູນທົ່ວເມືອງຊົນນະບູລີ ເຂົ້າຮ່ວມ.

ໃນກອງປະຊຸມ ສະຫາຍ ສຸວິໄລ ຫຼວງຊະລາດ ວ່າການເລຂາຄະນະບໍລິຫານງານພັກເມືອງ ເຈົ້າເມືອງຊົນນະບູລີກໍ່ໄດ້ກ່າວໄຂກອງປະຊຸມໃຫຍ່ຂອງຄະນະພັກເມືອງ,ພ້ອມທັງຜ່ານບົດລາຍງານ ການເມືອງ ພາກ 1 ແລະ ພາກ 2 ຕໍ່ກອງປະຊຸມວ່າ: ຕະຫຼອດການຈັດຕັ້ງປະຕິບັດເນື້ອໃນມະຕິກອງປະຊຸມໃຫຍ່ຜູ້ແທນອົງຄະນະພັກເມືອງຊົນນະບູລີ ຄັ້ງທີ V ແມ່ນຢູ່ໃນສະພາບແວດລ້ອມພາຍໃນ ຍັງສືບຕໍ່ເອື້ອອໍານວຍຫຼາຍດ້ານ ເຮັດໃຫ້ປະຊາຊົນມີຄວາມເຊື່ອໜັ້ນຕໍ່ການການນໍາພາຂອງພັກ, ແຕ່ໃນນັ້ນ ຍັງມີສິ່ງທ້າທາຍທົດສອບນາໆປະການ,ເຊິ່ງໄດ້ສ້າງຄວາມຫຍຸ້ງຍາກບໍ່ໜ້ອຍຕໍ່ການພັດທະນາເສດຖະກິດ-ສັງຄົມຂອງເມືອງເປັນຕົ້ນ:ໄພທໍາມະຊາດບາງປີມີທັງນໍ້າຖ້ວມ, ແຫ້ງແລ້ງ ແລະ ບາງປະກົດການຫຍໍ້ທໍ້ຕ່າງໆໃນສັງຄົມ, ເຖິງຢ່າງໃດກໍ່ຕາມ, ພາຍໃຕ້ການຊີ້ນໍາ-ນໍາພາ ຂອງຄະນະບໍລິຫານງານພັກແຂວງ ກໍຄືຄະນະບໍລິຫານງານພັກເມືອງກໍ່ໄດ້ສືບຕໍ່ແກ້ໄຂຢ່າງຕັ້ງໜ້າ, ຜ່ານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ ເຫັນວ່າເສດຖະກິດໄດ້ສືບຕໍ່ຂະຫຍາຍຕົວຢ່າງຕໍ່ເນື່ອງ, ລວມຍອດຜະລິດຕະພັນພາຍໃນ (GDP) ບັນລຸໄດ້ 509 ຕື້ກວ່າກີບ ເທົ່າກັບ 85 ກວ່າສ່ວນຮ້ອຍ ທຽບໃສ່ແຜນການ, ເພີ່ມຂຶ້ນ 31,69% ທຽບໃສ່ປີ 2014, ດ້ວຍອັດຕາການຂະຫຍາຍຕົວສະເລ່ຍ 3,80%/ປີ ສະເລ່ຍລາຍຮັບໃສ່ພົນລະເມືອງຜູ້ໜຶ່ງໄດ້ 7 ລ້ານກວ່າກີບ/ຄົນ/ປີ ເທົ່າກັບ 920 ໂດລາ/ຄົນ/ປີ ທຽບໃສ່ປີ 2014 ເພີ່ມຂຶ້ນ 80 ໂດລາ. ການຜະລິດກະສິກຳເພື່ອຄ້ຳປະກັນສະບຽງອາຫານ: ເນື້ອທີ່ຜະລິດເຂົ້ານາປີ 15.800 ຮຕ, ເພີ່ມຂຶ້ນ 500 ເຮັກຕາສະມັດຕະພາບ 3,5 ໂຕນ/ເຮັກຕາ, ເນື້ອທີ່ນາແຊງ 3.321 ເຮັກຕາ, ລື່ນແຜນການ 0,63% ຫຼື 22% ທີ່ແຂວງມອບໃຫ້, ສະມັດຕະພາບ 5,19 ໂຕນ/ເຮັກຕາ, ຊາວກະສິກອນໄດ້ນຳໃຊ້ແນວພັນປັບປຸງກວມ 98% ສາມາດຜະລິດເຂົ້າໄດ້ 54ພັນ800ກວ່າໂຕນ/ປີ ເທົ່າກັບ 62,3%, ສະເລ່ຍໃສ່ຫົວຄົນຜູ້ໜຶ່ງໄດ້ຮັບເຂົ້າເປືອກ 832 ກິໂລ/ຄົນ/ປີ.

