ພາບປະກອບ

ໃນ​ວັນ​ທີ 24 ກຸມພາ 2020, ຂະ​ບວນລົດຄາຣະວານ ຊາວໜຸ່ມຈາກ​ກະຊວງ, ອົງການ​ອ້ອມ​ຂ້າງ ​ເຊິ່ງ​ເປັນ​ຕົວ​ແທນ​ ໃຫ້​ແກ່​ຊາວໜຸ່ມລາວ​ບັນດາ​ເຜົ່າທົ່ວ​ປະ​ເທດ ນຳ​ໂດຍ ທ່ານ ອາ​ລຸນ​ໄຊ ສູນ​ນະ ລາດ ​ເລຂາ​ຄະນະ​ບໍລິຫານ​ງານ ສູນ​ກາ​ງຊາວໜຸ່ມ ປະຊາຊົນ​ ປະຕິວັດ​ລາວ ​ໄດ້​ເຂົ້າ​ຂໍ່ານັບ​ວາງ​ກະຕ່າ​ດອກ​ໄມ້ ​ຢູ່​ອະນຸສອນ​ສະຖານ ປະທານ​ໄກສອນ ພົມວິຫານ ​ເພື່ອ​ລະນຶກ​ເຖິງ​ບຸນ​ຄຸນ​ຜູ້ນຳ ​ທີ່​ແສນ​ເຄົາລົບ​ຮັກ. ຈາກນັ້ນ ​ໄດ້​ເດີນຂະບວນໄປຈັດ​ກິດຈະກຳ​ຢູ່ 4 ​ແຂວງ​ພາກ​ໃຕ້ ​ເຊັ່ນ: ​ແຂ​ວງຈຳປາ​ສັກ, ສາລະ​ວັນ, ​​ເຊ​ກອງ ​ແລະ ອັດ​ຕະປື.

      ການຈັດຂະ​ບວນຄາຣະວານ​ຄັ້ງ​ນີ້, ​ເປັນ​ການ​ສ້າງ​ຂະ​ບວນການ ​ຂໍ່ານັບ​ຮັບ​ຕ້ອນ ວັນ​ສຳຄັນ​ຂອງ​ພັກ ​ຂອງ​ຊາດ​ ເຊັ່ນ: ​ວັນ​ສ້າງຕັ້ງ​ພັກປະຊາຊົນ ​ປະຕິວັດ​ລາວ ຄົບຮອບ 65 ປີ, ວັນ​ສ້າງ​ຕັ້ງ​ຄະນະ​ຊາວໜຸ່ມ ປະຊາຊົນ ​ປະຕິວັດ​ລາວ ຄົບຮອບ 65 ປີ ຊຶ່ງກິດຈະກຳ​ຫລັກໆ ​ແມ່ນ​ການ​ຮຽນຮູ້ ທາງ​ດ້ານ​ປະ ຫວັດສາດ, ການ​ເຄື່ອນ​ໄຫວ​ຂອງ​ພັກ, ລັດ ຂອງ​ຜູ້ນຳ​ໃນ​ສະ​ໄໝຕໍ່ສູ້​ກູ້​ຊາດ, ຮຽນຮູ້​ວັດທະນະທຳ-​ສັງຄົມ, ວິທີ​ການ​ດຳລົງ​ຊີວິດ​ຊາວໜຸ່ມ. ນອກນີ້ ຍັງ​ຈະ​ໄດ້​ຮັບ​ຟັງ​ປະຫວັດ ການ​ເຄື່ອນ​ໄຫວ​ຂອງ​ຜູ້ນຳ​ ໃນ​ເມື່ອ​ກ່ອນໃນ​ແຕ່ລະ​ໄລຍະ ​ແລກປ່ຽນບົດຮຽນ​ ເຊິ່ງກັນ ​ແລະ ກັນ ​ໃນ​ການ​ນຳພາ​ຊາວໜຸ່ມປະ​ກອບ​ສ່ວນ ​ໃນ​ການ​ພັດທະນາ​ສ້າງສາ​ປະ​ເທດ​ຊາດ ​ໃນ​ຍຸກ​ປັດຈຸບັນ ​ເພື່ອ​ສະ​ແດງ​ເຖິງ​ຄວາມ​​ກະ​ຕັນ​ຍູ​ ຮູ້​ບຸນຄຸນ ຕໍ່​ຜູ້ນຳ​ທີ່​ແສນ​ເຄົາລົບ​ຮັກ ​ທີ່ໄດ້​ເສຍ​ສະຫລະ​ເພື່ອ​ປົດ​ປ່ອຍ ປະ​ເທດ​ຊາດ​ອອກ​ຈາກ​ເອກ​ຄອບ​ຄອງ ຂອງ​ຈັກກະພັດ​ລ່າ​ເມືອງ​ຂຶ້ນ; ຜູ້​ເຂົ້າ​ຮ່ວມ​ກິດຍັງຈະກຳ​ຈະ​ໄດ້​ແລກປ່ຽນ ວັດທະນະທຳ, ກິລາ, ​ສິ​ລະ​ປະ​ຮ່ວມ​ກັນ ​​ເພື່ອສ້າງບັນຍາກາດ​ໃຫ້​ມີ​ຄວາມ​​ຟົດ​ຟື້ນ.

