ເມືອງອາດສະພັງທອງ ຈັດກອງປະຊຸມເຊື່ອມຊຶມມະຕິ ແລະ ແຜນດໍາເນີນງານຂອງອົງຄະນະພັກເມືອງ ສະໄໝທີ VIII

0
62

ໃນວັນທີ 25 ກຸມພາ 2020 ນີ້ ຢູ່ທີ່ສະໂມສອນຂອງເມືອງ ອາດສະພັງທອງໄດ້ຈັດກອງປະຊຸມເຊື່ອມຊຶມມະຕິ ແລະ ແຜນດໍາເນີນງານຂອງອົງຄະນະພັກເມືອງສະໄໝທີ VIII ຂຶ້ນຢ່າງເປັນທາງການ. ໂດຍພາຍໃຕ້ການເຂົ້າຮ່ວມ ແລະ ໃຫ້ກຽດເຜີຍແຜ່ຂອງສະຫາຍ ຄໍາປານ ເຄນວົງສັກ ຮອງເລຂາພັກເມືອງ ປະທານກວດກາພັກ – ລັດເມືອງ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງຕະຫຼອດຮອດເລຂາພັກບ້ານ,ນາຍບ້ານໃນທົ່ວເມືອງກໍ່ໄດ້ເຂົ້າຮ່ວມ.
ໃນພິທີສະຫາຍ ຄໍາປານ ເຄນວົງສັກ ຮອງເລຂາພັກເມືອງ ປະທານກວດກາພັກ – ລັດເມືອງກໍ່ໄດ້ໃຫ້ກຽດຂຶ້ນເຜີຍແຜ່ເອກະສານເຊື່ອມຊຶມມະຕິກອງປະຊຸມໃຫ່ຍຄັ້ງທີ VIII ຂອງຄະນະບໍລິຫານງານພັກເມືອງ ອາດສະພັງທອງ 2019 – 2024 ໂດຍກອງປະຊຸມໃຫ່ຍຜູ້ແທນຄັ້ງທີ VIII ຂອງອົງຄະນະພັກເມືອງໄດ້ໄຂຂຶ້ນຢ່າງເປັນທາງການໃນຄັ້ງວັນທີ 10 – 11 ທັນວາ 2019 ໂດຍມີຜູ້ແທນເຂົ້າຮ່ວມທັງໝົດ 135 ສະຫາຍ, ຍິງ 23 ສະຫາຍ, ເຊິ່ງເປັນຕົວແທນໃຫ້ແກ່ສະມາຊິກທັງໝົດ 1.236 ສະຫາຍ, ຍິງ 386 ສະຫາຍ, ແຂກຖືກເຊີນ 26 ສະຫາຍ.

ບັນດາສະຫາຍເຂົ້າຮ່ວມກອງປະຊຸມໄດ້ຍົກສູງຄວາມຮັບຜິດຊອບ, ມີລະບຽບວິໄນສຸມສະຕິປັນຍາຂອງຕົນເຮັດໃຫ້ກອງປະຊຸມດໍາເນີນໄປດ້ວຍບັນຍາກາດຟົດຟື້ນ ແລະ ປະສົບຜົນສໍາເລັດຢ່າງສະຫງ່າງາມຕາມຈຸດປະສົງຄາດໝາຍຂອງກອງປະຊຸມທີ່ໄດ້ກໍານົດໄວ້. ເຊິ່ງໃນກອງປະຊຸມແມ່ນໄດ້ພ້ອມກັນຄົ້ນຄວ້າ ແລະ ປະກອບຄວາມຄິດຄວາມເຫັນໃສ່ບົດລາຍງານການເມືອງ ແລະ ບົດສໍາຫຼວດການນໍາພາຂອງຄະນະພັກ, ໄດ້ເປັນເອກະພາບກັນຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນໃນການຊີ້ນໍາພາ ແລະ ການຈັດຕັ້ງປະຕິບັດມະຕິກອງປະຊຸມໃຫ່ຍໃນ 05 ປີຜ່ານມາ. ພ້ອມດຽວກັນນີ້ກອງປະຊຸມຍັງໄດ້ເປັນເອກະພາບກັນຮັບຮອງເອົາທິດທາງແຜນການ 05 ປີຕໍ່ໜ້າ ( 2019 – 2024 ) ເຊິ່ງມີເນື້ອໃນບາງອັນຕົ້ນຕໍ່ຄື: ກອງປະຊຸມໄດ້ຮັບຟັງພ້ອມທັງຄົ້ນຄວ້າເລິກເຊິ່ງ ແລະ ພ້ອມກັນຕົກລົງຮັບຮອງເອົາບົດລາຍງານການເມືອງທີ່ສ່ອງແສງໃຫ້ເຫັນຜົນສຳເລັດດ້ານຕ່າງໆ ທີ່ເປັນໝາກຜົນແຫ່ງການຈັດຕັ້ງຊີ້ນໍາໆພາຂອງຄະນະບໍລິຫານພັກເມືອງໃນສະໄໝທີ VII ໃນ 05 ປີທີ່ຜ່ານມາ. ທີ່ນໍາສະເໜີໂດຍສະຫາຍ ອຸໄພວັນ ໄຊຍະວົງ ເລຂາຄະນະບໍລິຫານພັກເມືອງ ອາດສະພັງທອງ ແລະ ແຜນພັດທະນາເສດຖະກິດ – ສັງຄົມທີ່ນໍາສະເໜີໂດຍ ສະຫາຍ ຄໍາປານ ເຄນວົງສັກ ຄະນະປະຈໍາພັກເມືອງ, ຮອງເຈົ້າເມືອງ ບົດລາຍງານການເມືອງ ແລະ ແຜນພັດທະນາເສດຖະກິດ – ສັງຄົມໄດ້ຊີ້ໃຫ້ເຫັນວ່າ: ຕະຫຼອດຊຸມປີຜ່ານມາເຖິງວ່າໄດ້ປະສົບກັບສິ່ງທີ່ທ້າທາຍຫຼາຍປະການແຕ່ດ້ວຍຈິດໃຈຟົດຟື້ນປະຕິວັດ ແລະ ຄວາມສາມັກຄີເປັນຈິດໜຶ່ງໃຈດຽວກັັນພາຍໃຕ້ການຊີ້ນໍາໆພາຂອງຄະນະພັກເມືອງສາມາດຮັກສາສະຖຽນນະພາບທາງດ້ານການເມືອງສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ, ເສດຖະກິດມີການຂະຫຍາຍຕົວຢ່າງຕໍ່ເນື່ອ, ວັດທະນະທໍາ – ສັງຄົມໄດ້ຮັບການພັດທະນາມີຄວາມສີວິໄລ ແລະ ຍຸດຕິທໍາ, ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນບັນດາເຜົ່າໄດ້ຮັບການປົວແປງດີຂຶ້ນເປັນກ້າວໆມາ.ຈາກນັ້ນ; ສະຫາຍກໍ່ຍັງໄດ້ເຜີຍແຜ່ການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍຄັ້ງທີ VIII ແລະແຜນການດໍາເນີນງານຂອງຄະນະບໍລິຫານງານພັກເມືອງ ອາດສະພັງທອງ 2019 – 2024 ຕື່ມອີກດ້ວຍ.

ພາບຂ່າວ: ສາຍສະໝຸດ ສິມພະລີວົງ
savannakhet medialaos