ກອງປະຊຸມໃຫຍ່ຜູ້ແທນ ອົງຄະນະພັກເມືອງສຸຂຸມາ ຄັ້ງທີ VIII ຈັດຂຶ້ນໃນວັນທີ 17-18 ກຸມພາ 2020 ຢູ່ສະໂມສອນເມືອງດັ່ງກ່າວ ໂດຍການເຂົ້າຮ່ວມຂອງ ສະຫາຍ ປອ. ບຸນຖອງ ດີວິໄຊ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆຈໍາປາສັກ,ສະຫາຍ ນິພອນ ວຽງປະເສີດ ຮອງເລຂາຄະນະບໍລິຫານງານພັກແຂວງ ຫົວໜ້າຄະນະຈັດຕັ້ງແຂວງຈຳປາສັກ,ມີ ສະຫາຍ ບົວລິນ ວົງພະຈັນ ຄະນະປະຈຳພັກແຂວງ ຮອງເຈົ້າແຂວງໆຈຳປາສັກ, ສະຫາຍສົມສີ ມະນີນິນເລຂາພັກເມືອງເຈົ້າເມືອງໆສຸຂຸມາ,ສະຫາຍໃນຄະນະປະຈໍາພັກແຂວງ, ມີການນໍາພະແນກການກົມກອງອ້ອມຂ້າງແຂວງ,ການນໍາ 8 ເມືອງ, 1 ນະຄອນ ບັນດາສະຫາຍໃນຄະນະປະຈໍາພັກ, ກໍາມະການພັກ, ການນໍາຈາກຂະແໜງການຕ່າງໆພາຍໃນເມືອງສຸຂະມາ, ອົງການຈັດຕັ້ງມະຫາຊົນ ຊາວໜຸ່ມ, ແມ່ຍິງ, ກໍາມະບານ, ພະນັກງານອາວຸໂສບໍານານ ເຂົ້າຮ່ວມ, ໃນນັ້ນ ຜູ້ແທນສົມບູນທີ່ເປັນຕົວແທນຈາກຮາກຖານພັກທົ່ວເມືອງສຸຂຸມາເຂົ້າຮ່ວມ 169 ສະຫາຍ,ຍິງ 10 ສະຫາຍ.

ໃນກອງປະຊຸມ ສະຫາຍ ສົມສີ ມະນີນິນເລຂາພັກເມືອງເຈົ້າເມືອງໆສຸຂຸມາໄດ້ຂຶ້ນຜ່ານບົດລາຍງານການເມືອງທັງ 2 ພາກ ເຊິ່ງຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນ ອົງຄະນະພັກເມືອງ ຄັ້ງທີ VII ແຕ່ປີ 2015-2019 ໂດຍຍົກໃຫ້ເຫັນຜົນສໍາເລັດ,ດ້ານດີ, ດ້ານອ່ອນ ແລະ ຂໍ້ຄົງຄ້າງໃນການຈັດຕັ້ງປະຕິບັດວຽກງານແຕ່ລະດ້ານ ໂດຍສະເພາະວຽກງານພັດທະນາເສດຖະກິດ ມີອັດຕາການຂະຫຍາຍຕົວຢ່າງຕໍ່ເນື່ອງ ສະເລ່ຍໃນລະດັບ 8,76%, ລວມຍອດຜະລິດຕະພັນພາຍໃນ 5 ປີ ປະຕິບັດໄດ້ 2.087,99 ຕື້ກີບ, ທຽບໃສ່ແຜນການລື່ນ 8,29%, ສະເລ່ຍລາຍຮັບຕໍ່ຫົວຄົນປະຕິບັດໄດ້ 8.500.000 ກີບ ຫຼື ປະມານ 1.024 ໂດລາສະຫະລັດຕໍ່ຄົນຕໍ່ປີ, ທຽບໃສແຜນລື່ນ 2,6% ເຮັດໃຫ້ໂຄງປະກອບເສດຖະກິດມີການຫັນປ່ຽນຢ່າງຕັ້ງໜ້າເປັນຕົ້ນ: ກະສິກຳຂະຫຍາຍຕົວເພີ່ມຂຶ້ນ 3,87%, ອຸດສະຫະກຳ 11,65% ແລະ ການບໍລິການຂະຫາຍຕົວ 4,74%. ສາມາດລະດົມແຫຼ່ງທຶນເຂົ້າໃນການພັດທະນາເສດຖະກິດ-ສັງຄົມຂອງເມືອງເພີ່ມຂຶ້ນໃນແຕ່ລະປີລວມຍອດແຫຼ່ງທຶນທັງໝົດ 292,69 ຕື້ກີບ ເຮັດໃຫ້ໂຄງປະກອບເສດຖະກິດຂອງເມືອງ ຫັນປ່ຽນໄປຕາມທິດທີ່ຕັ້ງໜ້າ ຕາມທ່າແຮງບົ່ມຊ້ອນຂອງທ້ອງຖິ່ນ ເຮັດໃຫ້ຊີວິດການເປັນຢູ່ຂອງປະຊາຊົນ ໄດ້ຮັບການພັດທະນາດີຂຶ້ນເປັນກ້າວໆ;ສ່ວນວຽກງານວັດທະນະທໍາ-ສັງຄົມ, ການຍົກສູງປະສິດທິພາບໃນການຄຸ້ມຄອງ-ບໍລິຫານລັດ ແລະ ການປົກປ້ອງກົດໝາຍ, ການເສີມຂະຫຍາຍມູນເຊື້ອຄວາມສາມັກຄີປອງດອງປະຊາຊົນບັນດາເຜົ່າ, ວຽກງານແນວລາວສ້າງຊາດ ແລະ ອົງການຈັດຕັ້ງມະຫາຊົນ, ວຽກງານການຕ່າງປະເທດ ແລະ ອື່ນໆ ກໍ່ໄດ້ຮັບການຈັດຕັ້ງປະຕິບັດ ມີການພັດທະນາໄປພ້ອມໆກັນ. ສຳລັບ 5 ປີຕໍ່ໜ້າ(2020-2024) ສືບຕໍ່ສ້າງ ແລະ ພັດທະນາເສດຖະກິດ ຕາມທິດພັດທະນາແບບຍືນຍົງ ຕິດພັນກັບການພັດທະນາສັງຄົມ ແລະ ສິ່ງແວດລ້ອມ, ຍູ້ແຮງການຜະລິດກະສິກຳເປັນສິນຄ້າ ແລະ ການປຸງແຕ່ງ ໃຫ້ເພີ່ມຂຶ້ນທັງປະລິມານ ແລະ ຄຸນນະພາບ ສອດຄ່ອງກັບທ່າແຮງ ຮັບປະກັນໃຫ້ເສດຖະກິດຂະຫຍາຍຕົວໃນລະດັບ 8,8% ຕໍ່ປີ, ລວມຍອດຜະລິດຕະພັນພາຍໃນໃຫ້ບັນລຸ 3.284,9 ຕື້ກີບ,ສະເລ່ຍລາຍຮັບຕໍ່ຫົວຄົນຮອດປີ 2024 ໃຫ້ໄດ້ 1.362 ໂດລາສະຫະລັດຕໍ່ປີ.

