ຄະນະພັກຮາກຖານຫ້ອງວ່າການແຂວງເຊກອງ ສໍາເລັດກອງປະຊຸມໃຫຍ່ຄັ້ງທີ IV

0
184

ວັນທີ 24 ກຸມພາ ນີ້ ຄະນະພັກຮາກຖານ ຫ້ອງວ່າການ ແຂວງເຊກອງ ໄດ້ໄຂກອງປະຊຸມໃຫຍ່ຄັ້ງທີ IV ຂອງຕົນຂຶ້ນ ທີ່ສະໂມສອນແຂວງ ໂດຍການເປັນປະທານຂອງສະຫາຍ ປອ ແພງສີ ສີລາວີ ກຳມະການພັກແຂວງ, ເລຂາຄະນະພັກຮາກຖານຫ້ອງວ່າການແຂວງ, ພ້ອມນີ້ ໃຫ້ກຽດເຂົ້າຮ່ວມມີ ສະຫາຍ ຄໍາເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ມີຄະນະພັກຮາກຖານ, ຄະນະໜ່ວຍພັກ ພ້ອມດ້ວຍສະມາຊິກພັກທຸກສະຫາຍ ແລະແຂກຖືກເຊີນເຂົ້າຮ່ວມ.

ສະຫາຍ ປອ ແພງສີ ສີລາວີ ເລຂາຄະນະພັກຮາກຖານ ໄດ້ສະຫຼຸບຕີລາຄາຄືນການຈັດຕັ້ງປະຕິບັດຊີ້ນໍາ-ນໍາພາຂອງໜ່ວຍຕົນ ໂດຍໃຫ້ຮູ້ວ່າ: ຄະນະພັກຮາກຖານຫ້ອງວ່າການ ມີ 2ໜ່ວຍພັກທີ່ຂຶ້ນກັບຄື: ໜ່ວຍພັກຫ້ອງວ່າການ ໜ່ວຍພັກ ປກສ-ປກຊ ມີສະມາຊິກພັກທັງໝົດ 75 ສະຫາຍ, ຍິງ 19 ສະຫາຍ, ສະມາຊິກພັກສົມບູນ 73 ສະຫາຍ, ຍິງ 19 ສະຫາຍ, ສະມາຊິກສໍາຮອງ 2 ສະຫາຍ; ຊຶ່ງໃນໄລຍະ 5 ປີຜ່ານມາ ຄະນະພັກໄດ້ເອົາໃຈໃສ່ສຶກສາອົບຮົມນໍາພາການເມືອງແນວຄິດ ໃຫ້ແກ່ສະມາຊິກພັກ, ພະນັກງານ, ໄດ້ເປັນເຈົ້າການຈັດຕັ້ງເຊື່ອມຊຶມມະຕິຄໍາສັ່ງຂອງພັກ, ມູນເຊື້ອຕໍ່ສູ້ປົດປ່ອຍຊາດ, ປະຫວັດການເຄື່ອນໄຫວຂອງບັນດາທ່ານຜູ້ນໍາ, ວັນສໍາຄັນຕ່າງໆຂອງພັກ, ຂອງຊາດ, ເຮັດໃຫ້ສະມາຊິກພັກ-ພະນັກງານມີຄວາມເຊື່ອໝັ້ນຕໍ່ແນວທານງປ່ຽນແປງໃຫມ່ຂອງພັກ, ມີຄວາມຈົ່ງຮັກພັກດີຕໍ່ພັກ, ຕໍ່ປະເທດຊາດ ແລະຕໍ່ລະບອບປະຊາທິປະໄຕຢ່າງໜັກແໜ້ນ, ມີຄວາມຕື່ນຕົວເປັນເຈົ້າການ, ເຊື່ອໝັ້ນຕໍ່ການນໍາພາຂອງພັກ, ມິຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ, ມີຄວາມຈົ່ງຮັກພັກດີ, ບໍລິສຸດສັດຊື່, ເຄົາລົບລະບຽບພັກ-ກົດໝາຍຂອງລັດ, ມີຄວາມສາມັກຄີຢ່າງໜັກແໜ້ນ ມີຄວາມເປຫນເອກະພາບພາຍໃນພັກ, ມີນໍ້າໃຈເສຍສະຫຼະ, ມີຄວາມເດັດດ່ຽວໜຽວແໜ້ນ, ມີຄວາມມສະດຸ້ງໄວ ແລະມີສະຕິລິວັງຕົວບໍ່ຫວັ່ນໄຫວຄອນແຄນຕໍ່ກົນອຸບາຍເລ່ຫຼ່ຽມມ້າງເພທໍາລາຍທຸກຮູບການຂອງອິດທິກຳລັງປໍລະປັກ ແລະກຸ່ມຄົນບໍ່ດີ.