      ຂະ​ບວນຄາຣະວານ​ ຄັ້ງ​ນີ້, ຍັງ​ໄດ້​ຮ່ວມ​ນ້ຳ​ໃຈ​ຈາກ​ຄະນະ​ຊາວໜຸ່ມ ກະຊວງ​ອ້ອມ​ຂ້າງ, ​ແຂວງ, ​ບໍລິ​ສັດ ​ຫ້າງ​ຮ້ານ​ ປະກອບສ່ວນເປັນ​ວັດຖຸ​ມູນ​ຄ່າ 100 ກວ່າ​ລ້ານກີບ, ​ພ້ອມເງິນສົດ 40 ລ້ານ​ກີບ ຈາກ​ນັກທຸລະກິດ  ​ເຊິ່ງ​ເປັນ​ຕົວ​ແທນ​ຄົນ​ຮຸ່ນໜຸ່ມ ປະກອບ​ຊຸກຍູ້​ຂະ​ບວນການ ​ພັດທະນາ​ຊາວໝຸ່ມ​ໃນ 4 ​ແຂວງ.​ ການຈັດ​ກິດຈະກຳຂະ​ບວນຄາຣະວານ ​ຈະເຮັດ​ອົງການ​ຈັດ​ຕັ້ງ​ຊາວໜຸ່ມ ມີ​ບົດບາດ​ໃນ​ການ​ເຄື່ອນ​ໄຫວ, ການ​ສຶກສາ​ອົບຮົມ​ການ​ເມືອງ​ ແນວ​ຄິດໃຫ້​ຄົນ​ຮຸ່ນໜຸ່ມ ທັງ​ເປັນ​ການ​ຜູກ​ແໜ້ນ ຄວາມ​ສາມັກ​ຄີ​ຮັກ​ແພງ​ ນຳ​ເອົາ​ຄວາ​ມ​ໄມ​ຕີ​ຈິດ​ມິດຕະພາບ​ຈາກ​ກະຊວງ, ອົງການ, ​ແຂວງ, ​ເມືອງ ​ແລະ ບ້ານ ກາຍ​ເປັນຄວາມ​ຊົງ​ຈຳ​ທີ່​ດີ​ ທັງ​ເປັນ​ຂີດໝາຍປະຫວັດສາດ​ການ​ເຄື່ອນ​ໄຫວ​ ຂອງ​ຄະນະ​ຊາວໜຸ່ມປະຊາຊົນ​ປະຕິວັດ​ລາວ.

Medialaos