ການພັດທະນາຊົນນະບົດ ແລະ ວຽກງານລົບລ້າງຄວາມທຸກຍາກຂອງປະຊາຊົນ: ສໍາເລັດການປະກາດຮັບຮອງເປັນບ້ານພົ້ນທຸກໃນໄລຍະ4 ປີ. ຮອດ 2019 ມີ 3 ບ້ານ ,ສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດໄດ້ 1 ບ້ານ, ເທົ່າກັບ 16,67%. ປັດຈຸບັນທົ່ວເມືອງໄດ້ປະກາດຮັບຮອງເປັນບ້ານພັດທະນາທັງໝົດ 17 ບ້ານ, ເພີ່ມຂື້ນ 11 ບ້ານ ກວມເອົາ 27,42% ຂອງຈໍານວນ 62 ບ້ານ. ປະຈຸບັນທົ່ວເມືອງມີບ້ານທຸກຍາກ 12 ບ້ານ ກວມເອົາ 19,35% ຂອງຈໍານວນບ້ານທັງໝົດ, ມີຄອບຄົວທຸກຍາກ 148 ຄອບຄົວ ກວມເອົາ 2% ຂອງຈໍານວນຄອບຄົວທັງໝົດທຽບໃສ່ປີ 2014 ຫຼຸດລົງ 60%.ໃນປີ 2019 ຜ່ານມາ ການລົງທຶນເຂົ້າໃນການພັດທະນາເສດຖະກິດ-ສັງຄົມ ມູນຄ່າທັງໝົດ 95ຕື້400ລ້ານກວ່າ ກີບ. ໃນນັ້ນ: ການລົງທຶນຂອງລັດ ມູນຄ່າ 40 ຕື້ກວ່າກີບ ກວມ 42,74%, ທຶນຊ່ວຍເຫຼືອ (ODA) 4,356 ຕື້ກີບ ກວມເອົາ 4,56 %, ທຶນປະຊາຊົນ ມູນຄ່າ 730 ລ້ານກີບ ກວມ 0,76 %, ການລົງທຶນຂອງເອກະຊົນພາຍໃນ ແລະ ຕ່າງປະເທດ (FDI) ມູນຄ່າ 3,138 ຕື້ກີບ ກວມ 3,29%, ສິນເຊື່ອທະນາຄານ ແລະ ກອງທຶນບ້ານ ມູນຄ່າ 46 ຕື້ກວ່າກີບ ກວມ 48,65% ຂອງມູນຄ່າທັງໝົດ, ພື້ນຖານໂຄງລ່າງດ້ານຕ່າງໆ ໄດ້ຮັບການພັດທະນາດີຂຶ້ນກວ່າເກົ່າ ປັດຈຸບັນມີເສັ້ນທາງແຕ່ເມືອງລົງຮອດບ້ານທີ່ສາມາດໄປໄດ້ 2 ລະດູມີ 29 ບ້ານ ກວມ 46,77% ຂອງຈໍານວນບ້ານທັງໝົດ.