ຄຽງຄູ່ກັນນັ້ນ ໄດ້ເປັນເຈົ້າການປັບປຸງກໍ່ສ້າງຕົນເອງ, ປັບປຸງການຈັດຕັ້ງ ແລະວຽກງານພັກພະນັກງານ, ປັບປຸງກົງຈັກການຈັດຕັ້ງເບື້ອງລັດ, ເບື້ອງພັກຄືນໃໝ່, ເອົາໃຈໃສ່ຕໍ່ການສ້າງໜ່ວຍພັກ, ຜ່ານການປະເມີນຜົນຂະບວນການກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານຂອງຄະນະພັກຮາກຖານຫ້ອງວ່າການແຂວງຄື: ໜ່ວຍພັກຫ້ອງວ່າການໄດ້ຖືກຮັບຮອງເປັນໜ່ວຍພັກເຂັ້ມແຂງ-ຮູ້ນໍາພາຮອບດ້ານ 3 ປີຕໍ່ເນື່ອງ ແລະໄດ້ຮັບໃບຍ້ອງຍໍຈາກທ່ານເຈົ້າແຂວງ 3 ປີຊ້ອນ(ປີ2014-2016), ໜ່ວຍພັກຫ້ອງວ່າການແຂວງ ແລະໜ່ວຍພັກຫ້ອງການ ປກສ-ປກຊ ໄດ້ຮັບນາມມະຍົດເປັນໜ່ວຍພັກປອດໃສ ເຂັ້ມແຂງ ແລະໜັກແໜ້ນ 1ຄັ້ງ ໃນປີ 2018; ແລະຍັງໄດ້ຖືສໍາຄັນຂະຫຍາຍພັກ ໂດຍເລັງໃສ່ພະນັກງານໜຸ່ມນ້ອຍ ນັບແຕ່ປີ 2015-2019 ຂະຫຍາຍພັກໄດ້ 22 ສະຫາຍ: ຍິງ 10 ສະຫາຍ, ມອບບັດໃຫ້ສະມສຊິກພັກສົມບູນ 3 ຊຸດ ຈໍານວນ 66 ສະຫາຍ, ກໍ່ສ້າງມະຫາຊົນເພື່ອຂະຫຍາຍເຂົ້າພັກຢ່າງຕໍ່ເນື່ອງ; ພ້ອມດຽວກັນນີ້ ຄະນະພັກຮາກຖານຍັງໄດ້ຜ່ານບົດສໍາຫຼວດການຊີ້ນໍາ-ນໍາພາລວມໃນໄລຍະ 5 ປີຜ່ານມາ ພ້ອມລາໜ້າທີ່.

ໃນກອງປະຊຸມຍັງໄດ້ດໍາເນີນການປ່ອນບັດຄັດເລືອກເອົາຄະນະພັກຮາກຖານຊຸດໃໝ່, ມີຜູ້ສະໝັກ 8 ສະຫາຍ, ຄັດເອົາ 5 ສະຫາຍ; ຊຶ່ງກອງປະຊຸມຄັ້ງປະຖົມມະລຶກ ໄດ້ຕົກລົງເລືອກເອົາ ສະຫາຍ ປອ ແພງສີ ສີລາວີ ເປັນເລຂາຄະນະພັກຮາກຖານ, ສະຫາຍ ລໍາທອງ ຈັນມີວົງ ເປັນຮອງເລຂາ, ສະຫາຍ ວີແຊມ ໄຊສຶກສາ ເປັນກຳມະການ ທັງເປັນປະທານກວດກາພັກ, ສະຫາຍ ໂພໄຊ ພິມມະສອນ, ສະຫາຍ ສີສຸພັນ ມະຫາວົງ ເປັນຄະນະພັກຮາກຖານ; ພ້ອມດຽວກັນນີ້ ຍັງໄດ້ປ່ອນບັດຄັດເລືອກເອົາຜູ້ແທນສົມບູນ ເຂົ້າຮ່ວມກອງປະຊຸມໃຫຍ່ອົງຄະນະພັກແຂວງ ໂດຍເລືອກໄດ້ 4 ສະຫາຍຄື: ສະຫາຍ ໂພໄຊ ພິມມະສອນ, ສະຫາຍ ສີສຸພັນ ມະຫາວົງ, ສະຫາຍ ພັນໂທ ວິທົງ ໄຊຍະຕິ້ ແລະສະຫາຍ ລໍາທອງ ຈັນມີວົງ.

Medialaos ຂ່າວເຊກອງ