ໃນທ້າຍອາທິດທີ່ຜ່ານມານີ້ ອົງການໄອຍະການປະຊາຊົນແຂວງສະຫວັນນະເຂດ ນຳ ໂດຍ ທ່ານ ນາງ ສຸກມາລາ ຈັນທະວົງ ຮອງຫົວໜ້າອົງການໄອຍະການປະຊາຊົນແຂວງ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ, ເຮັດວຽກຢູ່ຄ້າຍຄຸມຂັງ-ດັດສ້າງ ແກ້ງຄັນ ປກສ ແຂວງ ເຂົ້າຮ່ວມມີ ທ່ານ ພັທ ບຸນເລີດ ຄະທຸມພົມ ຮອງຫົວໜ້າກອງບັນຊາການ ປກສ ແຂວງ, ທ່ານ ພັທ ສາຍທອງ ໄຊຍະສານ ຫົວໜ້າຄ້າຍຄຸມຂັງ-ດັດສ້າງ ແກ້ງຄັນ ພ້ອມດ້ວຍຄະນະ ມີຫົວໜ້າຂະແໜງກວດກາຄ້າຍຄຸມຂັງ-ດັດສ້າງ, ຄະນະຮັບຜິດຊອບ ພ້ອມດ້ວຍພະນັກງານ-ວິຊາການທີ່ກ່ຽວຂ້ອງເຂົ້າຮ່ວມ.

ທ່ານ ພັທ ບຸນທະວີ ຄຳມະວົງ ຮອງຄ້າຍຄຸມຂັງດັດສ້າງ ແກ້ງຄັນ ໄດ້ລາຍງານສະພາບການຄຸ້ມຄອງນັກໂທດ-ດັດສ້າງ, ຂໍ້ສະດວກ,ຂໍ້ຄົງຄ້າງອື່ນໆ ຍົກໃຫ້ເຫັນຈພນວນນັກໂທດ-ດັດສ້າງ ໃນເດືອນ ກຸມພາ 2020 ນີ້ ມີຈຳນວນນັກໂທດ ທັງໝົດ 1,863 ຄົນ, ຍິງ 200 ຄົນ, ຜູ້ຖືກດັດສ້າງ 1,565 ຄົນ, ຍິງ 01 ຄົນ, ແຍກປະເພດຄະດີ : ຄະດີຢາເສບຕິດ ມີ 1,547 ຄົນ, ຍິງ 189 ຄົນ, ລັກຊັບ 98 ຄົນ, ຍິງ 01 ຄົນ, ຄາດຕະກຳ 85 ຄົນ, ຍິງ 01 ຄົນ, ປຸ້ນຊັບ 39 ຄົນ, ຂົ່ມຂືນ 28 ຄົນ, ທຳຮ້າຍຮ່າງກາຍ 12 ຄົນ, ຍິງ 01 ຄົນ, ອຸປະຕິເຫດ 10 ຄົນ, ຊິງຊັບ 10 ຄົນ, ສໍ້ໂກງຊັບ 10 ຄົນ, ຍິງ 02 ຄົນ, ຍັກຍອກຊັບ 09 ຄົນ, 02 ຄົນ ແລະ ຄະດີອື່ນໆ ໃນຜ່ານມາຄ້າຍຄຸມຂັງ-ດັດສ້າງ ໄດ້ເອົາໃຈໃສ່ສ້າງສາພັດທະນາກົມກອງພ້ອມທັງແກ້ໄຂຊີວິດການເປັນຢູ່ ຂອງພະນັກງານ-ຮັກຮົບ ຕະຫຼອດຮອດເຖີງຊີວິດການເປັນຢູ່ຂອງນັກໂທດ-ຜູ້ຖືກດັດສ້າງ ໂດຍສະເພາະແມ່ນວຽກງານທຳການຜະລິດ, ວຽກງານປູກຝັງ-ລ້ຽງສັດ ມີໜານຜັກ 200 ກວ່າໜານ, ງົວ 21 ໂຕ, ວຽກງານຈັກສານ,ວຽກງານເຟີນິເຈີ້, ແກະສະຫຼັກ ແລະວຽກງານອື່ນໆອີກ ທີ່ສ້າງລາຍຮັບແກ້ໄຂຊີວິດການເປັນຢູ່ ແລະ ທັງເປັນການສ້າງອາຊິບໃຫ້ເຫຼົ່ານັກໂທດ-ດັດສ້າງໄດ້ນຳອອກໄປປະກອບອາຊີບໄດ້ໃນເວລາຖືກປ້ອຍໂຕກັບຄືນສູ່ສັງຄົມ.

ພ້ອມນີ້ກໍ່ໄດ້ມີການແລກປ່ຽນຄຳຄິດເຫັນ, ຄົ້ນຄວ້າແລກປ່ຽນບົດຮຽນກ່ຽວກັບການນຳໃຊ້ປື້ມຄູ່ມື ບັນດານິຕິກຳ ແລະ ຮ່າງແບບຟອມສະຖິຕິ ນັກໂທດ-ຜູ້ຖືກດັດສ້າງ ແລະ ຄົ້ນຄວ້າການຂື້ນບັນຊີລາຍຊື່ນັກໂທດດີເດັ່ນປະຈຳເດືອນ, ນັກໂທດທີ່ມີຜົນງານເພື່ອຄັດເລືອກເຂົ້າໃນການຄົ້ນຄວ້າສະເໜີອະໄພຍະໂທດ ປະຈຳປີ 2020.

ຂ່າວ : ວິໄຊສຽງສະຫວັນ
savannakhet medialaos