ເພື່ອຍົກລະດັບຄວາມຮູ້ຄວາມສາມາດ ແລະ ສ້າງໃຫ້ພະນັກງານ-ລັດຖະກອນ ມີຄວາມເຂົ້າໃຈຢ່າງເລິກເຊິ່ງ ໃນວຽກງານກວດກາ ຂອງອົງການແນວລາວສ້າງຊາດ ໃນວັນທີ 27 ກຸມພາ 2020 ຢູ່ຫ້ອງປະຊຸມຫ້ອງວ່າການແຂວງບໍລິຄຳໄຊ ໄດ້ຈັດຝຶກອົບຮົມວຽກງານກວດກາຂອງອົງການແນວລາວສ້າງຊາດຂຶ້ນ ໂດຍການເຂົ້າຮ່ວມຂອງ ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ ຜູ້ຊີ້ນຳວຽກງານກວດກາ ມີຄະນະຮັບຜິດຊອບຈາກສູນກາງ, ຜູ້ຕາງໜ້າແນວລາວສ້າງຊາດເມືອງ ຈາກແຂວງຊຽງຂວາງ, ໄຊສົມບຸນ, ບໍລິຄຳໄຊ, ນະຄອນຫຼວງວຽງຈັນ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໃນພິທີ ໄດ້ຮັບຟັງການນຳສະເໜີ ຄູ່ມືຝຶກອົບຮົມວຽກງານກວດກາຂອງອົງການແນວລາວສ້າງຊາດ ທີ່ໄດ້ຍົກໃຫ້ເຫັນເຖິງຄວາມຮູ້ພື້ນຖານກ່ຽວກັບວຽກງານກວດກາພັກ, ກວດກາລັດ, ວຽກງານຄົ້ນຄ້ວາແກ້ໄຂຄຳຮ້ອງຟ້ອງ, ຮ້ອງທຸກ ແລະ ຄຳສະເໜີ, ພ້ອມດຽວກັນ ຍັງເວົ້າເຖິງວຽກງານຕິດຕາມ – ກວດກາແນວລາວສ້າງຊາດ ທີ່ບໍ່ແມ່ນການຕິດຕາມ, ກວດກາໂດຍກົງຕໍ່ເປົ້າໝາຍ ແຕ່ແມ່ນການຕິດຕາມ, ກວດກາໂດຍຜ່ານປະຊາຊົນ, ຜານການເກັບກຳຄຳຄິດຄຳເຫັນ, ຄວາມຂັດຂ້ອງໝອງໃຈ ແລະ ຫາງສຽງຂອງປະຊາຊົນລາວບັນດາເຜົ່າ ຕໍ່ການປະຕິບັດແນວທາງ, ກົດໝາຍ ແລະ ລະບຽບການຕ່າງໆໃນແຕ່ລະໄລຍະ ເພື່ອສັງລວມແລ້ວນຳສະເໜີກອງປະຊຸມສາມັນແຕ່ລະເທື່ອ, ແຕ່ລະສະໄໝຂອງສະພາແຫ່ງຊາດ ແລະ ພາກສ່ວນລັດບໍລິຫານທີ່ກ່ຽວຂ້ອງ ເພື່ອຄົ້ນຄ້ວາພິຈາລະນາແກ້ໄຂ ແລະ ປັບປຸງໃຫ້ດີຂຶ້ນ, ເປົ້າໝາຍການຕິດຕາມ, ກວດກາຂອງແນວລາວສ້າງຊາດ ມີ 5 ເປົ້າໝາຍ ຄື: ສະພາແຫ່ງຊາດ, ສະພາປະຊາຊົນແຂວງ ແລະ ສະມາຊິກຂອງສະພາດັ່ງກ່າວ, ອົງການລັດບໍລິຫານ, ອົງການຕຸລາການ, ພາຄີຂອງແນວລາວສ້າງຊາດ ແລະ ພະນັກງານ-ລັດຖະກອນ. ນອກຈາກນັ້ນ ຍັງຈະໄດ້ຮຽນຮູ້ກ່ຽວກັບ ການສ້າງເອກະສານກ່ຽວກັບວຽກງານກວດກາ, ກົດໝາຍສະບັບປັບປຸງ ວ່າດ້ວຍແນວລາວສ້າງຊາດ ແລະ ຂໍ້ກຳນົດວ່າດ້ວຍການຄົ້ນຄ້ວາພິຈາລະນາແກ້ໄຂຮ້ອງຟ້ອງ, ຮ້ອງທຸກ ແລະ ຄຳສະເໜີ.

ຊຸດຝຶກອົບຮົມຄັ້ງນີ້ ຈະໄດ້ດຳເນີນໄປເປັນເວລາ 2 ວັນຈຶ່ງສຳເລັດ ແຕ່ວັນທີ 27-28 ກຸມພາ 2020, ສຳມະນາກອນ ຍັງຈະໄດ້ມີການສະເໜີແລກປ່ຽນບົດຮຽນເຊິ່ງກັນ ແລະ ກັນ ເພື່ອສົ່ງເສີມດ້ານດີ ແລະ ແກ້ໄຂບາງຂໍ້ຄົງຄ້າງ ແນໃສ່ການນຳໃຊ້ບົດຮຽນດັ່ງກ່າວ ເຂົ້າໃນການພັດທະນາວຽກງານຂອງຕົນໃຫ້ດີຂຶ້ນເປັນກ້າວໆ.

Medialaos bolikhamxay