ຄະນະຜູ້ແທນຂັ້ນສູງຂອງສະພາຜູ້ແທນລາສະດອນແຫ່ງ ສາທາລະນະລັດເຊັກ ນຳໂດຍ ທ່ານ ຣາເດັກ ວອນ ດຣາເຊັກ (Radek Vondracek), ປະທານສະພາຜູ້ແທນລາສະດອນ ແຫ່ງ ສ.ເຊັກ ໄດ້ເດີນທາງມາຢ້ຽມຢາມ ເມືອງມໍລະດົກໂລກຫຼວງພະບາງ ລະຫວ່າງ 21-22 ກຸມພາ 2020 ດ້ວຍຖ້ຽວບິນພິເສດ (AIRBUS319) ໂດຍມີ ທ່ານ ສາສະດາຈານ ດຣ. ເອກສະຫວ່າງ ວົງວິຈິດ ປະທານກໍາມາທິການຕ່າງປະຈໍາສະພາແຫ່ງຊາດ,ທ່ານ ສາຍສະໝອນ ຄົມທະວົງ ຮອງເລຂາພັກແຂວງ ປະທານສະພາປະຊາຊົນແຂວງ,ເອກອັກຄະລັດຖະທູດ ສ.ເຊັກ ປະຈໍາລາວ ພ້ອມດ້ວຍຄະນະ ຕ້ອນຮັບທີ່ສະໜາມບິນສາກົນຫຼວງພະບາງ,

ຈາກນັ້ນກໍ່ໄດ້ເຂົ້າພົບປະ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ທີ່ໂຮງແຮມພູນແມນ ເຊີ່ງທ່ານເຈົ້າແຂວງໄດ້ສະແດງຄວາມຕ້ອນຮັບຢ່າງອົບອຸ່ນ ແລະຕີລາຄາສູງຕໍ່ການມາຢ້ຽມຢາມຂອງຄະນະສະພາຜູ້ແທນລາສະດອນ ແຫ່ງ ສ.ເຊັກ ຄັ້ງນີ້ ພ້ອມທັງລາຍງານສະພາບລວມໂດຍຫຍໍ້ຂອງແຂວງ ໃຫ້ຄະນະຜູ້ແທນຮັບຊາບ. ເຊິ່ງຫຼວງພະບາງເຄີຍເປັນນະຄອນຫຼວງຂອງປະເທດລາວມາກ່ອນ, ຕັ້ງຢູ່ໃຈກາງຂອງບັນດາແຂວງພາກເໜືອ ເນື້ອທີ່ສ່ວນໃຫຍ່ເປັນພູສູງຊັນ ກວມ 85%, ມີທ່າແຮງທາງດ້ານການທ່ອງທ່ຽວ ແຕ່ລະປີມີນັກທ່ອງທ່ຽວເຂົ້າມາທ່ຽວຊົມ 400.000 ກວ່າຄົນຕໍ່ປີ ແລະມີແມ່ນໍ້າຫຼາຍສາຍເໝາະແກ່ການສ້າງເຂື່ອນໄຟຟ້າເຊັ່ນ:

ນໍ້າຄານ, ນໍ້າອູ, ນໍ້າເຊືອງ, ນໍ້າແຊງ. ເສດຖະກິດຂະຫຍາຍຕົວສະເລ່ຍໃນລະດັບ 8,7% ຕໍ່ປີ, ມີນັກທຸລະກິດທັງພາຍໃນ ແລະຕ່າງປະເທດເຂົ້າມາລົງທຶນ ໂດຍສະເພາະແມ່ນ ສປ ຈີນ, ສສ ຫວຽດ ນາມ, ສ ເກົາຫຼີ, ໄທ, ສະຫະລັດອາເມລິກາ ແລະ ປະເທດອື່ນໆ. ນອກນັ້ນ ແຂວງຫຼວງພະບາງກໍຍັງເປັນສູນກາງການພັດທະນາຊັບພະຍາກອນມະນຸດ ເປັນຕົ້ນແມ່ນມີມະຫາວິທະຍາໄລ ແລະ ວິທະຍາ ໄລຫຼາຍແຫ່ງຕື່ມອີກ.

ຈາກນັ້ນ ທ່ານ ຣາເດັກ ວອນດຣາເຊັກ ປະທານສະພາຜູ້ແທນລາສະດອນແຫ່ງ ສ.ເຊັກ ກໍໄດ້ກ່າວສະແດງຄວາມຂອບໃຈຕໍ່ການນໍາຂອງແຂວງທີ່ໃຫ້ການຕ້ອນຮັບຢ່າງອົບອຸ່ມ ດ້ວຍໄມຕີຈິດມິດຕະພາບ ອັນເປັນການຮັດແໜ້ນສາຍພົວພັນຮ່ວມມືລະຫວ່າງ ສປປ ລາວ ແລະ ສ.ເຊັກ ກໍຄື ສະພາຜູ້ແທນລາສະດອນ ແຫ່ງ ສ.ເຊັກ ກັບ ສະພາແຫ່ງຊາດລາວ ທັງເປັນການປະກອບສ່ວນສໍາຄັນຍິ່ງຖືໄດ້ວ່າເປັນຄັ້ງປະຫວັດສາດຂອງການຢ້ຽມຢາມແລກປ່ຽນເຂົ້າໃນການສືບຕໍ່ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ລະຫວ່າງ ສປປ ລາວ ແລະ ສາທາລະນະລັດເຊັກ ກໍຄືລະຫວ່າງສອງອົງການນິຕິບັນຍັດຂອງພວກເຮົາໃຫ້ມີການຂະຫຍາຍຕົວໃນທ່ວງທ່າໃໝ່.

ຈາກນັ້ນ ຜູ້ແທນລາສະດອນແຫ່ງ ສ.ເຊັກ ກໍໄດ້ໄປທ່ຽວຊົມບັນດາແຫຼ່ງທ່ອງທ່ຽວທີ່ມີຊື່ສຽງຂອງແຂວງ ກໍຄື ນະຄອນຫຼວງພະບາງ ເປັນຕົ້ນແມ່ນ ວັດຊຽງທອງ, ຫໍພິພິທະພັນແຫ່ງຊາດຫຼວງພະບາງ, ຕາດກວາງຊີ ແລະ ຫັດຖະກໍາຜ້າໄໝບ້ານຜານົມ ຕື່ມອີກ.

ຂ່າວ: ເພັດສາຄອນ ສິມມະວົງ