ໂຄງລ່າງດ້ານພະລັງງານໄຟຟ້າໄດ້ຮັບການກໍ່ສ້າງ ແລະ ຂະຫຍາຍຕາຂ່າຍລົງສູ່ຈຸດສຸມກຸ່ມບ້ານເຂດຊົນນະບົດຫ່າງໄກສອກຫຼີກ.ປັດຈຸບັນບ້ານທີ່ໄດ້ຊົມໃຊ້ໄຟຟ້າແລ້ວ 60 ບ້ານ ກວມ 96,77% ຂອງຈໍານວນ 62 ບ້ານໃນທົ່ວເມືອງ, ອັນພົ້ນເດັ່ນແມ່ນໄດ້ສຳເລັດການເປີດບັ້ນດໍາເນີນຊີວິດການເມືອງປົວແປງປັບປຸງໃນປີ 2017; ທົ່ວເມືອງມີ 7 ຄະນະພັກຮາກຖານ ມີໜ່ວຍພັກທັງໝົດ 101 ໜ່ວຍ ເພີ່ມຂຶ້ນ 33,66%ທົ່ວເມືອງມີສະມາຊິກພັກທັງໝົດ 1.340 ສະຫາຍ, ຍິງ 324 ສະຫາຍ, ສົມບູນ 1.227 ສະຫາຍ, ຍິງ 282 ສະຫາຍ ເພີ່ມຂຶ້ນ 31%ທຽບໃສ່ປີ 2014. ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານໄດ້ 50 ໜ່ວຍ, ມອບບັດແດງໃຫ້ສະມາຊິກພັກສົມບູນໄດ້ 1.093 ສະຫາຍ, ຍິງ 280 ສະຫາຍ ເທົ່າກັບ 89%. ໄດ້ປັບປຸງຄະນະພັກຮາກຖານ ແລະໜ່ວຍພັກຮາກຖານ ສໍາເລັດ 100%.

ສຳລັບທິດທາງ ຄາດໝາຍທາງສູ້ຊົນຕໍ່ໜ້າ ເພື່ອຮັບປະກັນໃຫ້ຄາດໝາຍສູ້ຊົນທີ່ໄດ້ກຳນົດໄວ້ ມີຜົນສຳເລັດແມ່ນໄດ້ວາງທິດທາງໜ້າ,ຮັບປະກັນໃຫ້ທົ່ວເມືອງມີຄວາມສະຫົງບ ແລະ ມີຄວາມປອດໄພໂດຍພື້ນຖານ, ແນວທາງປ້ອງກັນຊາດປ້ອງກັນຄວາມສະຫງົບກາຍເປັນຂອງທົ່ວປວງຊົນຮອບດ້ານຢ່າງໜັກແໜ້ນ, ປະຊາຊົນໄດ້ທຳມາຫາກິນ ແລະ ດຳລົງຊີວິດຢູ່ຢ່າງຜາສຸກ, ການຂະຫຍາຍຕົວດ້ານເສດຖະກິດຢ່າງຕໍ່ເນື່ອງໝັ້ນທ່ຽງໃນລະດັບບໍ່ຫຼຸດ 5,5%ຕໍ່ປີ ຮອດປີ 2024 ລວມຍອດຜະລິດຕະພັນພາຍໃນ ສະເລ່ຍໃສ່ຫົວຄົນໃຫ້ບັນລຸໄດ້ 1.170 ໂດລາ/ຄົນ/ປີ, ພື້ນຖານໂຄງລ່າງເສດຖະກິດໄດ້ຮັບການພັດທະນາ, ຮັບປະກັນເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າດີຂຶ້ນ.

ຈາກນັ້ນກໍ່ໄດ້ຮັບຟັງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 6 (2020-2024)ຈາກ ສະຫາຍ ຄໍາມອນ ທິລາວົງ ຄະນະປະຈໍາພັກເມືອງຮອງເຈົ້າເມືອງຊົນນະບູລີຕື່ມອີກ.

savannakhet medialaos