ນອກຈາກນີ້ຜູ້ແທນທີ່ເຂົ້າຮ່ວມກອງປະຊຸມກໍ່ໄດ້ປະກອບຄໍາເຫັນຕໍ່ກອງປະຊຸມໃຫຍ່ ເພື່ອເຮັດໃຫ້ກອງປະຊຸມເຕັມໄປດ້ວຍເນື້ອໃນເລິກເຊິ່ງໜັກແໜ້ນ ແລະ ຍັງໄດ້ປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເຊິ່ງມີຜູ້ສະໝັກ 29ສະຫາຍ, ຍິງ 3 ສະຫາຍ, ໃນນັ້ນເລືອກເອົາຄະນະບໍລິຫານງານພັກເມືອງຊຸດໃໝ່ 25 ສະຫາຍ, ຜ່ານການປ່ອນບັດເລືອກຕັ້ງຂອງຜູ້ແທນກອງປະຊຸມ ແລະ ຜົນຂອງກອງປະຊຸມຄັ້ງປະຖົມມະລືກ ໄດ້ເປັນເອກະສັນ ເລືອກເອົາ ສະຫາຍ ພັນໂທ ສົມເພັດ ບຸດສະດີເປັນເລຂາຄະນະບໍລິຫານງານພັກເມືອງ ສຸຂຸມາ ຊຸດທີ VIII, ສະຫາຍ ນາງ ຂ່າຍແກ້ວ ສິງຫາວົງ ເປັນຮອງເລຂາ ແລະ ສະຫາຍ ປອ. ຄຳໄຕ ແກ້ວປະເສີດ ເປັນຮອງເລຂາ ທັງເປັນປະທານກວດກາພັກ.ກໍາມະການປະຈໍາພັກເມືອງ 7 ສະຫາຍ,ຍິງ 21ສະຫາຍ, ກຳມະການພັກເມືອງ 18 ສະຫາຍ. ນອກນີ້ ກອງປະຊຸມ ຍັງໄດ້ປ່ອນບັດຄັດເລືອກເອົາຄະນະຜູ້ແທນໄປຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ VIII ຈໍານວນ 19ສະຫາຍ, ຍິງ 1 ສະຫາຍ.

ສື່ມວນຊົນແຂວງຈຳປາສັກ
medialaos
ຂ່າວ-ພາບ: ຄຳຫຼ້າ