” ຊົມໃຊ້ສື່ສັງຄົມອອນລາຍຢ່າງມີສະຕິ “

0
449

ໃນລະຫວ່າງວັນທີ 23-24 ກຸມພາ 2020  ໃນສື່ສັງຄົມອອນລາຍ ໄດ້ມີກຸ່ມຄົນບໍ່ຫວັງດີຈຳນວນໜຶ່ງ ຂຽນຂ່າວຕວົະ (ຂ່າວບໍ່ມີມູນຄວາມຈິງ Fake News) ໃສ່ຮ້າຍວ່າ ຢູ່ສູນການຄ້າຊັ່ງຈ່ຽງ ມີຜູ້ຕິດເຊື້ອ ພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່ Covid -19 ຈຳນວນຜູ້ຕິດເຊື້ອ 19 ຄົນ, ຕໍ່ຂ່າວປອມດັ່ງກ່າວນີ້ຜູ້ບໍລິຫານ ສູນການຄ້າຊັ່ງຈ່ຽງ ໄດ້ອອກແຈ້ງການ ເລກທີ 026/ຊຈ, ລົງວັນທີ 24/02/2020 ວ່າຂ່າວດັ່ງກ່າວບໍ່ແມ່ນຄວາມຈິງແຕ່ຢ່າງໃດ.

ໃນວັນທີ 25 ກຸມພາ 2020, ທ່ານ ປິ່ນປາຖະໜາ ພັນທະມາລີ ຫົວໜ້າກົມສື່ມວນຊົນ, ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃນນາມຮັບຜິດຊອບຄຸ້ມຄອງສື່ມວນຊົນ ໄດ້ໃຫ້ສຳພາດຕໍ່ສື່ມວນຊົນ ກ່ຽວກັບບັນຫາຫາງສຽງສັງຄົມ ຕໍ່ກັບກຸ່ມບຸກຄົນປ່ອຍຂ່າວວ່າມີຜູ້ຕິດເຊື້ອ ພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່ Covid -19 ຈຳນວນຜູ້ຕິດເຊື້ອ 19 ຄົນ ທີ່ສູນການຄ້າຊັ່ງຈ່ຽງ.

ຕໍ່ກັບບັນຫາດັ່ງກ່າວນີ້, ທ່ານໄດ້ຮຽກຮ້ອງໃຫ້ຜູ້ຊົມໃຊ້ສື່ສັງຄົມອອນລາຍບໍ່ຄວນປ່ອຍຂ່າວທີ່ບໍ່ມີມູນຄວາມຈິງ ຫຼື ຂ່າວທີ່ໃສ່ຮ້າຍປ້າຍສີ ຕໍ່ບຸກຄົນ, ການຈັດຕັ້ງ ທີ່ຂັດກັບກົດໝາຍ ແລະ ລະບຽບການ ເປັນຕົ້ນ ກົດໝາຍວ່າດ້ວຍສື່ມວນຊົນ ມາດຕາ 66(ສະບັບປັບປຸງ) ໄດ້ລະບຸໄວ້ວ່າ ຫ້າມອອກຂ່າວບິດເບືອນຄວາມຈິງ, ແຕະຕ້ອງເຖິງກຽດສັກສີຂອງບຸກຄົນ, ນິຕິບຸກຄົນ ແລະ ການຈັດຕັ້ງ; ກົດໝາຍ ຕ້ານອາດສະຍາກຳທາງລະບົບຄອມພິວເຕີ ແລະ ດຳລັດ ວ່າດ້ວຍ ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ ເລກທີ 327/ລບ, ລົງວັນທີ 16 ກັນຍາ 2014 ກໍໄດ້ລະບຸເຖິງຂໍ້ຫ້າມກ່ຽວກັບການເຜີຍແຜ່ພາບ, ສຽງ, ວິດີໂອ ທີ່ບໍ່ມີມູນຄວາມຈິງ ແລະ ແຕະຕ້ອງເຖິງກຽດສັກສີ ບຸກຄົນ ແລະ ການຈັດຕັ້ງ. ພ້ອມທັງ ຮຽກຮ້ອງໃຫ້ປະຊາຊົນມີສະຕິໃນການບໍລິໂພກຂໍ້ມູນຂ່າວສານຜ່ານສື່ອອນລາຍ ແລະ ໃຫ້ຕິດຕາມຂໍ້ມູນຂ່າວສານຜ່ານສື່ທາງການ ເຊັ່ນ: ສຳນັກຂ່າວສານປະເທດລາວ, ວິທະຍຸກະຈາຍສຽງແຫ່ງຊາດ, ໂທລະພາບແຫ່ງຊາດ, ໜັງສືພິມປະຊາຊົນ, ໜັງສືພິມພາສາຕ່າງປະເທດ ແລະ ບັນດາຂະແໜງການຂອງພາກລັດ ແລະ ເອກະຊົນທີ່ໄດ້ຮັບອະນຸຍາດ.

ຕໍ່ການລະບາດຂອງພະຍາດ  ອັກເສບປອດ ຈາກເຊື້ອຈຸລະໂຣກສາຍພັນໃໝ່ Covid -19 ສະເໜີໃຫ້ພໍ່-ແມ່ປະຊາຊົນ ຈົ່ງຕິດຕາມການແຈ້ງຂ່າວປະຈຳວັນຂໍ້ມູນທາງການຂອງ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ຕອບໂຕ້ຕໍ່ການລະບາດຂອງພະບາດອັກເສບປອດ ຈາກເຊື້ອຈຸລະໂຣກສາຍພັນໃໝ່ Covid -19 ຫຼື ເຂົ້າເບິ່ງຂໍ້ມູນຈາກ ເຟສບຸກ, ເວັບໄຊ໌ ຂອງສູນຂໍ້ມູນຂ່າວສານການແພດ ສຸຂະສຶກສາ ຫຼື ສອບຖາມສາຍດ່ວນ 166 ໄດ້ຕະຫຼອດ 24 ຊົ່ວໂມງ.

Medialaos MMD