ໃນຕອນເຊົ້າຂອງວັນທີ່ 27 ກຸມພາ 2020 ຢູ່ທີ່ສະໂມ ສອນໃຫຍ່ຂອງ #ເມືອງຍອດອູ, #ແຂວງຜົ້ງສາລີ ໄດ້ເປີດກອງປະຊຸມໃຫຍ່ຜູ້ແທນອົງຄະນະພັກເມືອງຍອດອູຄັ້ງທີ່ IX ຂື້ນຢ່າງເປັນທາງການ. ໂດຍພາຍໃຕ້ການເປັນປະທານຂອງສະຫາຍ ສົມຫັວງ ສຸມວີໄລ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງໆຍອດອູ, ເປັນກຽດເຂົ້າຮ່ວມຂອງສະຫາຍ ຄຳຜອຍ ວັນນະສານ ຮັກສາການເລຂາພັກແຂວງ, ເຈົ້າແຂວງໆຜົ້ງສາລີ, ມີສະຫາຍ ທອງສະຫວັນ ທຳມະວົງ ກຳມະການປະຈຳພັກແຂວງ, ປະທານແນວລາວສ້າງຊາດແຂວງ, ທັງເປັນຜູ້ຊີ້ນຳວຽກງານຮອບດ້ານຂອງເມືອງຍອດອູ, ມີຜູ່ຕ່າງໜ້າຈາກຄະນະຄະນະຈັດຕັ້ງແຂວງ – ກວດກາແຂວງ, ກຳມະການພັກແຂວງ, ຮອງເລຂາພັກເມືອງ, ກຳມະການປະຈຳພັກເມືອງ, ກຳມະການພັກເມືອງ, ເຈົ້າເມືອງ-ຮອງເຈົ້າເມືອງຈາກ 6 ເມືອງ,ພະແນກການຕ່າງໆອ້ອມຂ້າງແຂວງ, ພະນັກງານປະຕິວັດອາວຸໂສບຳນານ, ອະດິດການນຳເມືອງ, ມີຜູ້ແທນສົມບູນເຂົ້າຮ່ວມທັງໝົດ 145 ສະຫາຍ, ຍີງ 23 ສະຫາຍ, ທີ່ເປັນຕົວແທນໃຫ້ແກ່ສະມາຊີກພັກ, ທີ່ມາຈາກຄະນະພັກຮາກຖານ ແລະ ໝ່ວຍພັກທົ່ວເມືອງຍອດອູທັງໝົດ 1.456 ສະຫາຍ, ຍີງ 436 ສະຫາຍ.

ໃນກອງປະຊຸມສະຫາຍ ສົມຫັວງ ສຸມວີໄລ ກຳມະການພັກແຂວງ, ເລຂາພັກເມືອງ, ເຈົ້າເມືອງໆຍອດອູ ກໍ່ໄດ້ຂື້ນກ່າວໄຂກອງປະຊຸມຢ່າງເປັນທາງການ ພ້ອມທັງຜ່ານຮ່າງລາຍງານການເມືອງທັງສອງພາກ ເຊີ່ງບາງຕອນໄດ້ທ່ານກ່າວວ່າ: ພາຍໃຕ້ການຊີ້ນຳຈາກຄະນະບໍລິຫານງານພັກແຂວງ ແລະ ການນຳພາຂອງຄະນະບໍລິຫານງານພັກເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກຂັ້ນຕ່າງໆ ໂດຍສະເພາະແມ່ນ ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກເມືອງຍອດອູຕະຫຼອດໄລຍະ 5 ປີຜ່ານມາເຫັນວ່າມີຜົນສໍາເລັດຫຼາຍດ້ານ ເປັນຕົ້ນ ທົ່ວເມືອງຍອດອູ ແມ່ນມີສະຖຽນລະພາບທາງດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດຖະກິດ – ສັງຄົມ ມີການພັດທະນາດ້ວຍບາດກ້າວ ແລະ ທ່ວງທ່າໃໝ່, ປະຊາຊົນບັນດາເຜົ່າມີຄວາມສາມັກຄີປອງດອງ, ພື້ນຖານໂຄງລ່າງຂອງເມືອງກໍ່ໄດ້ຮັບການປັບປຸງ, ຊີວິດການເປັນຢູ່ຂອງປະຊາຊົນກໍ່ໄດ້ຮັບການແກ້ໄຂ້ດີຂື້ນເປັນກ້າວໆ, ອັດຕາສ່ວນຄວາມທຸກຍາກໄດ້ຫຼຸດໜ້ອຍຖອຍລົງເທື່ອລະກ້າວ. ເຊີ່ງສະແດງອອກດ້ານເສດຖະກິດມີການຂະຫຍາຍຕົວລວມຍອດລາຍຮັບຜົນຜະລີດ ສະເລ່ຍ 7,31%, ໃນນັ້ນກະສີກຳປ່າໄມ້ເພີ້ມຂື້ນ 8,27 %ຕໍ່ປິ, ອຸດສະຫະກຳຫັດຖະກຳ 6,27 %ຕໍ່ປີ, ການບໍລິການ 10,03 % ຕໍ່ປີ, ເຊີ່ງສາມາດສ້າງຍອດລາຍຮັບຜົນຜະລີດໃນປີ 2019 ບັນລຸໄດ້ 303,477 ຕື້ກັບ, ສະເລ່ຍໃສ່ຫົວຄົນບັນລຸ 9.220.000 ກີບຕໍ່ຄົນຕໍ່ປີ ເທົ່າກັບ 1.060 ໂດລາຕໍ່ຄົນຕໍ່ປີ ທຽບໃສ່ 5 ປີຜ່ານມາເພີ້ມຂື້ນ 184 ໂດລາສະຫະລັດ.

ກອງປະຊຸມໃຫຍ່ຄັ້ງທີ IX ຂອງຄະນະບໍລິຫານງານພັກເມືອງ ຍອດອູ ຄັ້ງນີ້ ຜູ້ແທນທີ່ເຂົ້າຮ່ວມຈະໄດ້ພ້ອມກັນຄົ້ນຄ້ວາ, ປະກອບຄໍາເຫັນໃສ່ຮ່າງບົດລາຍງານການເມືອງ ແລະ ແຜນພັດທະນາເສດຖະກິດ – ສັງຄົມ 5 ປີຕໍ່ໜ້າ, ພ້ອມທັງທົບທວນຕີລາຄາຄືນກ່ຽວກັບການຈັດຕັ້ງປະຕິບັດແນວທາງການປ່ຽນແປງໃໝ່ທີ່ມີຫຼັກການຂອງພັກກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກເມືອງ, ກຳນົດທິດທາງໜ້າທີ່ແຕ່ນີ້ຮອດປີ 2024. ພ້ອມທັງເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່.

ກອງປະຊຸມໃຫຍ່ຜູ້ແທນອົງຄະນະພັກເມືອງຍອດອູຄັ້ງທີ IX ຈະດຳເນີນເປັນເວລາ 2 ວັນ ຮອດວັນທີ 28 ກຸມພາ ຈື່ງສຳເລັດ.

medialaos phhongsaly
( ພາບ – ຂ່າວ: ແສງຄຳ ສາລີວັນ )